ໃນວັນທີ 15 ກັນຍາ 2023 . ທ່ານ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍ ລິຫານງານພັກ, ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ. ໃນໂອກາດລົງເຄື່ອນໄຫວວຽກງານໃນຄັ້ງນີ້ ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ໄດ້ເຂົ້າພົບ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ເພື່ອແຈ້ງຈຸດປະສົງ ໃນການມາເຄື່ອນໄຫວວຽກງານຄັ້ງນີ້ ໄດ້ຮັບຊາບ.
ຈາກນັ້ນ, ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ກໍໄດ້ໄປຊຸກຍູ້ ແລະ ຊີ້ນໍາການຈັດຕັ້ງປະຕິບັດວຽກງານຍຸຕິທໍາ ຢູ່ສະຖາບັນຍຸຕິທຳແຫ່ງຊາດ ສາຂາຫຼວງພະບາງ ເຂົ້າຮ່ວມມີຫົວໜ້າພະແນກຍຸຕິທໍາ, ຫົວໜ້າສະຖາບັນຍຸຕິທໍາແຫ່ງຊາດ ສາຂາຫຼວງພະບາງ ຮອງຫົວໜ້າພະແນກຍຸຕິທໍາແຂວງ, ຫົວໜ້າຂະແໜງ, ຮອງຂະແໜງ, ບັນດາຫົວໜ້າຫ້ອງການຍຸຕິທຳ 11 ເມືອງ, 1 ນະຄອນຫຼວງພະບາງ ແລະ ຄະນະຈາກສູນກາງ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ ທ່ານ ມີໄຊ ໄຊເກີຢ່າຈົ່ງຕົວ ຫົວໜ້າພະແນກຍຸຕິທຳແຂວງຫຼວງພະບາງ, ທ່ານ ແສງອາລຸນ ພັນນະລັດ ຫົວໜ້າສະຖາບັນຍຸຕິທໍາແຫ່ງຊາດ ສາຂາຫຼວງພະບາງ ກໍໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດວຽກງານຍຸຕິທຳໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023. ເປັນຕົ້ນວຽກງານສ້າງ ແລະ ປັບປຸງນິຕິກໍາ, ວຽກງານໂຄສະນາເຜີຍແຜ່ກົດໝາຍ, ວຽກງານການສ້າງບ້ານ ແລະ ຄອບຄົວແບບຢ່າງປະຕິບັດກົດໝາຍ, ວຽກກງານໄກ່ເກັ່ຍຂໍ້ຂັດແຍ່ງຂັ້ນບ້ານ, ວຽກງານຍຸຕິທໍາເດັກ, ວຽກງານສ້າງບຸກຄະລາກອນທາງດ້ານກົດໝາຍ ຊຶ່ງກໍຍົກທັງດ້ານດີ, ດ້ານອ່ອນ ແລະ ບັນດາຂໍ້ຄົງຄ້າງທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ.
ໃນຕອນທ້າຍຂອງກອງປະຊຸມ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ກໍໄດ້ມີຄຳເຫັນໂອ້ລົມຜູ້ເຂົ້າຮ່ວມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ພະແນກຍຸຕິທໍາແຂວງ, ຫົວໜ້າ, ຮອງຫົວໜ້າສະຖາບັນຍຸຕິທໍາແຫ່ງຊາດ ສາຂາຫຼວງພະບາງ ແລະ ບັນດາຫົວໜ້າຫ້ອງ ການຍຸຕິທໍາເມືອງ ເຊີດຊູບົດບາດການນໍາພາຂອງພັກ ເອົາໃຈໃສ່ຕໍ່ວຽກງານວິຊາສະເພາະ, ຄົ້ນຄວ້າເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ໃນແຕ່ລະໄລຍະ. ສືບຕໍ່ເຄື່ອນໄຫວຈັດຕັ້ງປະຕິບັດຄຳແນະນໍາຂອງລັດຖະມົນຕີກ່ຽວກັບການຈັດຕັ້ງປະຕິບັດວຽກງານຍຸຕິທຳ ຢ່າງແຂງແຮງ ແລະ ເປັນຂະບວນການຟົດຟື້ນ, ພ້ອມທັງຍົກສູງຄວາມເປັນແບບຢ່າງນຳໜ້າໃນການປະຕິບັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍ ມີຜົນສຳເລັດໃໝ່ໃຫຍ່ຫຼວງກວ່າເກົ່າ.
ໃນການລົງຕິດຕາມ ແລະ ຊຸກຍູ້ວຽກງານໃນຄັ້ງນີ້ ທ່ານໄດ້ເນັ້ໜັກໃຫ້ພະແນກຍຸຕິທໍາ ກະກຽມທາງດ້ານບຸກຄະລາກອນ, ສະຖານທີ່ເຮັດວຽກ ເພື່ອກະກຽມສ້າງຕັ້ງກອງປະຕິບັດຄໍາຕັດສິນຂອງສານ ຢູ່ແຂວງຫຼວງພະບາງ ຕາມກົດໝາຍວ່າດ້ວຍການປະຕິບັດຄໍາຕັດສິນຂອງສານ ສະບັບປັບປຸງໃໝ່ໃຫ້ປະກົດຜົນເປັນຈິງ.
ຂ່າວ: ໄຊຍະສິດ ບັນຍາວົງ
ພາບ: ອະນຸລັກ ພົມເພັດ
