ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ແລະລັດຖະມົນຕີກະຊວງກ່ຽວຂ້ອງ ຊີ້ແຈງຕໍ່ຂໍ້ຊັກຖາມຂອງສະມາຊິກສະພາແຫ່ງຊາດ

ມື້ທີສອງ (25/6/2020) ຂອງການດໍາເນີນກອງປະຊຸມສະໄໝສາມັນເທື່ອທີ9 ຂອງສະພາແຫ່ງຊາດຊຸດທີ VIII ດໍາເນີນພາຍໃຕ້ການເປັນປະທານຂອງທ່ານ ນາງປານີ ຢາທໍຕູ້ ປະທານສະພາແຫ່ງຊາດ ທີ່ຫໍປະຊຸມສະພາແຫ່ງຊາດຫລັກ 6 ນະຄອນຫລວງວຽງຈັນ. ສໍາລັບຕອນບ່າຍ ຜູ້ແທນກອງປະຊຸມ ໄດ້ຮັບຟັງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ຂຶ້ນຊີ້ແຈງຕໍ່ຂໍ້ຊັກຖາມຕໍ່ຄໍາຖາມເຈາະຈີ້ມຂອງສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງຕ່າງໆ ຈາກນັ້ນ, ທ່ານທອງລຸນ ສີສຸລິດ ນາຍົກລັດຖະມົນຕີ ມີຄໍາເຫັນສັງລວມຕໍ່ກອງປະຊຸມ ກ່ຽວກັບວຽກງານລັດຖະບານເປັນຕົ້ນບັນຫາລາຄາຄ່າກະແສໄຟຟ້າ ທີ່ສັງຄົມມີຄວາມສົນໃຈຫລາຍ, ບັນຫາການຊ່ວຍເຫລືອແຮງງານລາວ ແລະອື່ນໆ  ຄວນມີວິທີການຊ່ວຍເຫລືອເຂົາເຈົ້າແນວໃດ, ບາງຕອນສໍາຄັນ ທ່ານທອງລຸນ ສີສຸລິດ ກ່າວວ່າ: ກອງປະຊຸມສະພາແຫ່ງຊາດຊຸດທີ 8 ນີ້ ປະທານ , ຮອງປະທານ ແລະ ບັນດາສະມາຊິກສະພາແຫ່ງຊາດຢູ່ໃນບັນຍາກາດເຂົ້າອົກເຂົ້າໃຈ ແລະ ເຫັນໃຈລັດຖະບານ ທີ່ໄດ້ຜ່ານຜ່າຂໍ້ຫຍຸ້ງຍາກນານາປະການ ພ້ອມທັງເຂົ້າໃຈສະພາບຕົວຈິງຂອງສະພາບແວດລ້ອມໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມໃນປີ 2020 ແລະ ຮັບຮູ້ວ່າການປະຕິບັດແຜນການພັດທະນາເສດຖະກິດ-ສັງຄົມຂອງປະເທດເຮົາໃນປີນີ້ ມີຄວາມອ່ອນໄຫວຫຼາຍທີ່ຈະຕົກເຂົ້າໃນວິກິດການ,ສະນັ້ນ ສະມາຊິກສະພາແຫ່ງຊາດຈື່ງເປັນກຳລັງແຮງສຳຄັນອັນໜື່ງ ທີ່ຈະຊ່ວຍລັດຖະບານຜ່ານຜ່າວິກິດການນີ້ໄປໃຫ້ໄດ້ ເພື່ອສູ້ຊົນເຮັດໃຫ້ເສດຖະກິດໄດ້ຮັບການຟື້ນຟູ ແລະຊີວິດການເປັນຢູ່ຂອງປະຊາຊົນນັບມື້ນັບດີຂື້ນ.

ທ່ານນາຍົກລັດຖະມົນຕີ ກ່າວຕໍ່ໄປວ່າ: ຜ່ານມາບັນດາສະມາຊິກສະພາແຫ່ງຊາດຮັບຮູ້ວ່າ ດ້ານນະໂຍບາຍມີໝົດແລ້ວ ມີຫຼາຍມະຕິ ມີຫຼາຍຄໍາສັ່ງ ແລະ ແຈ້ງການອອກມາ, ແຕ່ສັງເກດເຫັນວ່າ ສະມາຊິກສະພາແຫ່ງຊາດຢາກເນັ້ນໜັກໃສ່ການປະຕິບັດຕົວຈິງ, ການຜັນຂະຫຍາຍນະໂຍບາຍ ແລະ ຄຳສັ່ງ, ມະຕິຕ່າງໆຂອງສະພາແຫ່ງຊາດ ຂອງລັດຖະບານ ຈິດໃຈຊີ້ນໍາຂອງກົມການເມືອງສູນກາງພັກຂອງພວກເຮົາແມ່ນຍັງຄາຢູ່ໃນຂອດລະຫວ່າງກາງ ແລະ ຂອດປະຕິບັດເປັນຕົ້ນຕໍ, ສະນັ້ນ ພວກເຮົາຈະພ້ອມກັນແກ້ໄຂຂອດລະຫວ່າງກາງ ແລະ ຂອດປະຕິບັດຄືແນວໃດ, ແມ່ນຈະໄດ້ປຶກສາຫາລື ແລະ ສົນທະນາກັນ.

