ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທົ່ວໂລກມີຜູ້ຕິດເຊື້ອພະຍາດໂຄວິດ19ເກືອບ 5ລ້ານຄົນ ເສຍຊີວິດ 316.000ຄົນ

ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 18 ພຶດສະພານີ້ເຖິງວຽກງານຄວບຄຸມໂຄວິດ19 ວ່າ: ມື້ຜ່ານມາຈໍານວນຜູ້ເດີນທາງເຂົ້າມາ ມີທັງໝົດ 1,489 ຄົນ, ຈຸດຜ່ານດ່ານລາວ-ໄທ ທັງໝົດ 757 ຄົນ, ໃນນັ້ນ ມີແຮງງານລາວກັບມາຈາກປະເທດໄທທັງໝົດ 4 ຄົນ ເຊິ່ງຜ່ານດ່ານວັງເຕົ່າ ແຂວງຈຳປາສັກ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.

ຈຸດຜ່ານດ່ານລາວ-ຈີນ 5 ຄົນ, ໃນນີ້ ແຮງງານລາວກັບມາແຕ່ຈີນ 2 ຄົນ ເຂົ້າມາຜ່ານດ່ານບໍ່ເຕັນ ແລະ ຄົນຈີນ 3 ຄົນແມ່ນຜູ້ຂັບລົດຂົນສົ່ງສິນຄ້າ.

ຈຸດຜ່ານດ່ານລາວ-ຫວຽດ ທັງໝົດ 727 ຄົນ, ໃນນັ້ນ ຄົນລາວ 1 ຄົນ ແມ່ນນັກສຶກສາກັບຈາກ ສສ ຫວຽດນາມ ເຂົ້າມາຜ່ານດ່ານລະໄລ, ແຂວງສາລະວັນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ.

ການເຝົ້າລະວັງ ແລະ ວິເຄາະ ໃນວັນທີ 17 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 114 ຄົນ, ໃນນັ້ນ ມີກໍລະນີສົງໄສ 14 ຄົນ, ແຮງງານລາວທີ່ກັບມາແຕ່ໄທ 22 ຄົນ, ແຮງງານຈີນທີ່ເຂົ້າມາລາວ 78 ຄົນ. ຜົນກວດທັງໝົດຂອງມື້ວານນີ້ ບໍ່ພົບເຊື້ອ.ໝາຍຄວາມວ່າວັນທີ 17 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ການຕິດຕາມປີ່ນປົວຄົນເຈັບຢູ່ໂຮງໝໍ: ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ 4 ຄົນ ທັງໝົດເຫັນວ່າມີອາການປົກກະຕິ.

ທ່ານພູທອນ ເມືອງປາກ ໃຫ້ຮູ້ເຖິງລະບົບການລາຍງານປະຈໍາວັນວ່າ: ແມ່ນການລາຍງານ ຂອງລະບົບເຝົ້າລະວັງພະຍາດ ຈາກທົ່ວປະເທດມາຫາສູນປະຕິບັດງານສຸກເສີນ ຂອງກະຊວງສາທາລະນະສຸກ ຢັ້ງຢືນວ່າ ສປປ ລາວ ບໍ່ພົບຜູ້ຕິດເຊື້ອໃໝ່ 36 ວັນແລ້ວ (ເລິ່ມແຕ່ວັນທີ 12 ເມສາ 2020 ເປັນຕົ້ນມາ). ໄດ້ເກັບຕົວຢ່າງມາກວດທັງໝົດ ມີ 4,565 ຕົວຢ່າງ, ມີຈໍານວນຜູ້ຕິດເຊື້ອສະສົມ ທັງໝົດ 19 ຄົນ, ຍັງນອນຕິດຕາມຢູ່ໂຮງໝໍ 5 ຄົນ.

