ວັນທີ 13 ກັນຍາ 2023, ຢູ່ ຫ້ອງວ່າການລັດຖະບານຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ໄດ້ເຂົ້າຢ້ຽມອຳລາ ສະຫາຍ ຟາມ ມິງ ຈີ່ງ, ນາຍົກລັດຖະມົນຕີແຫ່ງ ສສ ຫວຽດນາມ, ເນື່ອງໃນໂອກາດສະຫາຍຈະຈົບວາລະການດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ.
ໂອກາດນີ້, ສະຫາຍ ຟາມ ມິງ ຈີ່ງ ກໍໄດ້ສະແດງຄວາມຊົມເຊີຍຕໍ່ຜົນສຳເລັດທີ່ຍາດມາໄດ້ໃນໄລຍະປະຕິບັດໜ້າທີ່ຢູ່ ສສ ຫວຽດນາມຂອງສະຫາຍ ແສງເພັດ ຮຸ່ງບຸນຍວງ ຕະຫຼອດໄລຍະ 4 ປີທີ່ຜ່ານມາ, ໂດຍສະເພາະໃນສະພາບການທີ່ມີລັກສະນະພິເສດ ຊຶ່ງຖືກກັບໄລຍະທີ່ມີການແຜ່ລະບາດຂອງເຊື້ອພະຍາດໂຄວິດ-19 ອັນໄດ້ສົ່ງຜົນກະທົບຢ່າງຮ້າຍຕໍ່ການດໍາລົງຊີວິດຂອງມວນມະນຸດເຮົາ, ພິເສດການໄປມາຫາສູ່ຖືກຢຸດສະງັດ ລວມທັງການເຄື່ອນໄຫວວຽກງານການທູດຂອງສະຫາຍກໍຖືກກະທົບເຊັ່ນດຽວກັນ. ແຕ່ເຖິງຢ່າງໃດກໍຕາມ ໃນໄລຍະຜ່ານມາເຫັນວ່າ: ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດຫວຽດນາມ-ລາວສືບຕໍ່ນັບມື້ນັບໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ. ສອງຝ່າຍສືບຕໍ່ສາມາດຈັດການພົບປະ ປະຈໍາປີລະຫວ່າງສອງກົມການເມືອງ, ກອງປະຊຸມຄະນະກຳມະການຮ່ວມມືທະວິພາຄີລະຫວ່າງສອງລັດຖະບານຢ່າງເປັນປົກກະຕິ, ການຢ້ຽມຢາມຢ່າງເປັນທາງການຂອງການນໍາຂັ້ນສູງຂອງສອງປະເທດ ແລະ ຂັ້ນຕ່າງໆເປັນປົກກະຕິ. ພິເສດການຈັດພິທີສະເຫຼີມສະຫຼອງປີສາມັກຄີມິດຕະພາບ ປ 2022 ເພື່ອລະນຶກຄືນສອງວັນປະຫວັດສາດທີ່ສຳຄັນຂອງຊາດຄື: ການສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ, ການພົວພັນຮ່ວມມືທາງດ້ານເສດຖະກິດລະຫວ່າງສອງປະເທດໄດ້ຮັບການສົ່ງເສີມ, ບັນດາໂຄງການຊ່ວຍເຫຼືອກໍໄດ້ຮັບປະຕິບັດຢ່າງມີປະສິດທິຜົນເປັນຕົ້ນຫໍສະພາແຫ່ງຊາດ, ໂຮງໝໍຢູ່ແຂວງຊຽງຂວາງ, ຫົວພັນ, ສະຖາບັນການເມືອງກະຊວງປ້ອງກັນຄວາສະຫງົບ, ໂຮງຮຽນຢູ່ແຂວງຄຳມ່ວນ ແລະ ອື່ນໆ. ນອກນີ້, ມູນຄ່າການຄ້າສອງສົ້ນຂອງສອງປະເທດກໍໄດ້ເພີ່ມຂຶ້ນ, ການລົງທຶນຂອງຫວຽດນາມຢູ່ລາວກໍມີທ່າອ່ຽງທີ່ເພີ່ມຂຶ້ນ ຊຶ່ງທຸກຜົນສຳເລັດດັ່ງກ່າວມີການປະກອບສ່ວນສຳຄັນຂອງສະຫາຍ ເອກອັກຄະລັດຖະທູດ.
ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະແດງຄວາມຂອບໃຈຢ່າງສູງຕໍ່ການນຳພັກ-ລັດ ແລະ ປະຊາຊົນຫວຽດນາມ ທີ່ໄດ້ອຳນວຍຄວາມສະດວກໃຫ້ແກ່ການປະຕິບັດໜ້າທີ່ ທີ່ພັກ, ລັດ ມອບໝາຍໃຫ້ຈົນປະສົບຜົນສຳເລັດຢ່າງຈົບງາມ ກໍຄືສະແດງຄວາມຂອບໃຈຢ່າງໃຈຕໍ່ພັກ, ລັດ ຫວຽດນາມໃນການຕີລາຄາສູງການປະກອບສ່ວນຂອງຕົນໃນເສີມຂະຫຍາຍສາຍພົວພັນສອງປະເທດ ດ້ວຍການປະດັບຫຼຽນໄຊແຮງງານ ຊັ້ນ 1 ອັນຊົງກຽດ. ນອກນີ້, ສະຫາຍ ກໍໄດ້ສະແດງຄວາມຮູ້ບຸນຄຸນມາຍັງພັກ, ລັດ ແລະ ປະຊາຊົນຫວຽດນາມ ທີ່ຍາມໃດກໍຄ່ຽງບ່າຄ່ຽງໄຫຼ ແລະ ໃຫ້ການສະໜັບສະໜູນ, ຊ່ວຍເຫຼືອແກ່ພັກ, ລັດ ແລະ ປະຊາຊົນລາວ ໂດຍສະເພາະການຊ່ວຍເຫຼືອໃນການແກ້ໄຂທີ່ ສປປ ລາວ ພົບຄວາມຫຍຸ້ງຍາກທາງດ້ານເສດຖະກິດ, ເງິນຕາ ແລະ ທະນາຄານ. ພ້ອມທັງສະຫາຍຍັງໄດ້ຢືນຢັນວ່າ: ເຖິງວ່າຈະສຳເລັດໜ້າທີ່ການທູດຢູ່ ສສ ຫວຽດນາມ ແລະ ກັບຄືນປະເທດຈະຢູ່ໃນຕຳແໜ່ງ ຫຼື ສະຖານະໃດກໍຕາມ, ແຕ່ຈະສືບຕໍ່ເປັນຂົວຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນທີ່ມີລັກສະນະພິເສດ ທີ່ມີໜຶ່ງບໍ່ມີສອງໃນໂລກນີ້ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ນອກຈາກນີ້, ສະຫາຍນາຍົກລັດຖະມົນຕີ ຍັງໄດ້ສະເໜີໃຫ້ສອງຝ່າຍສືບຕໍ່ຮັດແໜ້ນ, ເສີມຂະຫຍາຍສາຍພົວພັນສອງຝ່າຍ ເພື່ອນຳເອົາຜົນປະໂຫຍດທີ່ແທ້ຈິງມາສູ່ປະຊາຊົນສອງຊາດ, ສືບຕໍ່ຖະໜຸຖະໜອມສາຍພົວພັນມິດຕະພາບອັນຍິ່ງ, ຄວາມສາມັກຄີພິເສດ ແລະ ການຮ່ວມືຮອບດ້ານຂອງປະເທດ ຊຶ່ງເປັນມໍລະມົກອັນລໍ້າຄ່າໃຫ້ໝັ້ນຄົງຕະຫຼອດກະລານານ. ສອງຝ່າຍຍັງໄດ້ປຶກສາຫາລຶືແຜນການຮ່ວມມືໃນຕໍ່ໜ້າ ໂດຍສະເພາະການສົ່ງເສີມທາງດ້ານການຄ້າ, ການລົງທຶນ ແລະ ມູນຄ່າການຄ້າສອງສົ້ນໃຫ້ຫຼາຍຂຶ້ນເພື່ອນັບມື້ນັບສົມຄູ່ການພົວພັນດີເລີດທາງດ້ານເມືອງ, ພິເສດ, ການຮັດແໜ້ນການຮ່ວມມືທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ປະສານສົມທົບກັນຢ່າງແໜ້ນແຟ້ນເພື່ອຮັບປະກັນການເປັນປະທານອາຊຽນຂອງ ສປປ ລາວ ໃນປີ 2024 ໃຫ້ປະສົບຜົນສຳເລັດຢ່າງຈົບງາມ.
ຂ່າວ,ພາບ: ສະຖານທູດລາວທີ່ຮ່າໂນ້ຍ
