ພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ຈັດພິທີເປີດທົດລອງບໍລິການຂົນສົ່ງໂດຍສານບໍ່ເສຍຄ່າບໍລິການພາຍໃນເທດສະບານ ແຂວງໄຊສົມບູນ ໃນຕອນເຊົ້າຂອງວັນທີ 14 ພຶດສະພາ 2024 ຢູ່ທີ່ເດີ່ນພະແນກຂອງຕົນ ໃຫ້ກຽດເຂົ້າຮ່ວມໂດຍທ່ານ ຄຳພຸດ ແກ້ວວົງພອນ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງໄຊສົມບູນ.
ທ່ານ ຄຳພຸດ ແກ້ວວົງພອນ ໄດ້ໃຫ້ຮູ້ວ່າ: ລົດເມຂະໜາດນ້ອຍ ທີ່ມາຮັບໃຊ້ການບໍລິການ ຈຳນວນ 20 ຄັນ ແມ່ນໄດ້ຮັບການ ຊ່ວຍເຫລືອລ້າ ຈາກບໍລິສັດບູຢອງລາວ ຈຳກັດ ແລະ ກົມຂົນສົ່ງ ກະຊວງໂຍທາທິການ ແລະ ຂົນສົ່ງ ໄດ້ຈັດສັນ, ແບ່ງປັນ ໃຫ້ແຂວງໄຊສົມບູນ ກໍຄືພະແນກໂຍທາທິການ ແລະ ຂົນສົ່ງແຂວງ ເປັນຜູ້ນຳໃຊ້ ແລະ ຄຸ້ມຄອງ, ທັງນີ້ກໍເພື່ອໄປນຳໃຊ້ເຂົ້າໃນການພັດທະນາລະບົບການຂົນສົ່ງ ສາທາລະນະຂອງແຂວງ ແລະ ເມືອງ ເພື່ອອຳນວຍຄວາມສະດວກສະບາຍໃຫ້ແກ່ປະຊາຊົນ, ນັກຮຽນນັກສຶກສາ ໃນການໄປມາຫາສູ່, ນັກທ່ອງທ່ຽວ ເດີນທາງສະດວກສະບາຍ, ຫລຸດຜ່ອນການນຳໃຊ້ລົດສ່ວນຕົວ, ປະຢັດພະລັງງານເຊື້ອໄຟ ແລະ ແກ້ໄຂການສັນຈອນແອອັດ ໃຫ້ມີຄວາມສະດວກ ແລະ ວ່ອງໄວ, ພ້ອມທັງບໍລິການຂົນສົ່ງຢູ່ພາຍໃນແຂວງ ແລະ ເມືອງ.
ລົດເມດັ່ງກ່າວຈະທົດລອງຂົນສົ່ງສາທາລະນະ, ບໍລິການບໍ່ເສຍຄ່າໃນເຂດເທດສະບານແຂວງ, ບ້ານອອມ, ບ້ານອ່າວ, ບ້ານນໍ້າໂມ້ ແລະ ບ້ານນໍ້າຍອນ ເປັນເວລາ 2 ວັນຄື: ວັນອັງຄານ ແລະ ວັນພະຫັດ. ພ້ອມດຽວກັນນັ້ນ ພະແນກໂຍທາທິການ ແລະ ຂົນສົ່ງແຂວງ ຍັງໄດ້ສະເໜີທ່ານເຈົ້າແຂວງ ພິຈາລະນາ ມີທິດຊີ້ນຳໃນການຈັດສັນ ແລະ ແບ່ງປັນ ໃຫ້ບັນດາພະແນກການ ທີ່ມີຄວາມຈຳເປັນ ແລະ ຂາດເຂີນຍານພາຫະນະຮັບໃຊ້ ຕາມຄວາມເໝາະ ສົມ, ຖືກເປົ້າໝາຍທີ່ຈະນຳໃຊ້ຕົວຈິງ ແລະ ເອົາໃຈໃສ່ການຄຸ້ມຄອງນຳໃຊ້ໃຫ້ມີປະສິດທິຜົນ ແລະ ເກີດປະໂຫຍດສູງສຸດ.
ພາບ-ຂ່າວ: ສີລິພອນ ສົງຄຳ
