ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ ໄດ້ຈັດງານລ້ຽງສົ່ງທ້າຍປີເກົ່າຕ້ອນຮັບປີໃໝ່ຂອງຫວຽດນາມ (ບຸນເຕັດ) ຈັດຂຶ້ນທີ່ນະຄອນຫຼວງວຽງຈັນ ໃນຕອນຄໍ່າວັນ 2 ກຸມພານີ້ ໂດຍມີ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງ ກັນປະເທດແຫ່ງ ສປປ ລາວ ພ້ອມດ້ວຍບັນດາສະຫາຍການນໍາພັກ, ລັດ, ສະພາແຫ່ງຊາດ, ລັດຖະບານ, ແນວລາວສ້າງຊາດ, ບັນດາກະຊວງ, ຂະແໜງການ, ການຈັດຕັ້ງ ແລະ ບາງທ້ອງຖິ່ນຂອງ ສປປ ລາວ ແລະ ບັນດາທ່ານແຂກທີ່ມີກຽດ ລາວ ແລະ ຫວຽດນາມ ເຂົ້າຮ່ວມ.
ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໄດ້ກ່າວວ່າ: ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດລາວ ເຄີຍກ່າວວ່າ: “ລະຫວ່າງລາວ ແລະ ຫວຽດນາມ ມີ 4 ຄໍາ ແຫ່ງນ້ຳໃຈ: ນໍ້າໃຈຖານອ້າຍນ້ອງ-ນໍ້າໃຈຖານສະຫາຍ-ນໍ້າໃຈຖານເພື່ອນມິດ-ນໍ້າໃຈຄວາມສາມັກຄີ”. ດ້ວຍ 4 ນໍ້າໃຈອັນສູງສົ່ງນັ້ນ, ປະຊາຊົນສອງປະເທດຫວຽດນາມ ແລະ ລາວ ໄດ້ສະໜິດຕິດພັນ, ຄຽງບ່າຄຽງໄຫຼ່, ຮ່ວມສຸກຮ່ວມທຸກ, ເຂົ້າເມັດຫັກ ຜັກເສັ້ນດຽວກໍບິແບ່ງກັນ ເພື່ອໃຫ້ຍາດໄດ້ເອກະລາດ, ເສລີພາບ, ຄວາມເປັນເອກະພາບມາສູ່ປະເທດຊາດ ແລະ ໃນປັດຈຸບັນ, ສອງປະເທດກໍພວມສືບຕໍ່ຊ່ວຍເຫຼືອຊຶ່ງກັນ ແລະ ກັນ ຢ່າງມິດຈິດມິດໃຈໃນພາລະກິດປົກປັກຮັກສາ ແລະ ສ້າງສາປະເທດຊາດຂອງແຕ່ລະປະເທດ. ໂດຍຄຳທີ່ວ່າ: ນໍ້າໃຈດັ່ງກ່າວ, ເມື່ອຮອດຍາມປີໃໝ່ຂອງແຕ່ລະປະເທດ ບໍ່ວ່າຈະເປັນລະດູບານໃໝ່ຂອງປະເທດຫວຽດນາມ, ກໍຄືໃນຍາມບຸນປີໃໝ່ຂອງລາວ, ສອງປະເທດພວກເຮົາລ້ວນແລ້ວແຕ່ມີການແລກປ່ຽນ, ສົ່ງຄຳອວຍ ພອນໄຊອັນປະເສີດອັນດູດດື່ມຊຶ່ງກັນ ແລະ ກັນ. ພ້ອມທັງຖືບຸນປີໃໝ່ຂອງເພື່ອນກໍປຽບເໝືອນບຸນປີໃໝ່ຂອງຕົນ, ມີຂະບວນລົດຫຼາຍຖ້ຽວໄດ້ຂົນສົ່ງຂອງຂວັນປີໃໝ່ທີ່ເປັນອາຫານພື້ນບ້ານເຊັ່ນ: ເຂົ້າສານ, ໜໍ່ໄມ້ແຫ້ງ, ເສັ້ນລ້ອນ, ຊາ, ເຂົ້າຕົ້ມ, ເຄື່ອງດື່ມເພື່ອມອບໃຫ້ກັນ ແລະ ກັນ, ໃນເບື້ອງຫຼັງຂອງ ຂອງຂວັນທີ່ແສນລຽບງ່າຍ ແລະ ທຳມະດານັ້ນ ແຕ່ມັນເຕັມໄປດ້ວຍຄວາມຮັກແພງຖານອ້າຍນ້ອງໃນຄອບຄົວດຽວ. ກໍຄືດັ່ງ 4 ຄຳວ່າ: ນໍ້າໃຈກ່າວມາຂ້າງເທິງ, ໃນໂອກາດບຸນປີໃໝ່ ແຕ່ລະປີ, ສະຖານທູດຫວຽດນາມ ແລະ ກົງສຸນໃຫຍ່ຫວຽດນາມປະຈໍາລາວ 3 ແຫ່ງ ໄດ້ຈັດງານລ້ຽງສົ່ງທ້າຍປີເກົ່າຕ້ອນຮັບປີໃໝ່ ໃຫ້ແກ່ເພື່ອນມິດສະຫາຍອ້າຍນ້ອງລາວທີ່ສະໜິດສະໜົມທີ່ສຸດ.
