ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທູດລາວ ຍື່ນສານຕາຕັ້ງຕໍ່ເລຂາທິການໃຫຍ່ອົງການ ສປຊ ທີ່ນະຄອນນິວຢອກ.

ໃນຕອນບ່າຍຂອງວັນທີ 28 ມັງກອນ 2020, ທີ່ສຳນັກງານໃຫຍ່ອົງການສະຫະປະຊາຊາດ (ສປຊ), ນະຄອນນິວຢອກ, ສະຫະລັດອາເມລິກາ, ທ່ານອານຸພາບ ວົງໜໍ່ແກ້ວ, ໄດ້ຍື່ນສານຕາຕັ້ງຕໍ່ທ່ານ ແອນໂຕນີໂອ ກູເຕີເຣັດສ໌ (Antonio Guterres), ເລຂາທິການໃຫຍ່ ອົງການສະຫະປະຊາຊາດ, ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສປປ ລາວ, ທັງເປັນຜູ້ຕາງໜ້າຖາວອນແຫ່ງສປປ ລາວ ຄົນໃໜ່ ປະຈຳອົງການ ສປຊ.

ໃນໂອກາດດັ່ງກ່າວ, ທ່ານ ເລຂາທິການໃຫຍ່ ສປຊ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານ ເອກອັກຄະລັດຖະທູດລາວ ທີ່ໄດ້ຖືກແຕ່ງຕັ້ງມາດຳລົງແໜ່ງ ເປັນຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການ ສປຊ, ພ້ອມທັງຊົມເຊີຍ ລັດຖະບານແຫ່ງ ສປປ ລາວ ທີ່ໄດ້ມີຄວາມຄືບຫນ້າໃຫ້ການພັດທະນາປະເທດ, ສາມາດຜ່ານຜ່າຄວາມຫຍຸ້ງຍາກໃນອາດີດ ແລະ ມີຄວາມໝາຍໝັ້ນໃນການຫຼຸດພົ້ນອອກຈາກສະຖານະພາບປະເທດທີ່ດ້ອຍພັດທະນາ.
ພ້ອມກັນນັ້ນ, ທ່ານເລຂາທິການໃຫຍ່ ສປຊ ຍັງໃຫ້ຄຳໝັ້ນສັນຍາວ່າ ອົງການ ສປຊ ຈະສືບຕໍ່ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນການຈັດຕັ້ງເປົ້າໝາຍການພັດທະນາແບບຍືນຍົງ ແລະ ຍັງໄດ້ກ່າວເຖິງທ່າແຮງທາງດ້ານທຳມະຊາດ ແລະ ວັດທະນາທຳອັນດີງາມ ທີ່ຄັ້ງຫນຶ່ງ ໃນຫລາຍປີຜ່ານມາ, ທ່ານເລຂາທິການໃຫຍ່ ສປຊ ໄດ້ມີໂອກາດ ສຳຜັດ ແລະ ມີຄວາມປະທັບໃຈຈາກການເດີນທາງມາທ່ອງທ່ຽວສປປ ລາວ ແຕ່ພາກເໜືອຊາຍແດນສາມຫຼ່ຽມຄຳ ຈົນຮອດພາກໃຕ້ ສີ່ພັນດອນ.


ໃນໂອກາດດຽວກັນ, ທ່ານເອກອັກຄະລັດຖະທູດລາວ ອານຸພາບ ວົງໜໍ່ແກ້ວ ກໍ່ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ພ້ອມທັງໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນຈາກການນຳຂອງ ສປປ ລາວ ມາຍັງທ່ານ ເລຂາທິການໃຫຍ່ ສປຊ.
ພ້ອມດຽວກັນນັ້ນ, ທ່ານເອກອັກຄະລັດຖະທູດລາວ ຍັງໄດ້ຢ້ຳຄືນຄວາມໝາຍໝັ້ນຂອງລັດຖະບານສປປ ລາວ ໃນການຈັດຕັ້ງປະຕິບັດບັນດາເປົ້າໝາຍດ້ານການພັດທະນາຂອງສາກົນ, ໂດຍສະເພາະເປົ້າຫມາຍການພັດທະນາແບບຍືນຍົງ ລວມທັງເປົ້າຫມາຍທີ 18: ຊີວິດທີ່ປອດໄພຈາກລະເບີດບໍ່ທັນແຕກ ກໍ່ຄືື ສືບຕໍ່ຄວາມພະຍາຍາມເພື່ອຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນຊຸມປີຕໍ່ຫນ້າ.
ໃນໂອກາດດຽວກັນນີ້, ທ່ານທູດລາວ ກໍ່ໄດ້ສະແດງຄວາມຂອບໃຈຕໍ່ອົງການ ສປຊ ທີ່ໄດ້ໃຫ້ການສະໜັບສະໜູນຊ່ວຍເຫລືອ ສປປ ລາວ ຕະຫລອດໄລຍະຜ່ານມາ, ເຊີ່ງເປັນການປະກອບສ່ວນອັນສຳຄັນໃນການພັດທະນາເສດຖະກິດ-ສັງຄົມຂອງ ສປປ ລາວ.


ປີ 2020 ເປັນປີທີ່ມີຄວາມຫມາຍສຳຄັນ ໃນການສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ຄົບ ຮອບ 75 ປີ (24 ຕຸລາ 1945 – 24 ຕຸລາ 2020) ແລະ ການເຂົ້າເປັນສະມາຊິກອົງການສະຫະປະຊາຊາດຂອງປະເທດລາວ ຄົບຮອບ 65 ປີ (14 ທັນວາ 1955 – 14 ທັນວາ 2020).

ຂ່າວ,​ພາບ: ກົມການຂ່າວ ກະຊວງການຕ່າງປະເທດ