ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທົ່ວໂລກມີຜູ້ເສຍຊີວິດຍ້ອນໂຄວິດ19 ທັງໝົດ 575.030 ຄົນ

ຮອງກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ເນັ້ນໜັກໃຫ້ປະຊາຊົນລາວເອົາໃຈໃສ່ຕິດຕາມເຝົ້າລະວັງ ແລະ ປະຕິບັດຕາມແຈ້ງການຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 697 ລົງວັນທີ 30 ມິຖຸນາ 2020 ຢ່າງເຄັ່ງຄັດ ພ້ອມທັງສືບຕໍ່ປະຕິບັດການດຳລົງຊີວິດປົກກະຕິແບບໃໝ່ໃຫ້ກາຍເປັນຄວາມຊິນເຄີຍ ເພື່ອປ້ອງກັນການລະບາດຂອງ ພະຍາດໂຄວິດ19 ທ່າມກາງທີ່ຫຼາຍປະເທດໃນໂລກ ລວມທັງປະເທດໃກ້ຄຽງຍັງມີການລະບາດຂອງພະຍາດໂຄວິດ19 ຢ່າງຕໍ່ເນື່ອງ ແລະ ມີທ່າອ່ຽງເພີ່ມຂື້ນເລື້ອຍໆ ພ້ອມທັງມີແຮງງານລາວຈຳນວນຫຼາຍທະຍອຍເດີນທາງກັບຄືນປະເທດ ເຊິ່ງມີຄວາມສ່ຽງຫຼາຍຕໍ່ການຕິດເຊື້ອພະຍາດໂຄວິດ 19.

ໂອກາດຖະແຫຼງຂ່າວປະຈຳວັນ ຂອງຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຢູ່ກະຊວງສາທາລະນະສຸກໃນວັນທີ 14 ກໍລະກົດນີ້  ດຣ ນາງ ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກໃຫ້ຮູ້ວ່າ : ນັບແຕ່ເວລາ 17ຂອງວັນທີ 13 ກໍລະກົດນີ້ ທົ່ວປະເທດມີຜູ້ເດີນທາງຜ່ານຈຸດຜ່ານແດນຕ່າງໆທັງໝົດ 1.425 ຄົນ,ໃນນັ້ນຈຸດຜ່ານແດນລາວ ໄທ ມີທັງໝົດ 686 ຄົນ,ສ່ວນຫຼາຍເປັນແຮງງານລາວ ຜ່ານສະໝາມບິນສາກົນວັດໄຕ 182 ຄົນ,ຄົນຈີນ 159 ຄົນ,ຄົນລາວ 2 ຄົນ ແລະ ຄົນຕ່າງປະເທດ 21 ຄົນ ທຸກຄົນໄດ້ແທກອຸນຫະພູມຮ່າງກາຍ ແລະ ເກັບຕົວຢ່າງສົ່ງໄປວິເຄາະກວດຫາເຊື້ອ ແລ້ວໄດ້ນໍາສົ່ງໄປຫາສະຖານທີ່ຈຳກັດບໍລິເວນເປັນເວລາ 14 ວັນ.

ໃນວັນທີ 13 ກໍລະກົດ 2020, ໄດ້ເກັບຕົວຢ່າງມາກວດວິເຄາະທັງໝົດ 315 ຄົນ, ໃນນັ້ນແຮງງານລາວມາແຕ່ໄທ 293 ຄົນ ແລະ  ກໍລະນີສົງໄສ 22 ຄົນ; ຜົນກວດທັງໝົດແມ່ນ ບໍ່ພົບເຊື້ອ ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 13 ກໍລະກົດ 2020 ໄດ້ເກັບຕົວຢ່າງມາກວດທັງໝົດ 20,769 ຕົວຢ່າງ,93 ມື້ແລ້ວທີ່ບໍ່ພົບຜູ້ຕິດເຊື້ອໃໝ່.

ການລະບາດພະຍາດໂຄວິດ 19 ໃນທົ່ວໂລກມາຮອດເວລາ 9 ໂມງຂອງວັນທີ 14 ກໍລະກົດນີ້ ມີຜູ້ຕິດເຊື້ອທັງໝົດ 13.195.143 ຄົນ, ເສຍຊີວິດແລ້ວ 575.030 ຄົນ ປະເທດທີ່ມີຜູ້ຕິດເຊື້ອຫຼາຍກວ່າໝູ່ໄດ້ແກ່ສະຫະຣັດອາເມຣິກາ ,ຮອງລົງມາ ເບລຊິນ ແລະ ອິນເດຍ %