ທ່ານ ນາງ ມໍຣະກົດ ສີສະຫວັດ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ພ້ອມຄະນະ ເຂົ້າພົບປະທ່ານ ທອງຈັນ ມະນີໄຊ ເຈົ້າແຂວງໆບໍ່ແກ້ວ ໃນວັນທີ 5 ສິງຫາ 2024 ເນື່ອງໃນໂອກາດມາຢ້ຽມຢາມ ແຂວງບໍ່ແກ້ວ.
ທ່ານ ທອງຈັນ ມະນີໄຊ ໄດ້ກ່າວວ່າ: ແຂວງບໍ່ແກ້ວ ຍັງເປັນແຂວງທີ່ມີຄວາມຫຍຸ້ງຍາກທາງດ້ານພື້ນຖານໂຄງລ່າງ ຈາກແຂວງຫາເມືອງ ແລະ ຈາກເມືອງຫາບ້ານ, ໄລຍະຜ່ານມາ ແຂວງບໍ່ແກ້ວ ໄດ້ມີຄວາມຮ່ວມມືກັບຣາຊະອານາຈັກໄທ ໂດຍສະເພາະ ການສະກັດກັ້ນຕ້ານຢາເສບຕິດ, ການຄ້າຂາຍເຖື່ອນຕາມຊາຍແດນ ແລະ ສະກັດກັ້ນຕ້ານການຄ້າມະນຸດ ພ້ອມນັ້ນ, ຍັງໄດ້ມີການຮ່ວມມືແລກປ່ຽນບົດຮຽນດ້ານສາທາລະນະສຸກ, ກະສິກໍາ, ແຮງ ງານ ແລະ ສິລະປະວັນນະຄະດີ, ການສະກັດກັ້ນໄຟລາມປ່າ ພ້ອມ ທັງໄດ້ສະເໝີໃຫ້ທ່ານ ເອກອັກຄະຣາຊະທູດ ແຫ່ງຣາຊະອານາຈັກໄທ ໃຫ້ຊ່ວຍດຶງດູດນັກລົງທຶນຂອງໄທ ມາລົງທຶນຢູ່ແຂວງບໍ່ ແກ້ວ ໃຫ້ຫລາຍຂຶ້ນ ໂດຍສະເພາະ ດ້ານກະສິກໍາ, ການທ່ອງທ່ຽວ ແລະ ສົ່ງເສີມການພັດທະນາບຸກຄະລາກອນ ດ້ານສາທາລະນະ ສຸກ, ກະສິກໍາ ແລະ ແຮງງານ.
ໂອກາດນີ້, ທ່ານ ທອງຈັນ ມະນີໄຊ ກໍໄດ້ສະແດງຄວາມຂອບ ໃຈມາຍັງເຈົ້າໜ້າທີ່ໄທ ທີ່ໃຫ້ການຮ່ວມມື, ຊ່ວຍເຫລືອໃນການຕິດ ຕາມພະພຸດທະຮູບ ທີ່ໄດ້ລັກລອບຈາກເມືອງຕົ້ນເຜິ້ງ ໄລຍະນີ້ຢູ່ໃນໄລຍະປະສານງານ ລະຫວ່າງສະຖານທູດລາວ ແລະ ສະຖານ ທູດໄທ ເພື່ອນໍາເອົາພະພຸດທະຮູບດັ່ງກ່າວຄືນມາ.
ໂອກາດນີ້, ທ່ານ ນາງ ມໍຣະກົດ ສີສະຫວັດ ໄດ້ສະເໜີຕໍ່ເຈົ້າແຂວງ ກ່ຽວກັບການຮ່ວມມື ລະຫວ່າງ 2 ປະເທດ ຕໍ່ວຽກ ງານຕ້ານການຄ້າມະນຸດ, ຢາເສບຕິດ, ການລັກລອບເຂົ້າເມືອງແບບຜິດກົດໝາຍ, ແກ້ງຄໍເຊັນເຕີ ແລະ ຕ້ານອາຊະຍະກໍາຂ້າມຊາດ ໃຫ້ມີຄວາມແໜ້ນແຟ້ນຍິ່ງຂຶ້ນ ພ້ອມທັງສະແດງຄວາມ ຂອບໃຈມາຍັງເຈົ້າໜ້າທີ່ລາວ ທີ່ໃຫ້ການຊ່ວຍເຫລືອຄົນໄທ ທີ່ຖືກຕົວະຍົວະກັບຄືນປະເທດ ດ້ວຍຄວາມປອດໄພ.
ຂ່າວ: ຄໍາເພັງ ສີສະຫວ່າງ
