ກອງປະຊຸມປຶກສາຫາລື ກ່ຽວກັບການຈັດສົ່ງແຮງງານລາວ ໄປເຮັດວຽກຕາມລະດູການ ຢູ່ ສ ເກົາຫລີ ຈັດຂຶ້ນໃນວັນທີ 17 ມິຖຸນາ 2024 ໂດຍການເປັນປະທານຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ມີຫົວໜ້າກົມ-ຮອງກົມ ແລະ ພາກສ່ວນກ່ຽວຂ້ອງເຂົ້າຮ່ວມ ເພື່ອທົບທວນຄືນການຈັດຕັ້ງປະຕິບັດວຽກງານການຈັດສົ່ງແຮງງານລາວ ໄປເຮັດວຽກຕາມລະດູການທີ່ ສ ເກົາຫລີ ໃນໄລຍະຜ່ານມາ, ບັນດາຂໍ້ສະດວກ, ຂໍ້ຫຍຸ້ງຍາກ, ບັນຫາຂໍ້ຄົງຄ້າງ, ຂໍ້ສະເໜີ ແລະ ທິດທາງໃນການຈັດຕັ້ງປະຕິບັດຕໍ່ໜ້າ.
ທ່ານ ນາງ ໃບຄຳ ຂັດທິຍະ ໄດ້ມີຄຳເຫັນວ່າ: ວຽກຈັດສົ່ງແຮງງານລາວ ໄປເຮັດວຽກຢູ່ຕ່າງປະເທດ ເປັນວຽກງານໜຶ່ງທີ່ນອນຢູ່ໃນແຜນພັດທະນາວຽກງານແຮງງານ ແລະ ສະຫວັດດີການສັງຄົມ 5 ປີ ຄັ້ງທີ 5 (2021-2025) ເພື່ອສົ່ງເສີມໃຫ້ຜູ້ອອກແຮງງານລາວ ມີວຽກເຮັດງານທຳ, ສ້າງລາຍຮັບ, ພັດທະນາຄວາມຮູ້ຄວາມສາມາດ ແລະ ສີມືແຮງງານຢູ່ຕ່າງປະເທດ. ສໍາລັບການຈັດສົ່ງແຮງງານລາວ ໄປເຮັດວຽກຕາມລະດູການ ຢູ່ ສ ເກົາຫລີ ໄດ້ເລີ່ມແຕ່ປີ 2022 ຈົນເຖິງປັດຈຸບັນ, ສາມາດຈັດສົ່ງແຮງງານລາວ ໄປເຮັດວຽກໃນ 2 ລະບົບ ໄດ້ທັງໝົດ 7.551 ເທື່ອຄົນ, ຍິງ 1.962 ເທື່ອຄົນ. ຜ່ານການຮັບຟັງການລາຍງານການຈັດຕັ້ງປະຕິບັດວຽກງານດັ່ງກ່າວ ໄລຍະຜ່ານມາ ຍັງເຫັນວ່າ ມີຫລາຍດ້ານທີ່ບໍ່ສາມາດປະຕິບັດໄດ້ຢ່າງມີປະສິດທິຜົນ ເປັນຕົ້ນ ຄຸນນະພາບຂອງແຮງງານທີ່ຈັດສົ່ງ, ການປະສານງານ ຢູ່ພາຍໃນ ແລະ ກັບຄູ່ຮ່ວມງານຢູ່ປະເທດປາຍທາງ, ການຕິດຕາມ ແລະ ໃຫ້ການຊ່ວຍເຫລືອຜູ້ອອກແຮງງານ ແລະ ການລາຍງານຍັງບໍ່ເປັນລະບົບ.
ທ່ານ ນາງ ໃບຄຳ ຂັດທິຍະ ຍັງໃຫ້ຮູ້ອີກວ່າ: ການສົ່ງຜູ້ອອກແຮງງານລາວ ໄປເຮັດວຽກຢູ່ຕ່າງປະເທດ ຕ້ອງຮັບປະກັນແຮງງານທີ່ມີຄຸນນະພາບ ໂດຍຜ່ານການຝຶກອົບຮົມ ແລະ ອອກໃບຢັ້ງຢືນການທົດສອບສີມື ເພື່ອໃຫ້ສາມາດສ້າງມູນຄ່າເພີ່ມ, ຮັບປະກັນທາງດ້ານລາຍຮັບໃຫ້ສູງ ແລະ ແຮງງານໄດ້ຮັບການປົກປ້ອງສິດ ແລະ ຜົນປະໂຫຍດໂດຍຊອບທຳ ເພື່ອເຮັດໃຫ້ການຈັດສົ່ງຜູ້ອອກແຮງງານລາວ ໄປເຮັດວຽກຢູ່ຕ່າງປະເທດ ມີຜົນກະທົບໜ້ອຍທີ່ສຸດຕໍ່ກັບຄວາມຕ້ອງການນຳໃຊ້ແຮງງານ ຂອງບັນດາຫົວໜ່ວຍແຮງງານ ຢູ່ຕາມຂະແໜງການຕ່າງໆ ໃຫ້ສາມາດຕອບສະໜອງກັບການສົ່ງເສີມການລົງທຶນ ຂອງນັກລົງທຶນພາຍໃນ ແລະ ນັກລົງທຶນຈາກຕ່າງປະເທດ.
ທີ່ມາ: ຂປລ
