ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທ່ອງທ່ຽວຢູ່ ແຂວງ ຊຽງຂວາງ ໃນໄລຍະງານມະຫາກໍາກິລາແຫ່ງຊາດ ຄັ້ງທີ XI ຄ່າທີ່ພັກຈະຫລຸດ 20%

ແຂວງ ຊຽງຂວາງ ກຽມອອກແຈ້ງການໃຫ້ຜູ້ປະກອບການໂຮງແຮມ ແລະ ເຮືອນພັກພາຍໃນແຂວງ ຫລຸດຄ່າບໍ ລິການໂຮງແຮມ ແລະ ເຮືອນພັກລົງຈາກລາຄາປົກກະຕິ ຫ້ອງລະ 20% ໃນໄລຍະທີ່ແຂວງດັ່ງກ່າວເປັນເຈົ້າພາບຈັດງານມະຫາກໍາກິລາແຫ່ງຊາດ ຄັ້ງທີ XI ໃນລະຫວ່າງວັນທີ 22 ມີນາ – 1 ເມສາ 2020. ຂະນະທີ່ສະຖານທີ່ທ່ອງທ່ຽວພາຍໃນແຂວງ ພວມໄດ້ຮັບການປັບປຸງໃຫ້ດີຂຶ້ນ ເພຶ່ອສ້າງຄວາມພໍໃຈໃຫ້ແກ່ແຂກທັງພາຍໃນ ແລະ ຕ່າງປະເທດທີ່ເຂົ້າໄປທ່ອງທ່ຽວພາຍໃນງານກິລາຄັ້ງນີ້ໃຫ້ຫລາຍທີ່ສຸດ.
ທ່ານ ສີວິໄລ ອຸດົມສຸກ, ຮອງຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ຊຽງຂວາງ ໃຫ້ສໍາພາດວ່າ: ງານມະຫາກໍາກິລາແຫ່ງຊາດ ຄັ້ງທີ XI ຈະຈັດຂຶ້ນພ້ອມກັບການສະເຫລີມສະຫລອງວັນສ້າງຕັ້ງພັກປະຊາຊົນ ປະຕິວັດລາວ ວັນທີ 22 ມີນາ ຄົບຮອບ 65 ປີ ແລະ ການສະເຫລີມສະຫລອງທົ່ງໄຫຫີນເຂົ້າເປັນມໍລະດົກໂລກ. ເພື່ອຮອງຮັບແຂກທີ່ຈະເດີນທາງເຂົ້າໄປທ່ອງທ່ຽວພາຍໃນງານຄັ້ງນີ້ ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ຈັດເຝິກອົບຮົມໃຫ້ຜູ້ປະກອບການໂຮມແຮງ ແລະ ເຮືອນພັກໃນການຕ້ອນຮັບແຂກຄົນທີ່ໄດ້ມາດຕະການ, ລວມທັງອອກແຈ້ງໃຫ້ຜູ້ປະກອບການປັບປຸງສ້ອມແຊມອາຄານຂອງຕົນໃຫ້ມີຄວາມສວຍງາມ, ປັບປຸງສິ່ງ ອໍານວຍຄວາມສະດວກ ແລະ ການບໍລິການຕ່າງຯ ໃຫ້ດີຂຶ້ນກ່ວາເກົ່າ ຊຶ່ງທົ່ວແຂວງມີໂຮງແຮມ 21 ແຫ່ງ, ມີ 800 ກ່ວາຫ້ອງນອນ 1.000 ກ່ວາຕຽງ ແລະ ເຮືອນພັກ 129 ແຫ່ງ ສາມາດຮອງຮັບແຂກໄດ້ 