ໃນວັນທີ 18 ສິງຫາ 2022, ທ່ານ ລັດສະໝີ ແກ້ວມະນີ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຕວັກກີ ທີ່ມີສໍານັກງານຕັ້ງຢູ່ ເຊີແນວ, ປະເທດສະວິດເຊີແລນ, ໄດ້ເປັນກຽດຕາງໜ້າໃຫ້ລັດຖະບານ ຕ້ອນຮັບ ແລະມອບສານແຕ່ງຕັ້ງ ຂອງ ພະນະທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໃຫ້ແກ່ ທ່ານ Nihat OZPINAR, ນັກທຸລະກິດສັນຊາດຕວັກກີ ເພື່ອດໍາລົງຕໍາແໜ່ງເປັນກົງສຸນກິດຕິມະສັກ ແຫ່ງ ສປປ ລາວ ປະຈໍາ ຕວັກກີ ໂດຍກວມເອົາທຸກແຂວງຂອງຕວັກກີ.
ໃນໂອກາດນີ້, ທ່ານທູດ ລັດສະໝີ ແກ້ວມະນີ ໄດ້ສະແດງຄວາມຊົມເຊີຍ ທ່ານ Nihat OZPINAR ຕໍ່ການແຕ່ງຕັ້ງດັ່ງກ່າວ ແລະມີຄວາມເຊື່ອໝັ້ນວ່າ: ດ້ວຍຄຸນສົມບັດອັນພຽບພ້ອມ ບວກກັບຄວາມຮູ້ຄວາມສາມາດ ແລະປະສົບການສູງ ທ່ານ Nihat OZPINAR ຈະປະຕິບັດໜ້າທີ່ອັນມີກຽດນີ້ ດ້ວຍຄວາມຫ້າວຫັນ ແລະມີຜົນສໍາເລັດເປັນຢ່າງດີ ແນ່ໃສ່ປະກອບສ່ວນເຂົ້າໃນການເສີມຂະຫຍາຍສາຍພົວພັນຮ່ວມມືສອງຝ່າຍ ລາວ ແລະ ຕວັກກີ ໃຫ້ນັບມື້ນັບເພີ່ມທະວີ.
ໃນຕອນທ້າຍ, ທ່ານ Nihat OZPINAR ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະພິທີມອບ-ຮັບສານແຕ່ງຕັ້ງຢ່າງເປັນທາງການໃນຄັ້ງນີ້, ຊຶ່ງຕົນເອງຮູ້ສຶກເປັນກຽດຢ່າງສູງທີ່ໄດ້ຮັບຄວາມເຊື່ອໝັ້ນ ແລະໄວ້ວາງໃຈຈາກລັດຖະບານ ແຫ່ງ ສປປ ລາວ ເປັນກົງສຸນກິດຕິມະສັກ ແຫ່ງ ສປປ ລາວ ປະຈໍາ ຕວັກກີ ແລະ ຢືນຢັນວ່າ: ຈະປະຕິບັດ ໜ້າທີ່ອັນຊົງກຽດນີ້ດ້ວຍຄວາມຮັບຜິດຊອບສຸງ ກໍຄືປະສານສົມທົບແໜ້ນກັບພາກສ່ວນກ່ຽວຂ້ອງຂອງ ສປປ ລາວ ແລະຕວັກກີ ລວມທັງສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາຕວັກກີ ທີ່ມີສໍານັກງານຕັ້ງຢູ່ ເຊີແນວ, ສະວິດເຊີແລນ, ເພື່ອໃຫ້ປະສົບຜົນສໍາເລັດຈົບງາມ.
ພິທີເປີດຫ້ອງການກົງສຸນກິດຕິມະສັກ ແຫ່ງ ສປປ ລາວ ປະຈໍາຕວັກກີ ທີ່ນະຄອນຫລວງອັງກາຣາ ຢ່າງເປັນທາງການ ຈະຈັດຂຶ້່ນໃນໄວໆນີ້.
ຂ່າວ; ພາບ: ກົມການຂ່າວ ກະຊວງການຕ່າງປະເທດ
Loading...