ໃນຕອນເຊົ້າວັນທີ 29 ມັງກອນ 2021 ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີພິທີຕ້ອນຮັບ ທ່ານ ສຈ. ປອ. ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ລົງເຄື່ອນໄຫວຊຸກຍູ້ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຢູ່ແຂວງອຸດົມໄຊ ໂດຍມີທ່ານ ສົມຈິດ ປັນຍາສັກ ຮອງເຈົ້າແຂວງ ແຂວງອຸດົມໄຊ, ບັນດາຄະນະພະແນກ ແລະ ວິຊາການ ຂະແໜງການຖະແຫຼງຂ່າວ, ວັດທະນະທຳ ລວມໄປເຖິງບັນດາບໍລິສັດທ່ອງທ່ຽວ. ຜູ້ປະກອບການທຸລະກິດທ່ອງທ່ຽວ, ໂຮງແຮມ ແລະ ຮ້ານອາຫານເຂົ້າຮ່ວມ ຢ່າງຕັ້ງໜ້າ.
ໃນໂອກາດນີ້ ທ່ານ ບຸນກວມ ມິດເມືອງໄຊ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຂຶ້ນກ່າວລາຍງານກ່ຽວກັບການຈັດຕັ້ງປະຕິບັດວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ພາຍຫຼັງທີ່ໄດ້ຈັດກອງປະຊຸມໃຫຍ່ ຄັງທີ I ກໍ່ໄດ້ມີການຊັບຊ້ອນລະບົບກົງຈັກຈັດຕັ້ງຄືນໃໝ່ ໃຫ້ແທດເໝາະກັບສະພາບເງື່ອນໄຂຄວາມເປັນຈິງ ພາຍໃນພະແນກ ເຊິ່ງປະກອບດ້ວຍ 5 ຂະແໜງ, 1 ຫ້ອງການ, 2 ສູນ, 3 ອຳນວຍການ ເຮັດໃຫ້ລະບົບກົງຈັກກະທັດຮັດ ແນໃສ່ຮັບປະກັນທາງດ້ານປະລິມານ ແລະ ຄຸນນະພາບຜູ້ດຽວສາມາດເຮັດໄດ້ຫຼາຍວຽກ. ທາງພະແນກໄດ້ສ້າງວິໄສທັດ ແລະ ກຳນົດແຜນຍຸດທະສາດ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ 2020-2025-2030 ຕາມ 4 ໃຈກາງ 4 ພັດທະນາ ສາມແຫຼ່ງທຶນ ຕາມທິດສີຂຽວ ແລະ ຍືນຍົງແຫ່ງຊາດ.
ພາຍໃນພະແນກມີທັງໝົດ 90 ສະຫາຍ, ຍິງ 32 ສະຫາຍ, ມີຄະນະພັກຮາກຖານພະແນກ 5 ໜ່ວຍ ຂຶ້ນກັບສະມາຊິກພັກ 70 ສະຫາຍ , ຍິງ 21 ສະຫາຍ, ສຳຮອງ 4 ສະຫາຍ, ຍິງ 1 ສະຫາຍ.
ດ້ານວຽກງານຖະແຫຼງຂ່າວແມ່ນໄດ້ເປັນເສນາການນຳຂັ້ນແຂວງ ແລະ ສູນກາງ ລົງເຄື່ອນໄຫວເກັບກຳຂ່າວ ການເມືອງ, ເສດຖະກິດ ດ້ວຍຄວາມຮັບຜິດຊອບສູງ, ເອົາໃຈໃສ່ຄຸ້ມຄອງ-ປັບປຸງຂະຫຍາຍໂທລະໂຄ່ງຂັ້ນເມືອງ, ບ້ານ, ກຸ່ມບ້ານ ບ້ານສາມສ້າງ ທົ່ວແຂວງມີທັງໝົດ 303 ບ້ານ, ຍັງບໍ່ທັນມີໂທລະໂຄ່ງບ້ານ 169 ບ້ານ ເຊິ່ງຍັງບໍ່ສາມາດບັນລຸໄດ້ ເນື່ອງຈາກທາງພະແນກຍັງຂາດດ້ານງົບປະມານໃນການສະໜັບສະໜູນ. ເອົາໃຈໃສ່ໂຄສະນາສະກັດກັ້ນ ຕ້ານ ແລະ ປ້ອງກັນແຫຼ່ງຂ່າວທີ່ບິດເບືອນຄວາມຈິງ, ເຜີຍແຜ່ລະບຽບກົດໝາຍວຽກດີຄົນເດັ່ນ, ຄອບຄົວຕົວແບບດ້ານການປູກຝັງລ້ຽງສັດ ແລະ ເຫດການບ້ານເມືອງໃຫ້ທ່ວງທັນເວລາ.
