ໃນວັນທີ 23 ຕຸລາ 2020 ທ່ານ ນາງ ສຸວັນເພັງ ບຸບຜານຸວົງ, ລັດຖະມົນຕີປະຈຳສຳນັກງານນາຍົກລັດ ຖະມົນຕີ ພ້ອມດ້ວຍ ຕາງໜ້າ 3 ອົງການຈັດຕັ້ງມະຫາຊົນ ຫ້ອງວ່າການສຳນັກງານນາຍົກລັດຖະມົນຕີ ແລະ ລູກຫຼານ, ຍາດຕິພີ່ນ້ອງ ຊາວເມືອງເຊໂປນ-ຜາບັງ ຈາກນະຄອນຫຼວງວຽງ​ຈັນ ໄດ້ນຳເອົາວັດຖຸປັດໃຈ ໄປມອບ ແລະ ແຈກຢາຍຊ່ວຍເຫຼືອປະຊາຊົນ ທີ່ປະສົບໄພນໍ້າຖ້ວມ ເມືອງເຊໂປນ, ເມືອງວິລະບູລີ, ເມືອງພີນ ແລະ ເມືອງນອງ ແຂວງສະ​ຫວັນນະເຂດ.

ເຄື່ອງທີ່ນຳໄປມອບ ແລະ ແຈກຢາຍຊ່ວຍເຫຼືອໃນຄັ້ງນີ້ ປະກອບມີ ເງິນສົດ 50 ລ້ານກີບ, ເຄື່ອງນຸ່ງຫົ່ມ ຈໍານວນ 60 ແກັດ, ນໍ້າດື່ມ, ເຂົ້າສານ ແລະ ອາຫານແຫ້ງ ຈຳນວນໜຶ່ງ ລວມມູນຄ່າກວ່າ 197 ລ້ານກີບ. ຊຶ່ງການມອບ-ຮັບການຊ່ວຍເຫຼືອດັ່ງກ່າວ, ກ່າວມອບໂດຍທ່ານ ລັດຖະມົນຕີປະຈຳສຳນັກງານນາຍົກ ແລະ ກ່າວຮັບແມ່ນທ່ານ ວົງສະຫວັນ ວຽງມະນີ, ເຈົ້າເມືອງໆເຊໂປນ; ທ່ານ ລຳແກ້ວ ແສງໜູທອງ ເຈົ້າເມືອງໆນອງ; ທ່ານ ສາລີ ວິນລາລີ ເຈົ້າເມືອງໆພີນ ແລະ ຕາງໜ້າເມືອງວິລະບູລີ ພ້ອມດ້ວຍ ພະນັກງານ ແລະ ພາກສ່ວນກ່ຽວຂ້ອງເຂົ້າຮ່ວມ. ຄຽງຄູ່ກັບການມອບເຄື່ອງຊ່ວຍເຫຼືອຜ່ານການຈັດຕັ້ງຂອງເມືອງທີ່ກ່ຽວຂ້ອງແລ້ວ, ຄະນະຂອງທ່ານ ນາງ ສຸວັນເພັງ ບຸບຜານຸວົງ ຍັງໄດ້ລົງຢ້ຽມຢາມ ແລະ ມອບເຄື່ອງຊ່ວຍເຫຼືອ ໃຫ້ປະຊາຊົນ ຢູ່ພື້ນທີ່ໄດ້ຮັບຜົນກະທົບຕົວຈິງ ໂດຍສະ ເພາະ ບ້ານເຊໂປນເກົ່າ ແລະ ບ້ານວັງຄົດ. ໃນໂອກາດນີ້, ທ່ານ ນາງ​ ສຸວັນເພັງ ບຸບຜານຸວົງ ໄດ້ຢື້ຢາມຖາມຂ່າວພໍ່ແມ່ປະຊາຊົນ ແລະ ນຳເອົາຄວາມຫວ່ງໃຍຂອງພັກ-ລັດ​ຖະບານ ມາຍັງພໍ່ແມ່ປະຊາຊົນ ຜູ້ປະສົບໄພນໍ້າຖ້ວມ, ພ້ອມທັງ ປຸກລະດົມກຳລັງໃຈ, ຊົມເຊີຍນໍ້າໃຈສາມັກຄີຮັກແພງ ຊ່ວຍເຫຼືອເຊິ່ງກັນ ແລະ ກັນ ຂອງທຸກພາກສ່ວນ ແລະ ເຊື່ອໝັ້ນວ່າ ພາຍໃຕ້ການນຳພາ-ຊີ້ນຳ ຂອງການຈັດຕັ້ງທຸກຂັ້ນ, ການປະກອບສ່ວນຊ່ວຍເຫຼືອ ແລະ ການຮ່ວມມື ຂອງທຸກພາກສ່ວນ ຈະຊ່ວຍເຮັດໃຫ້ການແກ້ໄຂ ແລະ ຟື້ນຟູຜົນກະທົບຄັ້ງນີ້ ຜ່ານໄປໄດ້ໂດຍໄວ. ອັນສຳຄັນ ທ່ານໄດ້ເນັ້ນໜັກ ໃຫ້ທຸກພາກສ່ວນ ພ້ອມກັນເອົາໃຈໃສ່ປົກປັກຮັກສາປ່າໄມ້ໃຫ້ອຸດົມສົມບູນ ແລະ ຍືນຍົງ; ຊຸກຍູ້ສົ່ງເສີມ ປະຊາຊົນ ຈັດຕັ້ງການຜະລິດ ຕາມເງື່ອນໄຂ, ທ່າແຮງ ແລະ ມູນເຊື້ອ ຂອງທ້ອງຖິ່ນ ເພື່ອສ້າງລາຍຮັບ ແລະ ປັບປຸງຊີວິດການເປັນຢູ່ຂອງເຂົາເຈົ້າ ໃຫ້ນັບມື້ນັບດີຂຶ້ນເປັນກ້າວໆ.

 

Loading...