3.000 ກ່ວາຄົນຕໍ່ຄືນ. ຄຽງຄູ່ກັນນີ້ ອາດຈະມີການແຂກພັກຢູ່ເຮືອນປະຊາຊົນ ຫລື ໂຮມສະເຕໃນກໍລະນີແຂກເດີນທາງມາຫລາຍເຮັດໃຫ້ໂຮມແຮມ ແລະ ເຮືອນພັກບໍ່ສາມາດຮອງຮັບໄດ້. ສ່ວນຄ່າບໍລິການໂຮງແຮມ, ເຮືອນພັກ, ລວມເຖີງຮ້ານອາຫານຕ່າງຯ ພາກສ່ວນກ່ຽວຂ້ອງຂອງແຂວງຈະຕິດຕາມຢ່າງໃກ້ສິດເພື່ອຮັບປະກັນບໍ່ໃຫ້ມີການສວຍໂອກາດຂຶ້ນລາຄາຄ່າບໍລິການຊຶ່ງເປັນການເອົາປຽບແຂກທີ່ມາໃຊ້ບໍລິການ. ນອກຈາກນີ້ ປັດຈຸບັນ ອົງການປົກຄອງແຂວງ ພວມກະກຽມອອກແຈ້ງການໃຫ້ຜູ້ປະກອບການໂຮງແຮມ ແລະ ເຮືອນພັກພາຍໃນແຂວງ ຫລຸດຄ່າບໍລິການລົງຈາກລາຄາປົກກະຕິ ຫ້ອງລະ 20% ໃນໄລຍະຈັດງານກິລາຄັ້ງນີ້ ຄາດວ່າຈະໄດ້ຮັບການຮ່ວມມືຈາກຜູ້ປະກອບການເປັນຢ່າງດີ ເພາະຜ່ານມາ ເຂົາເຈົ້າເຄີຍປະຕິບັດຕາມແຈ້ງການຂອງແຂວງເພື່ອຫລຸດຄ່າບໍລິການຫ້ອງພັກລົງ 20% ມາແລ້ວໃນໂອກາດຕ້ອນຮັບຂະບວນຄາລາວານທີ່ເດີນທາງໄປເຂົ້າຮ່ວມງານສະເຫລີມສະຫລອງວັນສ້າງຕັ້ງເມືອງວຽງໄຊ ຄົບຮອບ 50 ໃນທ້າຍປີ 2018 ຜ່ານມາ.
ທ່ານ ສີວິໄລ ອຸດົມສຸກ ໃຫ້ຮູ້ຕື່ມວ່າ: ແຂວງ ຊຽງຂວາງ ມີສະຖານທີ່ທ່ອງທ່ຽວທີ່ເປີດບໍລິການແລ້ວທັງໝົດ 43 ແຫ່ງ, ໃນນີ້ ສະຖານທີ່ທ່ອງທ່ຽວທາງວັດທະນະທໍາ 19 ແຫ່ງ, ປະຫວັດສາດ 12 ແຫ່ງ ແລະ ສະຖານທີ່ທ່ອງທ່ຽວທາງທໍາມະຊາດ 12 ແຫ່ງ. ປັດຈຸບັນ ສະຖານທີ່ທ່ອງທ່ຽວຫລາຍແຫ່ງພວມໄດ້ຮັບການປັບປຸງໃໝ່ໃຫ້ສວຍງາມ, ປັບປຸງສິ່ງອໍານວຍຄວາມສະດວກ ແລະ ການບໍລິການຕ່າງຯ ໃຫ້ສວຍງານ ແລະ ດີຂຶ້ນກ່ວາເກົ່າ ໂດຍສະເພາະສະຖານທີ່ທ່ອງທ່ຽວທີ່ມີຊື່ສຽງ ເປັນຕົ້ນ: ບັນດາທົ່ງໄຫຫີນທີ່ເຂົ້າເປັນມໍລະດົກໂລກ, ຖໍ້າປີວ, ບໍ່ນ້ຳອຸ່ນເມືອງ ຄໍາ ແລະ ສະຖານທີ່ອື່ນຯ

ໂດຍ: ບຸນຕຽງ ຈັນທະວົງ