ກອງປະຊຸມທົບທວນຄືນການຈັດຕັ້ງປະຕິບັດວຽກງານທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ໃຫ້ປະຊາຊົນ ທີ່ຖືກຜົນກະທົບຈາກການກໍ່ສ້າງໄຟຟ້າພະລັງງານລົມ ຈັດຂຶ້ນໃນວັນທີ 13 ສິງຫານີ້, ທີ່ໂຄງການມອນຊູນວິນພາວເວີ ເມືອງດາກຈຶງ ໂດຍການເຂົ້າຮ່ວມຂອງທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີຄະນະຊີ້ນໍາໂຄງການ, ຄະນະກໍາມະການທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ຂອງປະຊາຊົນ, ບໍລິສັດຜູ້ພັດທະນາ, ບໍລິສັດຜູ້ຮັບເໝົາກໍ່ສ້າງໂຄງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ, ກອງເລຂາຄະນະກໍາມະການທົດແທນຄ່າເສຍຫາຍ ແລະ ຟື້ນຟູຊີວິດການເປັນຢູ່ຂອງປະຊາຊົນ ໄດ້ໃຫ້ຮູ້ວ່າ: ໂຄງການໄຟຟ້າພະລັງງານລົມ ມອນຊູນ ຕັ້ງຢູ່ເມືອງດາກຈຶງ ແຂວງເຊກອງ ແລະ ເມືອງຊານໄຊ ແຂວງອັດຕະປື ມີ 133 ເສົາ, ມີກໍາລັງຕິດຕັ້ງທັງໝົດ 600 ເມກາວັດ ໃນນີ້, ຕັ້ງຢູ່ເມືອງດາກຈຶງ 110 ເສົາ ແລະ ຕັ້ງຢູ່ເມືອງຊານໄຊ ແຂວງອັດຕະປື 23 ເສົາ, ປັດຈຸບັນການກໍ່ສ້າງສໍາເລັດແລ້ວ 81,71%. ໂຄງການດັ່ງກ່າວ ມີຜົນກະທົບທັງໝົດ 26 ບ້ານ 807 ຄົວເຮືອນ ໃນນັ້ນ, ເມືອງດາກຈຶງ 21 ບ້ານ ແລະ ເມືອງຊານໄຊ 5 ບ້ານ ຊຶ່ງການປະຕິບັດວຽກງານທົດແທນຄ່າເສຍຫາຍ ຫຼື ການຊົດເຊີຍຜົນກະທົບ ແມ່ນໄດ້ປະຕິບັດຕາມລະບຽບການຕ່າງໆຂອງພັກ-ລັດຖະບານ ແລະ ໄດ້ແບ່ງອອກເປັນ 3 ໄລຍະ ຄື: ໄລຍະທີ I ທົດແທນຜົນກະທົບຈຸດຕັ້ງເສົາກັງຫັນລົມ ແລະ ທາງເຂົ້າຫາເສົາກັງຫັນລົມ, ທາງເຊື່ອມຕໍ່ລະຫວ່າງເສົາ, ມີບ້ານໄດ້ຮັບຜົນກະທົບ 11 ບ້ານ 209 ຄົວເຮືອນ ລວມມູນຄ່າຊົດເຊີຍ 7,59 ຕື້ກວ່າກີບ; ໄລຍະທີ II ທົດແທນຜົນກະທົບຊັບສິນ ເຂດພື້ນທີ່ຕັ້ງເສົາໄຟຟ້າແຮງສູງ 35kV, 115kV ແລະ 500kV, ເສັ້ນທາງເຂົ້າຫາສາຍສົ່ງ, ບ່ອນວາງອຸປະກອນກໍ່ສ້າງ, ການຂະຫຍາຍເສັ້ນທາງຫຼວງແຫ່ງຊາດເລກທີ 16B ມີບ້ານໄດ້ຮັບຜົນກະທົບ 19 ບ້ານ 438 ຄົວເຮືອນ ລວມມູນຄ່າການຊົດເຊີຍ 8,89 ຕື້ກວ່າກີບ ແລະ ໄລຍະທີ III ທົດແທນຄ່າເສຍຫາຍຊັບສິນ ແລະ ທີ່ດິນຂອບເຂດແລວສະຫງວນສາຍສົ່ງໄຟຟ້າແຮງສູງ 115kV ແລະ 500kV ມີບ້ານໄດ້ຮັບຜົນກະທົບ 16 ບ້ານ 340 ຄົວເຮືອນ ລວມມູນຄ່າຊົດເຊີຍ 9,23 ຕື້ກີບ; ລວມທັງ 3 ໄລຍະ ປະຕິບັດການຊົດເຊີຍທັງໝົດ 25,86 ຕື້ກວ່າກີບ.