ດ້ານວັດທະນະທຳແມ່ນໄດ້ເອົາໃນໃສ່ຟື້ນຟູອະນຸລັກວັດທະນະທຳ ແລະ ຮີດຄອງປະເພນີ ອັນດີງາມຂອງປະຊາຊົນບັນດາເຜົ່າ, ສົ່ງເສີມວັດທະນະທຳທີ່ກ້າວໜ້າ ທົ່ວແຂວງມີບ້ານວັດທະນະທຳ 279 ບ້ານ, ຄອບຄົວວັດທະນະທຳ 38,207 ຄອບຄົວ. ສະເພາະປີ 2020 ທີ່ຜ່ານມາ ມີກຸ່ມບ້ານວັດທະນະທຳ 2 ກຸ່ມບ້ານ ປະກາດບ້ານວັດທະນະທຳໄດ້ 11 ບ້ານ. ສ່ວນບ້ານທີ່ຍັງເຫຼືອແມ່ນຍັງບໍ່ທັນໄດ້ຄົບຕາມມາດຕະຖານເງື່ອນໄຂ ເປັນບ້ານທີ່ທຸກຍາກ ພື້ນຖານໂຄງລ່າງສາທາລະນຸປະໂພກ ຍັງຂາດເຂີນ ແລະ ລັດ ຍັງບໍ່ມີງົບປະມານ ຕອບສະໜອງແກ້ໄຂໄດ້ເທົ່າທີ່ຄວນ. ໄດ້ອອກແຈ້ງການເຖິງຫ້ອງການ ຖວທ 7 ເມືອງ ແລະ ຜູ້ປະກອບການທຸລະກິດ, ບ້ານປະຊາຊົນບັນດາເຜົ່າ ໃນການເພີ່ມມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ເປັນຕົ້ນງານບຸນປະເພນີ, ງານດອງ ໃຫ້ຈັດແບບກະທັດຮັດ.
ວຽກງານທ່ອງທ່ຽວ ແຂວງອຸດົມໄຊມີ ໂຮງແຮມເພື່ອຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ທັງໝົດ 21 ແຫ່ງ, ເຮືອນພັກ 118 ແຫ່ງ, ຮ້ານອາຫານ, ຮ້ານກິນດື່ມ 275 ແຫ່ງ, ມີສະຖານທີ່ທ່ອງທ່ຽວໂດດເດ່ນຂອງແຂວງເຊັ່ນ: ນ້ຳກັດ ຢໍ່ລະປ່າ, ວັດພະເຈົ້າສິງຄຳ, ຖ້ຳຈອມອອງ, ໂຮງສະເຕ ແລະ ຜະລິີດຕະພັນທີ່ນ່າສົນໃຈອື່ນໆ. ໃນປີ 2020 ມີນັກທ່ອງທ່ຽວທັງໝົດ 134342 ຄົນ ສ້າງລາຍຮັບໄດ້ 6,6772,548 ໂດລ່າສະຫະລັດ ທຽບໃສ່ປີທີ່ຜ່ານມາ ຫຼຸດລົງ 42% ໂດຍປະຕິບັດຕາມແຜນຍຸດທະສາດຂອງລັດຖະບານວ່າດ້ວຍການສົ່ງ້ສີມລາວທ່ຽວລາວ ແຂວງກໍໄດ້ຈັດຄາລະວານ ລາວທ່ຽວລາວ ໄປຖ້ຳຈອມອອງ ຖືວ່າສັງຄົມໃຫ້ຄວາມສົນໃຈ ແລະ ເຂົ້າຮ່ວມເປັນຈຳນວນຫຼວງຫຼາຍ.
