ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ທູດລາວ ຍື່ນສານຕາຕັ້ງຕໍ່ ປະທານາທິບໍດີ ສ.ອາເມລິກາ

ໃນວັນຈັນ, ​ວັນ​ທີ 08 ເມສາ 2019, ເວລາ 10:00 ໂມງ, ທີ່ ນະຄອນຫຼວງວໍຊິງຕັນ ດີຊີ, ທ່ານ ຄຳພັນ ອັ່ນລາວັນ ເອກອັກຄະລັດຖະທູດແຕ່ງຕັ້ງ ແຫ່ງ ສປປ ລາວ ປະຈຳ ສະຫະລັດ ອາເມລິກາ ໄດ້ຍື່ນສານຕາຕັ້ງຕໍ່ ທ່ານ ໂດນັນ ທຣໍາ, ປະທານາທິບໍດີ ແຫ່ງ ສະຫະລັດ ອາເມລິກາ ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສະຫະລັດ ອາເມລິກາ.

ໃນໂອກາດດັ່ງກ່າວ ທ່ານທູດໄດ້ສະແດງຄວາມຂອບໃຈເປັນຢ່າງຍິ່ງ ທີ່ທ່ານປະທານາທິບໍດີ ໄດ້ໃຫ້ກຽດເຂົ້າຍື່ນສານຕາຕັ້ງໃນຄັ້ງນີ້ ຊຶ່ງຖືເປັນກຽດຢ່າງສູງ ທີ່ຕົນໄດ້ຖືກແຕ່ງຕັ້ງຈາກລັດຖະບານກໍ່ຄືປະທານປະເທດ ແຫ່ງ ສປປ ລາວໃຫ້ດຳລົງຕຳແໜ່ງເປັນເອກອັກຄະລັດະທູດ ແຫ່ງ ສປປ ລາວ ປະຈຳ ສ. ອາເມລິກາ. ໃນໂອກາດນີ້ ທ່ານທູດໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ທ່ານ ປະທານາທິບໍດີ ທຣໍາ ຈົ່ງມີພາລະນາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ໄດ້ຮັບຜົນສໍາເລັດໃນພາລະໜ້າທີ່ອັນມີກຽດຂອງທ່ານ. ພ້ອມດຽວກັນ, ທ່ານທູດຄຳພັນໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນ ສ. ອາເມລິກາ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ອັນໄດ້ປະກອບສ່ວນສຳຄັນເຂົ້າໃນການພັດທະນາ ແລະ ສ້າງສາປະເທດ ແລະ ຫວັງວ່າຈະໄດ້ຮັບການຊ່ວຍເຫຼືອໃນຊຸມປີຕໍ່ໜ້າ ໃນຖານະເປັນຄູ່ຮ່ວມຍຸດທະສາດແບບກວມລວມ ນັບແຕ່ປີ 2016 ເປັນຕົ້ນມາ. ນອກຈາກນີ້, ຍັງໄດ້ລາຍງານຫຍໍ້ການພົວພັນຮ່ວມມືສອງຝ່າຍ ກໍ່ຄືໃນຂອບຫຼາຍຝ່າຍລວມທັງ ຂອບການຮ່ວມມືອື່ນໆ, ພ້ອມທັງຈະຕັ້ງໜ້າປະຕິບັດໜ້າທີ່ເພື່ອຊຸກຍູ້ສົ່ງເສີມການຮ່ວມມືສອງຝ່າຍລະຫວ່າງ ສປປ ລາວ-ສະຫະລັດອາເມລິກາ ໃຫ້ຂະຫຍາຍຕົວຍິ່ງຂຶ້ນ. ເຊິ່ງທ່ານປະທານາທິບໍດີກໍ່ໄດ້ສະແດງຄວາມຂອບ ໃຈ ແລະ ຝາກຄວາມນັບຖືຮັກແພງ ມາຍັງ ພະນະທ່ານປະທານປະເທດ ແລະ ການນຳ ຂອງ ສປປ ລາວ ເຊັ່ນດຽວກັນ.

ໃນໂອກາດນີ້ ທ່ານປະທານາທິບໍດີ ໄດ້ສະແດງຄວາມຍິນດີ ແລະ ຊົມເຊີຍ ທ່ານທູດລາວຜູ້ໃໝ່ ທີ່ໄດ້ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສະຫະລັດ ອາເມລິກາ ເພື່ອປະຕິບັດໜ້າທີ່ອັນມີກຽດ, ພ້ອມທັງອວຍພອນໃຫ້ ທ່ານເອກອັກຄະລັດຖະທູດ ຈົ່ງປະສົບຜົນສຳເລັດໃນການເຄື່ອນໄຫວວຽກງານການທູດຂອງຕົນ ແລະ ຊຸກຍູ້ເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນ. ທ່ານ ເອກອັກຄະລັດຖະທູດ ກໍ່ໄດ້ສະແດງຄວາມຂອບໃຈ ແລະ ອວຍພອນໃຫ້ ທ່ານປະທານາທິບໍດີ ມີພະລານາໄມເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານ.

ສປປ ລາວ ແລະ ສ. ອາເມລິກາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 10 ສິງຫາ 1955 ເຊິ່ງສາຍພົວພັນດັ່ງກ່າວໄດ້ຂະຫຍາຍຕົວຂຶ້ນເລື້ອຍໆ ລະຫວ່າງ ລັດຖະບານ ແລະ ປະຊາຊົນສອງຊາດ ສປປ ລາວ-ສ. ອາເມລິກາ ໂດຍມີການແລກປ່ຽນການຢ້ຽມຢາມຄະນະຜູ້ແທນຂັ້ນຕ່າງໆ ຂອງສອງປະເທດ, ການຮ່ວມມືກວມເອົາດ້ານເສດຖະກິດ, ການຄ້າ, ການສຶກສາ, ວັດທະນະທຳ-ສັງຄົມ ແລະ ອື່ນໆ.

ຂ່າວຈາກ: ກົມການຂ່າວ, ກະຊວງການຕ່າງປະເທດ