ແຫລ່ງຂ່າວຈາກ ແຂວງຄໍາມ່ວນ ໃຫ້ຮູ້ວ່າ: ປັດຈຸບັນ, ກະຊິກອນທົ່ວແຂວງຄຳມ່ວນ ກຳລັງເລັ່ງເກັບກ່ຽວເຂົ້ານາປີ ໃນເນື້ອທີ່ 87.557 ເຮັກຕາ, ໃນນັ້ນເນື້ອ ທີ່ຜະລິດເຂົ້າເພື່ອເປັນສະບຽງອາຫານໄດ້ 61.487 ເຮັກຕາ ແລະ ເນື້ອທີ່ຜະລິດເຂົ້າເພື່ອເປັນສິນຄ້າໄດ້ 26.070 ເຮັກຕາ.
ຕາມການລາຍງານຈາກ ຂະແໜງປູກຝັງ ພະແນກກະສິກໍາ ແລະ ປ່າໄມ້ແຂວງຄໍາມ່ວນ ໃຫ້ຮູ້ວ່າ: ປີນີ້ທົ່ວແຂວງ ມີເນື້ອທີ່ແຜນການຜະລິດເຂົ້ານາປີ 90.236 ເຮັກ ຕາ, ຄາດຄະເນຜົນຜະລິດໝົດປີ 333.127 ເຮັກຕາ. ໃນນີ້ເນື້ອທີ່ຜະລິດເຂົ້າເພື່ອເປັນສະບຽງອາຫານ 63.495 ເຮັກຕາ, ຄາດຄະເນຜົນຜະລິດ 231.860 ໂຕນ, ເນື້ອທີ່ຜະລິດເຂົ້າເພື່ອເປັນສິນຄ້າ 26.741 ເຮັກຕາ, ຄາດຄະເນຜົນຜະລິດ 101.267 ໂຕນ.ຜ່ານການຈັດຕັ້ງປະຕິບັດຕົວຈິງໄດ້ 87.557 ເຮັກຕາ.
ມາຮອດປັດຈຸບັນ, ທົ່ວແຂວງເກັບກ່ຽວເຂົ້ານາປີໄດ້ແລ້ວ 6.735 ເຮັກຕາ ເທົ່າກັບ 7,69%, ໃນນັ້ນ ເມືອງທີ່ເກັບກ່ຽວເຂົ້າກວມອັດຕາສ່ວນຫລາຍແມ່ນ ເມືອງຄູນຄໍາ, ຫີນບູນ, ເຊບັ້ງໄຟ ແລະ ເມືອງທ່າແຂກ ຊຶ່ງເນື້ອທີ່ຜະລິດເຂົ້າເພື່ອເປັນສະ ບຽງອາຫານສາມາດເກັບກ່ຽວໄດ້ 4.612 ເຮັກຕາ, ເນື້ອທີ່ຜະລິດເຂົ້າເພື່ອເປັນສິນຄ້າໄດ້ສາມາດເກັບກ່ຽວໄດ້ 2.123 ເຮັກຕາ.
ສ່ວນການຜະລິດເຂົ້ານາເນີນສູງ ລວມທັງໝົດປະຕິບັດໄດ້ໃນເນື້ອທີ່ 396 ເຮັກ ຕາ ມີ 2 ເມືອງຄື: ບົວລະພາ 150 ເຮັກຕາ ແລະ ນາກາຍ 246 ເຮັກຕາ, ແຜນ ການຜະລິດເຂົ້າແນວພັນລຸ້ນ 3 ເນື້ອທີ່ 122 ເຮັກຕາ, ມີ 16 ກຸ່ມ ແລະ 1 ສູນ.
ຂ່າວ-ພາບ: ແດງສະຫວັດ