ໃນໂອກາດນີ້ ທ່ານ ສຈ. ປອ. ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ໃຫ້ທິດຊີ້ນຳຕໍ່ວຽກງານຂົງເຂດວັດຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໂດຍສະເພາະແມ່ນການຊົມເຊີຍຄະນພນຳ ແລະ ພະນັກງານ ໃນຂະແໜງການ ຖວທ ແຂວງອຸດົມໄຊ ທີ່ມີຄວາມຫ້າວຫັນ, ໜັກແໜ້ນ ສູ້ຊົນຜ່ານຜ່າຄວາມຫຍຸ້ງຍາກແຕ່ລະຍຸກແຕ່ລະສະໄໝ ມາຈົນເຖິງປະຈຸບັນນີ້. ພ້ອມທັງຊີ້ນຳໃຫ້ຄົ້ນຄວ້າ ແລະ ກຳແໜ້ນ 5 ບັນຫາໃຫຍ່ ດັ່ງນີ້: 1. ວຽກງານຖະແຫຼງຂ່າວ, ວັດທະນຳທ ແລະ ທ່ອງທ່ຽວ ຕ້ອງດຳເນີນໄປພ້ອມກັບວຽກງານກໍ່ສ້າງພັກ ໃຫ້ເປັນພື້ນຖານໃນການດຳເນີນວຽກງານ ພ້ອມທັງເອົາໃຈໃສ່ກໍ່ສ້າງພັກໃຫ້ປອດໃສ, ໜັກແໜ້ນ ແລະ ເຂັ້ມແຂງ ມີນ້ຳໃຈເສຍສະລະ ນ້ຳໃຈຮັບໃຊ້ປະຊາຊົນຢ່າງເຕັມທີ່. 2. ໃຫ້ມີຫານຄຸ້ມຄອງ, ການບໍລິຫານທີ່ມີປະສິດທິພາບ ໂດຍຖືເອົາລະບຽບການເປັນຫຼັກ ເປັນພື້ນຖານໃຫ້ມີຄວາມຖືກຕ້ອງ ແລະ ເປັນທຳ. 3. ດ້ານວຽກງານຖະແຫຼງຂ່າວ, ໃຫ້ນຳໃຊ້ທຸກພາຫະນະເຂົ້າໃນການສະໜອງຂໍ້ມູນຂ່າວສານ, ລະມັດລະວັງຂ່າວປອມ ຂ່າວບິດເບືອນເພື່ອໃຫ້ຜູ້ບໍລິໂພກຂໍ້ມູນຂ່າວສານ ມີສະຕິລະມັດລະວັງ ພ້ອມດຽວກັນນັ້ນກໍ່ຫັນໄປສູ່ລະບົບທີ່ທັນສະໄໝ, ໝູນໃຊ້ເຄື່ອງມືທີ່ທັນສະໄໝ ໃນການອັບເດດຂໍ້ມູນຂ່າວສານ ຢ່າງທັນການຢູ່ສະເໝີ. 4. ດ້ານວັດທະນະທຳໃຫ້ກຳແໜ້ນຄວາມສີວິໄລທາງດ້ານວັດຖຸ ຕິດພັນກັບຄວາມສີວິໄລທາງດ້ານຈິດໃຈ ພ້ອມທັງຄົ້ນຄິດວຽກງານວັດທະນຳອັນທີ່ເປັນຂອງເຊື້ອຊາດລາວໃຫ້ເປັນແຮງດຶງດູດສູ່ການທ່ອງທ່ຽວ. 5. ດ້ານການພັດທະນາການທ່ອງທ່ຽວ ໂດຍສະເພາະແມ່ນທ່ອງທ່ຽວທາງທຳມະຊາດ, ທ່ອງທ່ຽວທາງດ້ານມູນເຊື້ຶອ, ທ່ອງທ່ຽວແບບກະສິກຳ ໃຫ້ກາຍເປັນອຸດສາຫະກຳທ່ອງທ່ຽວ ແລະ ມີການເຕີບໃຫຍ່ຂະຫຍາຍຕົວ.
Loading...