ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ທູຕານຸທູດ-ອົງການຈັດຕັ້ງສາກົນ ເຂົ້າອວຍພອນ ການນໍາຂັ້ນສູງພັກ-ລັດໂອກາດວັນຊາດທີ 2 ທັນວາ

ໃນວັນທີ 29 ພະຈິກ 2019 ຢູ່ທໍານຽບປະທານປະເທດ ບັນດາທູຕານຸທູດແລະຜູ້ຕາງໜ້າອົງການຈັດຕັ້ງສາກົນປະຈໍາລາວໄດ້ເຂົ້າອວຍພອນ ທ່ານ ບຸນຍັງ ວໍລະຈິດ ປະທານປະເທດ ພ້ອມພັນລະ ຍາ ແລະ ການນໍາຂັ້ນສູງພັກ-ລັດ ເນື່ອງໃນໂອກາດວັນສະຖາປານາສປປ ລາວ 2 ທັນວາ ຄົບຮອບ 44 ປີ (2/12/1975-2/12/ 2019) ແລະ ປີໃໝ່ສາກົນ 2020 ທີ່ຈະມາເຖິງນີ້. ທ່ານ BELINDA M.ANTE ເອກອັກຄະລັດຖະທູດແຫ່ງສາທາ ລະນະລັດຟີລິບປິນ ປະຈໍາລາວ ທູດອາວຸໂສຕາງໜ້າໃຫ້ທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນປະຈໍາລາວໄດ້ຂຶ້ນກ່າວສະແດງຄວາມຊົມເຊີຍຕໍ່ຜົນສໍາເລັດທີ່ປະເທດຊາດຍາດມາໄດ້ຕະຫຼອດໄລຍະ 44 ປີຜ່ານມາ ເສດຖະກິດຂອງລາວຄາດວ່າຈະໄດ້ຮັບການຟື້ນຟູ ເຖິງວ່າຈະຍັງສືບຕໍ່ມາດຕະຖານຮັດກຸມທາງດ້ານງົບປະມານ ແລະ ຄວາມຜັນຜວນຂອງເສດຖະກິດໂລກ ທະ ນາຄານໂລກໄດ້ລາຍງານໃນຕົ້ນປີນີ້ວ່າ: ລາວເປັນໜຶ່ງໃນບັນດາປະເທດທີ່ມີເສດຖະກິດຂະຫຍາຍຕົວໄວສູງສຸດໃນອາຊີຕາເວັນອອກ ແລະ ປາຊີຟິກ ແລະ ໃນຊຸມປີຜ່ານມາຍັງມີຄວາມກ້າວໜ້າ ໂດຍສະເພາະການລົບລ້າງຄວາມທຸກຍາກໃຫ້ໝົດໄປກວ່າເຄິ່ງໜຶ່ງ ການຫຼຸດຜ່ອນຄວາມອຶດຫິວ ແລະ ກໍາລັງປັບປຸງປະສິດທິ ພາບທາງດ້ານການສຶກສາ ແລະ ສາທາລະນະສຸກທົ່ວປະເທດ. ໂອກາດດັ່ງກ່າວ ທ່ານ ບຸນຍັງ ວໍລະຈິດ ໄດ້ສະແດງຄວາມຂອບ ໃຈ ແລະ ຕີລາຄາສູງຕໍ່ຄໍາອວຍພອນອັນປະເສີດຂອງທ່ານທູດອາວຸໂສເຊິ່ງສະແດງເຖິງໄມຕີຈິດມິດຕະພາບແລະການຮ່ວມມືທີ່ດີລະຫວ່າງປະເທດ ແລະ ອົງການຈັດຕັ້ງຕ່າງໆກັບລາວເປັນການໃຫ້ກໍາລັງໃຈອັນໃຫຍ່ຫຼວງແກ່ປະຊາຊົນລາວບັນດາເຜົ່າໃນພາລະ ກິດປົກປັກຮັກສາແລະສ້າງສາບ້ານເມືອງຕະຫຼອດໄລຍະ 44 ປີຜ່ານມາ ເຊິ່ງປີ 2019 ເປັນປີທີ່ພັກ-ລັດ ແລະ ປະຊາຊົນລາວທັງຊາດໄດ້ສືບຕໍ່ເອົາໃຈໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຢ່າງຕັ້ງໜ້າ ໂດຍໄດ້ຮັບຜົນສໍາເລັດຕົວຈິງທີ່ເປັນໜ້າເພິ່ງພໍ ໃຈໃນຫຼາຍດ້ານເປັນຕົ້ນຍັງສາມາດຮັກສາໄດ້ສະຖຽນລະພາບທາງດ້ານການເມືອງ ແລະ ເສດຖະກິດມະຫາພາກ ໄດ້ຢ່າງໝັ້ນທ່ຽງ ວຽກງານດ້ານການສຶກສາ ສາທາລະນະສຸກ ວັດທະນະທໍາ-ສັງຄົມ ກໍໄດ້ຮັບການເອົາໃນໃສ່ປັບປຸງແກ້ໄຂໃຫ້ມີຄຸນນະ ພາບດີຂຶ້ນຢ່າງຕໍ່ເນື່ອງ.

ຂ່າວ;ພາບ: ໜັງສືພິມ ວຽງຈັນໃໝ່