ໃນປີ 2023 ສອງປະເທດພວກເຮົາ ໄດ້ສືບຕໍ່ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍປະການ ແລະ ລ້ວນແຕ່ຍາດໄດ້ຜົນສຳເລັດອັນສຳຄັນ ເຊັ່ນ: ການເມືອງ, ສັງຄົມມີຄວາມໝັ້ນຄົງ; ປ້ອງກັນຊາດ, ປ້ອງກັນຄວາມສະຫງົບ ຮັກສາໄດ້ຢ່າງໜັກແໜ້ນ; ເສດຖະກິດສືບຕໍ່ຂະຫຍາຍຕົວດ້ວຍຈັງຫວະສູງພໍສົມຄວນ; ຖານະ ແລະ ອິດທິພົນຂອງຫວຽດນາມ ແລະ ລາວ ໃນເວທີພາກພື້ນ ແລະ ສາກົນ ໄດ້ຮັບການປັບປຸງ ແລະ ຍົກສູງຂຶ້ນຢ່າງບໍ່ຢຸດຢັ້ງ. ສືບຕໍ່ຜົນສຳເລັດຂອງປີສາມັກຄີມິດຕະພາບຫວຽດນາມ-ລາວ, ລາວ-ຫວຽດນາມ ປີ 2022, ສາຍພົວພັນລະຫວ່າງສອງປະເທດພວກເຮົາໃນປີ 2023 ສືບຕໍ່ໄດ້ຮັບການເສີມຂະຫຍາຍ ແລະ ພັດທະນາຢ່າງບໍ່ຢຸດຢັ້ງ, ປະກອບສ່ວນຕັ້ງໜ້າເຂົ້າໃນພາລະກິດແຫ່ງສັນຕິພາບ, ເອກະລາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມໃນໂລກ.
ທ່ານທູດຍັງກ່າວວ່າ: ເສີມຂະຫຍາຍບັນດາຜົນສຳເລັດບັນລຸໄດ້ໃນປີຜ່ານມາ, ພວກເຮົາຫວັງຢ່າງຍິ່ງ ແລະ ເຊື່ອໝັ້ນວ່າ, ປີມັງກອນ 2024 ຈະເປັນປີທີ່ດິນຟ້າອາກາດເອື້ອອໍານວຍຄວາມສະດວກຕໍ່ມວນມະນຸດເວົ້າລວມ, ເວົ້າສະເພາະຕໍ່ສອງປະເທດຫວຽດນາມ-ລາວ; ເປັນປີທີ່ຈະນໍາເອົາແຫຼ່ງພະລັງງານອັນສົດຊື່ນໃໝ່ ແລະ ໂຊກລາບອັນປະເສີດມາສູ່ສອງປະເທດຂອງພວກເຮົາ, ພິເສດແມ່ນ ສປປ ລາວ ຈະບັນລຸໄດ້ຜົນສຳເລັດສະຫງ່າ ໃນການເຮັດໜ້າທີ່ເປັນປະທານໝູນວຽນ ອາຊຽນ ປີ 2024 ແລະ ສອງຊາດ ລາວ-ຫວຽດນາມ ຈະສືບຕໍ່ຈັບມືກັນຢ່າງແໜ້ນແຟ້ນ, ມີບັນດາບາດກ້າວອັນໃໝ່ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຂອງແຕ່ລະປະເທດ; ສາຍພົວພັນພິເສດ, ບໍລິສຸດຜຸດຜ່ອງ, ຫາຍາກໃນສາຍພົວພັນສາກົນ ຫວຽດນາມ-ລາວ ຈະໄດ້ຮັບການເສີມຂະຫາຍ ແລະ ພັດທະນາຂຶ້ນສູ່ລະດັບໃໝ່.
ຈາກນັ້ນ, ທ່ານ ພົນເອກ ຈັນສະໝອນ ຈັນຍາລາດ ໄດ້ຂຶ້ນກ່າວອວຍພອນ ແລະ ກໍໄດ້ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ການຮ່ວມມືຍຸດທະສາດຮອບດ້ານ-ໝັ້ນຄົງ ແລະຄວາມສາມັກຄີພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ນັບມື້ໄດ້ຮັບການພັດທະນາຢ່າງບໍ່ຢຸດຢັ້ງ; ພ້ອມກັນນີ້, ກໍໄດ້ກ່າວສະແດງຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າຕະຫຼອດໄລຍະຜ່ານມາ ພາຍໃຕ້ການນໍາພາອັນປີຊາສາມາດ, ສະຫຼາດຄ່ອງແຄ້ວ ກໍຄືການບໍລິຫານ ແລະ ການເປັນຈິດໜຶ່ງໃຈດຽວຂອງຫວຽດນາມ ເຮັດໃຫ້ສາມາດຍາດໄດ້ຜົນສຳເລັດອັນຍິ່ງໃຫຍ່ ໂດຍສະເພາະຮັບປະກັນໃຫ້ປະເທດຊາດ ມີສະຖຽນລະພາບດ້ານການເມືອງ, ສັງຄົມມີຄວາມສະຫງົບ, ເສດຖະກິດເຕີບໃຫຍ່ຂະຫຍາຍຕົວໃນລະດັບສູງ, ຊີວິດການເປັນຢູ່ຂອງປະຊາຊົນຫວຽດນາມອ້າຍນ້ອງ ໄດ້ຮັບການຍົກສູງ, ບົດບາດ ແລະ ອິດທິພົນຂອງຫວຽດນາມຢູ່ໃນເວທີ່ພາກພື້ນ ແລະ ສາກົນ ໄດ້ມື້ນັບຖືກຍົກສູງ.
(ຂ່າວ-ພາບ: ສຸກສະຫວັນ)