ທ່ານ ທອງລຸນ ສີສຸລິດ ເນັ້ນໜັກໃຫ້ສະມາຊິກສະພາແຫ່ງຊາດ ແຕ່ລະເຂດເລືອກຕັ້ງ ຕ້ອງລົງທ້ອງຖິ່ນ ແລະ ຖືວ່າຕົວເອງເປັນມະຫາພາກຢູ່ໃນແຂວງ ແລະ ເມືອງ ເພື່ອໄປຊ່ວຍເຫຼືອຈຸລະພາກໃຫ້ເຮັດວຽກໄດ້ດີຂື້ນ ບໍ່ວ່າຈະເປັນດ້ານທຸລະກິດ ການຜະລິດກະສິກຳເປັນສິນຄ້າ ແລະ ອື່ນໆ, ສຳລັບຕົວເລກ ລວມຍອດຜະລິດຕະພັນພາຍໃນ ຫຼື ຈີດີພິ ທີ່ລັດຖະບານນໍາສະເໜີ ແລະມີທີທ່າວ່າສະພາແຫ່ງຊາດຈະຮັບຮອງເອົາໄດ້ ແຕ່ຕົວເລກຈີດີພີນີ້ ຍັງເປັນຕົວເລກສູ້ຊົນຂອງລັດຖະບານ ເນື່ອງຈາກການລະບາດຂອງພະຍາດໂຄວິດ19 ຍັງບໍ່ຢຸດຕິງ່າຍຯ.

ຜ່ານມາ ສປປ ລາວ ສາມາດສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ19ໄດ້ຍ້ອນບັນດາກົນໄກທີ່ລັດຖະບານວາງອອກໄດ້ຕິດແທດກັບຕົວຈິງ, ທັນການ, ຕັດໄຟແຕ່ຕົ້ນລົມ ແລະ ປ້ອງກັນດີກວ່າແກ້ ເຊິ່ງມາດຕະການນີ້ ເຮັດໃຫ້ສາມາດຈຳກັດການລະບາດຂອງພະຍາດນີ້ໄດ້ ບວກກັບຄວາມຕື່ນຕົວຂອງປະຊາຊົນ ໃຫ້ການຮ່ວມມືເປັນຢ່າງດີ .

ນອກຈາກນັ້ນທ່ານ ທອງລຸນ ສີສຸລິດ ຍັງໄດ້ຊີ້ແຈງຫຼາຍບັນຫາຕໍ່ຄຳຊັກຖາມຂອງສະມາຊິກສະພາແຫ່ງຊາດ ເປັນຕົ້ນ ການປະຕິບັດບົດບາດການເປັນມະຫາພາກເພື່ອຂັບເຄື່ອນການພັດທະນາເສດຖະກິດ -ສັງຄົມ ລວມເຖິງການປັບປຸງລາຄາຄ່າກະແສໄຟຟ້າຄືນໃໝ່ທີ່ພວມຟົດເດືອດຢູ່ໃນປະຈຸບັນ.

ພາຍຫຼັງສໍາເລັດການຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດແລ້ວ ປະທານກອງປະຊຸມໄດ້ສະຫຼຸບສັງລວມການປະະກອບຄຳເຫັນຂອງສະມາຊີກສະພາແຫ່ງຊາດ ກ່ຽວກັບວຽກງານລັດຖະບານ ຈາກນັ້ນຫົວໜ້າກອງເລຂາອະນຸກຳມະການກອງປະຊຸມໄດ້ຜ່ານຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ2020 ແລ້ວສະເໜີໃຫ້ ສະມາຊີກສະພາແຫ່ງຊາດລົງຄະແນນສຽງຮັບຮອງເອົາ .

ສໍາລັບຕອນເຊົ້າວັນ25ມິຖຸນາ2020 ສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆ ໄດ້ຮັບຟັງການຊີ້ແຈງຕໍ່ຂໍ້ຊັກຖາມຂອງສະມາຊິກສະພາແຫ່ງຊາດ ຈາກກະຊວງກ່ຽວຂ້ອງ ເລີ່ມຈາກທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທ່ານລຽນ ທິແກ້ວ ລັດຖະມົນຕີກະຊວງກະສິກໍາ ແລະປ່າໄມ້, ແລະທ່ານຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການ-ສັງຄົມ.%