ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທົ່ວປະເທດມີຜູ້ຕິດເຊື້ອພະຍາດໄຂ້ເລືອດອອກ 2.730ຄົນ, ເສຍຊີວິດ8ຄົນ.

ສະເພາະວັນທີ 9 ກໍລະກົດນີ້ ທົ່ວປະເທດມີຜູ້ຕິດເຊື້ອພະຍາດໄຂ້ເລືອດອອກທັງໝົດ 75 ຄົນ ເຮັດໃຫ້ຕົວເລກສະສົມນັບແຕ່ເດືອນມັງກອນເປັນຕົ້ນມາຫລາຍກວ່າ 2.730 ຄົນໃນ 17 ແຂວງ,  ຫຼາຍກວ່າໝູ່ແມ່ນນະຄອນຫຼວງວຽງຈັນສູງເຖິງ 625 ຄົນ, ຖັດມາແມ່ນແຂວງວຽງຈັນ 335 ຄົນ, ບໍລິຄຳໄຊ 339 ຄົນ ແລະ ແຂວງອັດຕະປື 238 ຄົນ ມີຜູ້ເສຍຊີວິດ 8 ຄົນ.

ດຣ ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຮຽກຮ້ອງໃຫ້ທຸກພາກສ່ວນໃນສັງຄົມສືບຕໍ່ເປັນເຈົ້າການປ້ອງກັນ ແລະສະກັດກັ້ນພະຍາດໄຂ້ ເລືອດອອກ ໂດຍຖອດຖອນບົດຮຽນຈາກມາດຕະການປ້ອງກັນພະຍາດໂຄວິດ19 ແລະບໍ່ຄວນຖືເບົາຕໍ່ມາດຕະການທຳລາຍແຫລ່ງເພາະພັນຂອງຍຸງລາຍ ເນື່ອງຈາກອັດຕາການຕິດເຊື້ອພະຍາດໄຂ້ເລືອດອອກມີທ່າອ່ຽງເພີ່ມຂື້ນທຸກປີ, ສະເພາະໃນປີ 2019 ຜ່ານມາມີຜູ້ເປັນພະຍາດໄຂ້ເລືອດອອກ 11.459 ຄົນ ແລະ ເສຍຊິວິດ 27 ຄົນ.

ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ຕື່ມວ່າ: ປະຈຸບັນພາກສ່ວນກ່ຽວຂ້ອງໄດ້ຈັດອົບຮົມໃຫ້ພະນັກງານແພດໝໍ ລວມທັງອາສາສະໝັກບ້ານໃນຂອບເຂດທົ່ວປະເທດ ກ່ຽວກັບວຽກປີ່ນປົວ, ການໂຄສະນາສຸຂະສຶກສາ ແລະປຸກລະດົມປະຊາຊົນລາວບັນດາເປັນເຈົ້າການປະກອບສ່ວນຕໍ່ວຽກງານສະກັດກັ້ນພະຍາດໄຂ້ເລືອດອອກໃຫ້ເປັນຂະບວນການກ້ວາງຂວາງ ເພື່ອຫລຸດຜ່ອນຈຳນວນຜູ້ຕິດເຊື້ອ ແລະເສຍຊີວິດຍ້ອນພະຍາດໄຂ້ເລືອດອອກໃຫ້ຫລຸດລົງ.