ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມປືກສາຫາລື ແລະ ວາງແຜນຈັດຕັ້ງປະຕິບັດ ເພື່ອໃຫ້ບັນລຸຄາດໝາຍສູ້ຊົນຂອງວຽກງານຊຸມຊົນເປັນເຈົ້າການ ດ້ານສຸຂາອະນາໄມ ຫຼື ຊຈສ ໃນແຂວງ ສະຫວັນນະເຂດ ທີ່ຈັດຂຶ້ນຢູ່ ຫໍວັດທະນະທຳໄກສອນພົມວິຫານ ໃນ ວັນທີ 29 ພຶດສະພານີ້, ໂດຍການເປັນປະທານຂອງທ່ານ ນາງ ຫຼິງທອງ ແສງຕາວັນ ຮອງເຈົ້າ ແຂວງ ສະຫວັນນະເຂດ, ໂດຍມີທ່ານ ແສງດາວ ສີດາໄລ ຫົວໜ້າພະແນກສາທາລະນະສຸກ ແຂວງ, ພ້ອມດ້ວຍອົງການຈັດຕັ້ງສາກົນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ຫຼິງທອງ ແສງຕາວັນ ກ່າວມີຄໍາເຫັນວ່າ: ຈຸດປະສົງຂອງກອງປະຊຸມໃນຄັ້ງນີ້ເພື່ອປືກສາຫາລື, ສົນທະນາ-ແລກປ່ຽນ ແລະວາງແຜນຈັດຕັ້ງປະຕິບັດ ເພື່ອໃຫ້ບັນລຸຄາດໝາຍສູ້ຊົນຂອງວຽກງານ ຊຈສ ໃນແຂວງສະຫວັນນະເຂດ ເພື່ອໃຫ້ໄດ້ປະກາດເປັນແຂວງຢຸດຕິການຖ່າຍຊະຊາຍໃນຕົ້ນປີ 2025 ທີ່ຈະເຖິງນີ້, ເຊິ່ງປີ 2024 ຕົວເລກຊົມໃຊ້ນ້ຳສະອາດໃນແຂວງ ພວກເຮົາແມ່ນກວມ 99,58%, ຕົວເລກຊົມໃຊ້ວິດຖ່າຍກວມ 87,96%, ໃນນັ້ນຕົວເລກການປະກາດບ້ານຢຸດຕິການຖ່າຍຊະຊາຍມາຮອດປະຈຸບັນ ບັນລຸໄດ້ 729 ບ້ານ, ເທົ່າກັບ 70,57% ຂອງບ້ານໃນທົ່ວແຂວງ ແລະປະກາດເມືອງຢຸດຕິການຖ່າຍຊະຊາຍໄດ້ 8 ເມືອງ, ເທົ່າກັບ 53,33% ແລະຄອບຄົວທຸກຍາກ, ຜູ້ດ້ອຍໂອກາດ ແລະຄອບຄົວ ບໍ່ມີເງື່ອນໄຂ ທີ່ຈະກໍ່ສ້າງວິດຖ່າຍດ້ວຍຕົນເອງເພື່ອຊົມໃຊ້ມີທັງໝົດ 9.190 ຄອບຄົວ, ວຽກງານການປັບປຸງ ແລະສະໜອງນ້ຳສະອາດ, ການສຸຂາພິບານ ແລະອະນາໄມ, ການລ້າງມືດ້ວຍສະບູ, ການບໍລິໂພກອາຫານສະອາດປອດໄພ ແລະການປະຕິບັດອະນາໄມຂອງບຸກຄົນ ຈະເຮັດໃຫ້ຊຸມຊົນມີສຸຂະພາບດີ ແລະມີຄຸນະພາບການດຳລົງຊີວິດດີຂຶ້ນ. ນອກຈາກນັ້ນ ຈະເຮັດໃຫ້ແມ່ຍິງ ແລະເດັກນ້ອຍ ໄດ້ຫຼຸດຜ່ອນພາລະແບກຫາບນ້ຳມາຮັບໃຊ້ໃນຄົວເຮືອນ ແລະມີວິດຖ່າຍສຳລັບຊົມໃຊ້ ແລະຈະເອື້ອອຳນວຍໂອກາດ ໃຫ້ເຂົາເຈົ້າໄດ້ເຮັດວຽກປະຈຳວັນຫຼາຍຂຶ້ນ ແລະປະກອບສ່ວນກັບວຽກງານອື່ນໆໃນຊຸມຊົນຢ່າງມີປະສິດທິຜົນ.