ທ່ານ ຊາຄິດ ດວງໃຈ ຜູ້ຈັດການດ້ານສັງຄົມ ໂຄງການມອນຊູນວິນພາວເວີ ໃຫ້ຮູ້ວ່າ: ໃນໄລຍະຜ່ານມາ, ໂຄງການໄດ້ເອົາໃຈໃສ່ປະຕິບັດວຽກງານທົດແທນຄ່າເສຍຫາຍ ຫຼື ການຊົດເຊີຍຜົນກະທົບ ຕິດພັນກັບການພັດທະນາຊຸມຊົນໃນ 6 ແຜນງານ ຄື: ແຜນງານການສຶກສາ ແລະ ການສ້າງຂີດຄວາມສາມາດ, ແຜນງານການດູແລສຸຂະພາບ ແລະ ສຸຂາພິບານ, ແຜນງານການພັດທະນາການດໍາລົງຊີວິດ ແລະ ເສດຖະກິດ, ແຜນງານການປັບປຸງພື້ນຖານໂຄງລ່າງ, ແຜນງານການພັດທະນາວັດທະນະທໍາ ແລະ ສັງຄົມ ແລະ ແຜນງານສ້າງຄວາມເຂັ້ມແຂງໃຫ້ຊຸມຊົນ.
ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ມີຄໍາເຫັນແລກປ່ຽນ ແລະ ຊີ້ນໍາໃຫ້ສືບຕໍ່ພັດທະນາໂຄງການ ໃຫ້ໄປຕາມຄາດໝາຍແຜນການທີ່ວາງໄວ້, ຖືກຕ້ອງຕາມເຕັກນິກ ແລະ ຮັບປະກັນຄຸນນະພາບ; ເອົາໃຈໃສ່ຄຸ້ມຄອງການຂົນສົ່ງໃຫ້ມີຄວາມປອດໄພ; ສືບຕໍ່ໂຄສະນາປຸກລະດົມ, ສຶກສາອົບຮົມໃຫ້ປະຊາຊົນຮັບຮູ້-ເຂົ້າໃຈ ແລະ ເຂົ້າຮ່ວມໃນການປະຕິບັດໂຄງການ; ປັບປຸງພື້ນຖານໂຄງລ່າງ, ປົກປັກຮັກສາສິ່ງແວດລ້ອມ, ຮັກສາປ່າໄມ້, ຟື້ນຟູປ່າໄມ້ ແລະ ຊີວະນາໆພັນ ຕາມທິດພັດທະນາສີຂຽວ ແລະ ຍືນຍົງ; ປະຕິບັດພັນທະອາກອນໃຫ້ລັດ, ປະຕິບັດການຈ້າງງານ ແລະ ຊົມໃຊ້ຜະລິດຕະພັນຂອງທ້ອງຖິ່ນໃຫ້ຫຼາຍຂຶ້ນ ແລະ ຕ້ານບັນຫາປະກົດການຫຍໍ້ທໍ້ຕ່າງໆ ໂດຍສະເພາະບັນຫາຢາເສບຕິດ ບໍ່ໃຫ້ເກີດຂຶ້ນໃນກົມກອງຂອງຕົນ; ສ່ວນຂະແໜງການຂອງລັດ ກໍຕ້ອງເອົາໃຈໃສ່ໃນການສ້າງເງື່ອນໄຂ ແລະ ສິ່ງອໍານວຍຄວາມສະດວກ ເພື່ອເຮັດໃຫ້ການປະຕິບັດໂຄງການສໍາເລັດຕາມແຜນການທີ່ວາງໄວ້ ປະກອບສ່ວນພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ສ້າງອາຊີບໃຫ້ປະຊາຊົນ.
ກອງປະຊຸມ, ຍັງໄດ້ປຶກສາຫາລື ກ່ຽວກັບການແກ້ໄຂບັນຫາທີ່ໄດ້ຮັບຜົນກະທົບຜ່ານມາ, ການສະເໜີບາງບັນຫາທີ່ຍັງຄົງຄ້າງ ແລະ ການສືບຕໍ່ຈັດຕັ້ງປະຕິບັດ ທົດແທນຄ່າເສຍຫາຍ ໃຫ້ປະຊາຊົນ ລວມທັງແຜນໃນການແກ້ໄຂ ບັນຫາຄົງຄ້າງ ຂອງຜູ້ພັດທະນາໂຄງການຕື່ມອີກ; ຫຼັງຈາກນັ້ນ, ທ່ານເຈົ້າແຂວງ ພ້ອມຄະນະໄດ້ລົງຕິດຕາມການກໍ່ສ້າງຕິດຕັ້ງເສົາກັງຫັນລົມ ແລະ ການກໍ່ສ້າງສະຖານີສາຍສົ່ງຢູ່ພາກສະໜາມຕົວຈິງຕື່ມອີກ.
ຂ່າວ-ພາບ: ສັນຍາ
