ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທີ່ປຶກສາພິເສດປະຈໍານາຍົກລັດຖະມົນຕີຍີ່ປຸ່ນ ຢ້ຽມຢາມ ສປປ ລາວ.

ວັນທີ 21 ມັງກອນ 2020 ທີ່ກະຊວງການຕ່າງປະເທດ ທ່ານສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ  ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຄີຮາຣະ ມິໂນຣຸ (KIHARA Minoru) ທີ່ປຶກສາພິເສດປະຈໍານາຍົກລັດຖະມົນຕີຍີ່ປຸ່ນ ,ຮັບຜິດຊອບວຽກງານຄວາມໝັ້ນຄົງແຫ່ງຊາດຍີ່ປຸ່ນ ໃນໂອກາດເດີນທາງມາຢ້ຽມຢາມ ສປປ ລາວ ລະຫວ່າງວັນທີ 21 ຫາ 22 ມັງກອນ 2020 ເພື່ອເປັນການເພີ່ມທະວີຮັດແໜ້ນສາຍພົວພັນມິດຕະພາບ ແລະການຮ່ວມມືທີ່ດີ ໃນດ້ານຕ່າງໆ ທັງສາຍພັກແລະສາຍລັດ ລະຫວ່າງສອງປະເທດ ສປປ ລາວ ແລະຍີ່ປຸ່ນ ພາຍໃຕ້ການເປັນຄູ່ຮ່ວມຍຸດທະສາດ ໃຫ້ນັບມື້ນັບກວ້າງຂວາງ, ແໜ້ນແຟ້ນ ແລະເລິກເຊິ່ງຍິ່ງຂຶ້ນ.

ໂອກາດນີ້, ທ່ານລັດຖະມົນຕີ ກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຂອງທ່ານ KIHARA Minoru ພ້ອມດ້ວຍຄະນະໃນຄັ້ງນີ້ ພາຍຫລັງທີ່ທ່ານໄດ້ຮັບການແຕ່ງຕັ້ງໃຫ້ເປັນທີ່ປຶກສາພິເສດປະຈໍານາຍົກລັດຖະມົນຕີຍີ່ປຸ່ນ, ທ່ານລັດຖະມົນຕີ ໄດ້ກ່າວສະແດງຄວາມຂອບໃຈຕໍ່ລັດຖະບານ ແລະປະຊາຊົນຍີ່ປຸ່ນ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫລືອ ສປປ ລາວ ຕະຫລອດມາ ເຊັ່ນ: ການຊ່ວຍເຫລືອເພື່ອການພັດທະນາ (ODA) ຂອງຍີ່ປຸ່ນ (ມູນຄ່າ 90-100 ລ້ານໂດລາສະຫະລັດຕໍ່ປີ) ເປັນອັນດັບ1 ຂອງຕ່າງປະເທດຊ່ວຍເຫລືອລ້າ ແກ່ ສປປ ລາວ. ໃນນັ້ນ ກວມເອົາຂົງເຂດວຽກງານການພັດທະນາພື້ນຖານໂຄງລ່າງ , ຊັບພະຍາກອນມະນຸດ, ສາທາລະນະສຸກ, ກະສິກໍາ-ປ່າໄມ້ ແລະອື່ນໆ ເຊິ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ  ແລະຜັນຂະຫຍາຍແຜນການເຊື່ອມໂຍງເຂົ້າພາກພື້ນ ແລະສາກົນຂອງ ສປປ ລາວ. ນອກຈາກນັ້ນ, ສອງຝ່າຍໄດ້ປຶກສາຫາລືກ່ຽວກັບການກະກຽມກິດຈະກໍາ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ສປປ ລາວ-ຍີ່ປຸ່ນ ຄົບຮອບ 65ປີ ( ວັນທີ 05 ມິນາ 1955) ແລະການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ຄົບຮອບ 05ປີ ໃນປີ 2020ນີ້ ໃຫ້ປະສົບຜົນສໍາເລັດຢ່າງຈົບງາມ.

ໂອກາດເດີນທາງມາຢ້ຽມຢາມ ສປປ ລາວ ໃນຄັ້ງນີ້ ທ່ານທີ່ປຶກສາພິເສດປະຈໍານາຍົກລັດຖະມົນຕີຍີ່ປຸ່ນ ຍັງໄດ້ເຂົ້າຢ້ຽມຄໍານັບບັນດາການນໍາຂອງ ສປປ ລາວ ເຊັ່ນ: ທ່ານສົມດີ ດວງດີ ຮອງນາຍົກ ລັດຖະມົນຕີ ,ລັດຖະມົນຕີກະຊວງການເງິນ, ທ່ານພົນເອກ ຈັນສະໝອນ ຈັນຍາລາດ, ລັດຖະມົນຕີກະຊວງປ້ອງກັນປະເທດ , ທ່ານບຸນຈັນ ສິນທະວົງ ລັດຖະມົນຕີກະຊວງໂຍທາທິການແລະຂົນສົ່ງ ແລະທ່ານອາລຸນແກ້ວ ກິດຕິຄຸນ, ລັດຖະມົນຕີປະຈໍາສໍານັກງານນາຍົກລັດຖະມົນຕີ.