ໃນວັນສຸກ, ວັນທີ 15 ພຶດສະພາ 2020 ຜ່ານມານີ້, ບັນດາທ່ານໄດ້ຮັບຟັງແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີີ 580/ຫສນຍ ເຊີ່ງແມ່ນແຈ້ງການໃຫ້ຜ່ອນຜັນບາງມາດຕະການລົງຕື່ມ ເພື່ອໃຫ້ມີຜົນກະທົບຕໍ່ເສດຖະກິດ-ສັງຄົມໜ້ອຍທີ່ສຸດ ແລະ ໃຫ້ສັງຄົມສາມາດກັບມາໃຊ້ຊີວິດໃຫ້ເປັນປົກກະຕິໃນແຕ່ລະກ້າວ ປະກອບດ້ວຍ   9 ມາດຕະການຜ່ອນຜັນ ແລະ 4 ມາດຕະການທີ່ຈະສືບຕໍ່ປະຕິບັດ. ມື້ນີ້ ວັນທີ 18 ພຶດສະພາ 2020 ເປັນມື້ເລິ່ມຕົ້ນປະຕິບັດຈົນເຖິງວັນທີ 01 ມິຖຸນາ 2020 ຈຶ່ງຈະມີການປະເມີນສະຖານະການຄືນໃໝ່, ປະເດັນສຳຄັນຢູ່ໃນແຈ້ງການນັ້ນແມ່ນ ການອະນຸຍາດໃຫ້ພະນັກງານລັດຖະກອນໄດ້ເຮັດວຽກເປັນປົກກະຕິ; ສາມາດເດີນທາງພາຍໃນປະເທດໄດ້; ການເປີດການຂົນສົ່ງໂດຍສານທາງບົກ, ທາງນໍ້າ, ທາງອາກາດ ພາຍໃນປະເທດ; ການອະນຸຍາດໃຫ້ມີການຝຶກອົບຮົມ, ສໍາມະນາ, ປະຊຸມທາງການ; ການເປີດໂຮງຮຽນຊັ້ນ ປ5, ມ4, ມ7; ອະນຸຍາດໃຫ້ອອກກໍາລັງກາຍກາງແຈ້ງ ແລະ ໃນຮົ່ມ;ອະນຸຍາດໃຫ້ເປີດດຳເນີນທຸລະກິດການຄ້າ ແລະ ບໍລິການຕ່າງໆ; ດຳເນີນກິດຈະການຂອງບໍລິສັດ ແລະ ໂຮງງານຈຳນວນໜຶ່ງ; ອະນຸຍາດໃຫ້ຊາວຕ່າງປະເທດກັບມາເຮັດວຽກຢູ່ໃນບາງໂຄງການ; ແຕ່ທັງໝົດເຫຼົ່ານີ້ກໍ່ຕ້ອງໄດ້ປະຕິບັດຕາມຄໍາແນະນໍາຂອງຂະແໜງການກ່ຽວຂ້ອງ ແລະ ມາດຕະການປ້ອງກັນການຕິດເຊື້ອຢ່າງຖືກຕ້ອງ ແລະ ເຂັ້ມງວດ.

ຮອດວັນທີ 18 ພຶດສະພາ ທົ່ວໂລກມີຜູ້ຕິດເຊຶ້ອ 4.793.015 ຄົນ, ເພີ່ມຂຶ້ນຈາກມື້ວານນີ້ 77.938ຄົນ), ເສຍຊີວິດ 315.686 ຄົນ.

ອາເມລິກາ : ມີຜູ້ຕິດເຊື້ອອັນດັບໜຶ່ງຂອງໂລກຄື 1.527.664 ຄົນ, ເສຍຊີວິດ 90.978 ຄົນ.  ອັນດັບສອງແມ່ນຣັດເຊຍ ມີຜູ້ຕິດເຊື້ອ 281.752 ຄົນ. ເສຍຊີວິດ 2.631 ຄົນ, ອັນດັບ3 ແມ່ນແອັສປາຍ ມີຜູ້ຕິດເຊື້ອທັງໝົດ 277.719 ຄົນ, ເສຍຊີວິດ 27.650ຄົນ.

ປະເທດອາຊຽນ: ສິງກະໂປ ມີຜູ້ຕິດເຊື້ອ 28.038 ຄົນ, ເສຍຊີວິດ 22 ຄົນ, ປົວດີ 9.340 ຄົນ

ອິນໂດເນເຊຍ: ຕິດເຊື້ອ 17.514 ຄົນ, ເສຍຊີວິດ 1.148 ຄົນ, ປົວດີ 4.129 ຄົນ

ຟິລິປິນ: ຕິດເຊື້ອ 12.513 ຄົນ, ເສຍຊີວິດ 824 ຄົນ, ປົວດີ 2.635 ຄົນ

ມາເລເຊຍ: ຕິດເຊື້ອ 6.895 ຄົນ, ເສຍຊີວິດ 113 ຄົນ, ປົວດີ 5.571 ຄົນ

ໄທ: ຕິດເຊື້ອ 3.028 ຄົນ, ເສຍຊີວິດ 56 ຄົນ, ປົວດີ 2.856 ຄົນ

ຫວຽດນາມ: ຕິດເຊື້ອ 320 ຄົນ, ບໍ່ມີຜູ້ເສຍຊີວິດ, ປົວດີ 260 ຄົນ

ມຽນມາ: ຕິດເຊື້ອ 184 ຄົນ, ເສຍຊີວິດ 6 ຄົນ, ປົວດີ 97 ຄົນ

ບຣູໄນ: ຕິດເຊື້ອ 141 ຄົນ, ເສຍຊີວິດ 1 ຄົນ, ປົວດີ 136 ຄົນ

ກຳປູເຈຍ: ຕິດເຊື້ອ 122 ຄົນ, ບໍ່ມີຜູ້ເສຍຊີວິດ, ປົວດີ 122 ຄົນ

ຕີມໍເລສເຕ: ຕິດເຊື້ອ 24 ຄົນ, ບໍ່ມີຜູ້ເສຍຊີວິດ, ປົວດີໝົດ 24 ຄົນແລ້ວ