ໃນວັນທີ 21 ມິຖຸນາ 2024 ສູນກາງສະຫະພັນກຳມະບານລາວ ຮ່ວມກັບ ອົງການອາຟີດາ ປະຈຳ ສປປ ລາວ ໄດ້ຈັດກອງປະຊຸມກຳມະບານກະຊວງ ເພື່ອສ້າງແຜນປະຕິບັດງານວຽກງານທາດໄຍຫີນ ຂຶ້ນຢູ່ທີ່ໂຮງແຮມນິວໂຣດ ນະຄອນຫຼວງວຽງຈັນ ມີ ທ່ານ ຄຳຈັນ ສີວັນທອງ ຮອງຫົວໜ້າກົມປົກປ້ອງແຮງງານ ສູນກາງສະຫະພັນກຳມະບານລາວ, ທ່ານ ນາງ ວິລະດາ ພົມດວງສີ ຫົວໜ້າອົງການອາຟີດາປະຈຳ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ເຊິ່ງກອງປະຊຸມຈັດຂຶ້ນແບບເຊິ່ງໜ້າ ແລະ ແບບອອນລາຍ.
ຈຸດປະສົງຂອງກອງປະຊຸມແມ່ນຮັບຟັງການລາຍງານທົບທວນຄືນ ການປະຕິບັດແຜນຍຸດທະສາດການປ້ອງກັນພະຍາດ ທີ່ພົວພັນກັບທາດໄຍຫີນ ເຊິ່ງໄລຍະຜ່ານມາສູນກາງສະຫະພັນກຳມະບານລາວ ໄດ້ຮ່ວມກັບອົງການອາຟີດາ ແລະ ບັນດາສະຫະພັນກຳມະບານແຂວງ ແລະ ເມືອງ ໃນການລົງໂຄສະນາເຜີຍແຜ່ຄວາມຮູ້ກ່ຽວກັບວິທີປ້ອງກັນ ແລະ ຜົນຮ້າຍຂອງທາດໄຍຫີນ ພ້ອມທັງໄດ້ຈັດຝຶກອົບຮົມໃຫ້ແກ່ຄະນະຮັບຜິດຊອບໃຫ້ຮັບຮູ້ ແລະ ເຂົ້າໃຈ ເພື່ອນຳໄປເຜີຍແຜ່ໃຫ້ແກ່ບັນດາກຸ່ມເປົ້າໝາຍ ໃນຂົງເຂດຄວາມຮັບຜິດຊອບຂອງຕົນ.
ຈາກນັ້ນ, ຍັງໄດ້ຮັບຟັງບົດຮຽນຂອງບາງປະເທດກ່ຽວກັບການຢຸດນໍາໃຊ້ທາດໄຍຫີນ ໃນປີ 2025 ແລະ ຄໍາແນະນໍາຂອງອົງການສະຫະປະຊາຊາດ ຕໍ່ການນໍາໃຊ້ທາດໄຍຫີນ, ຮັບຟັງບູລິມາສິດວຽກງານ ແລະ ແບ່ງວຽກງານໃຫ້ກະຊວງ, ອົງການທີ່ກ່ຽວຂ້ອງໃຫ້ແຕ່ລະພາກສ່ວນ ພ້ອມທັງຮ່ວມກັນປຶກສາຫາລືຄວາມເປັນໄປໄດ້ ສະເໜີຕໍ່ພາກສ່ວນທີ່ກ່ຽວຂ້ອງ ໃນການຫຼຸດຜ່ອນການນໍາເຂົ້າທາດໄຍຫີນ ແລະ ວັດສະດຸທີ່ມາທົດແທນທາດໄຍຫີນ ໃນອະນາຄົດ.