ທ່ານຮອງເຈົ້າ ແຂວງກ່າວຕື່ມວ່າ: ເພື່ອປະຕິບັດຕາມນະໂຍບາຍແຫ່ງຊາດທີ່ໄດ້ລະບຸໄວ້ໃຫ້ບັນລຸການລຶບລ້າງ ການຖ່າຍຊະຊາຍໃນທົ່ວປະເທດ ພາຍໃນປີ 2025 ແລະ ຄາດໝາຍສູ້ຊົນທີ່ໄດ້ເຊັນກັນລະຫວ່າງທ່ານຮອງເຈົ້າແຂວງ 18 ແຂວງທົ່ວປະເທດ, ແຂວງໄດ້ນໍາມາຜັນຂະຫຍາຍເຊັນສັນຍາ ຮັບຮອງລະຫວ່າງຮອງເຈົ້າເມືອງ 14 ເມືອງ, 1 ນະຄອນວ່າ: ຈະລຶບລ້າງການຖ່າຍຊະຊາຍໃນແຂວງສະຫວັນນະເຂດ ໃນຕົ້ນປີ 2025. ດັ່ງນັ້ນ ຈຶ່ງໄດ້ຮຽນສະເໜີມາຍັງບັນດາທ່ານ, ທ່ານ ຮອງເຈົ້າເມືອງ, ພາກສ່ວນຕ່າງໆ ອ້ອມຂ້າງແຂວງ, ເມືອງ, ບໍລິສັດ ຫ້າງຮ້ານ ແລະຄູ່ຮ່ວມພັດທະນາ ຈົ່ງພ້ອມກັນຄົ້ນຄວ້າ ແລະປຶກສາຫາລືວາງແຜນຮ່ວມກັນເພື່ອຊອກ ວິທີທາງແກ້ໄຂ ເພື່ອຊ່ວຍໃຫ້ເມືອງ ທີ່ຍັງເຫຼືອໃນແຂວງໄດ້ລຶບລ້າງການຖ່າຍຊະຊາຍໄປຕາມຄາດໝາຍສູ້ຊົນທີ່ວາງໄວ້.
ໃນພິທີ ຍັງໄດ້ສະເໜີຜົນການຈັດຕັ້ງປະຕິບັດວຽກງານ ຊຈສ ແລະຄາດໝາຍສູ້ຊົນຂອງແຂວງ, ສະເໜີພາບລວມໃນການຈັດຕັ້ງປະຕິບັດວຽກງານ ຊຈສ ທົ່ວປະເທດ ແລະ ຄາດໝາຍສູ້ຊົນຮອດປີ 2025, ນະໂຍບາຍແຜນການຈັດຕັ້ງປະຕິບັດຢູ່ແຂວງສະຫວັນນະເຂດ ຈາກນັ້ນ, ຜູ້ເຂົ້າຮ່ວມຍັງໄດ້ປະກອບຄໍາຄິດເຫັນໃສ່ແຕ່ລະຄາດໝາຍສູ້ຊົນຢ່າງກົງໄປກົງມາ ເພື່ອເຮັດໃຫ້ວຽກງານດັ່ງກ່າວ ບັນລຸຕາມແຜນການຄາດໝາຍໂດຍໄວ