ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທ່ານລັດຖະມົນຕີສາທາລະນະສຸກມອບອຸປະກອນການແພດໃຫ້ໂຮງໝໍຊຸມຊົນ ຢູ່ສອງເມືອງແຂວງບໍລິຄຳໄຊ

ໃນຕອນແລງຂອງວັນທີ 28 ມັງກອນ 2020 ນີ້, ທີ່ເມືຶອງວຽງທອງ, ແຂວງບໍລິຄຳໄຊ, ທ່ານຮສຈ ປອ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍ ບັນດາການນໍາຂອງແຂວງ ບໍລິຄໍາໄຊ ໄດ້ນໍາເອົາເຄື່ອງມືອຸປະກອນການແພດລວມມູນຄ່າ 640 ລ້ານກວ່າກີບ ມາມອບໃຫ້ໂຮງໝໍຊຸມຊົນເມືອງວຽງທອງ.

ເຄື່ອງມືອຸປະກອນການແພດທີ່ນຳມາມອບໃນຄັ້ງນີ້ປະກອບມີ ຕຽງນອນຄົນເຈັບ 1 ຕຽງ, ເຄື່ອງເອໂກ 1 ຊຸດ, ເຄື່ອງຊ່ວຍຫາຍໃຈເດັກ 1 ຊຸດ, ເຄື່ອງໃຫ້ຄວາມອົບອຸ່ນ (ດ້ວຍແສງ) 1 ຊຸດ, ເຄື່ອງຕິດຕາມເດັກໃນທ້ອງ 1 ຊຸດ ແລະ ອຸປະກອນການແພດປະເພດອື່ນໆອີກຈໍານວນໜຶ່ງ.
ໃຫ້ກຽດຕາງໜ້າໂຮງໝໍຊຸມຊົນເມືອງວຽງທອງຂຶ້ນຮັບເຄື່ອງຊ່ວຍເຫຼືອທີ່ນໍາມາມອບໃນຄັ້ງນີ້ ແມ່ນທ່ານ ກອງແກ້ວ ໄຊສົງຄາມ, ເຈົ້າແຂວງໆບໍລິຄໍາໄຊ, ໂດຍມີທ່ານເຈົ້າເມືອງໆວຽງທອງ ພ້ອມດ້ວຍ ພະນັກງານແພດໝໍພາຍໃນໂຮງໝໍເມືອງວຽງທອງເຂົ້າຮ່ວມ.

ໃນຕອນເຊົ້າຂອງມື້ຕໍ່ມາ ວັນທີ 29 ມັງກອນ 2020, ທ່ານຮສຈ ປອ ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ແລະ ບັນດາການນໍາຂອງແຂວງ ຍັງໄດ້ສຶບຕໍ່ນໍາເອົາເຄື່ອງມືອຸປະກອນການແພດອີກຈໍານວນໜຶ່ງ ລວມມູນຄ່າ 640 ລ້ານກວ່າກີບ ພ້ອມດ້ວຍລົດອາບຸຍລັງ 1 ຄັນ ມູນຄ່າ 65 ພັນໂດລາ ຫຼື ປະມານ 572 ລ້ານກີບ ມາມອບໃຫ້ໂຮງໝໍຊຸມຊົນເມືອງໄຊຈໍາພອນ.

ເຄື່ອງອຸປະກອນການແພດທີ່ນຳມາມອບໃຫ້ກັບໂຮງໝໍຊົມຊົນທັງ 2 ເມືອງຂອງແຂວງບໍລິຄໍາໄຊໃນຄັ້ງນີ້ ແມ່ນເປັນການປະກອບສ່ວນອັນສຳຄັນເຂົ້າໃນການພັດທະນາວຽກງານສາທາລະນະສຸກ ກໍ່ຄື ເປັນການກະຕຸກຊຸກຍູ້ໃຫ້ແກ່ການປະຕິບັດໜ້າທີ່ຂອງບັນດາແພດໝໍໃນການຮັກສາຄົນປ່ວຍ, ໂດຍສະເພາະແມ່ນເດັກນ້ອຍ ແລະ ແມ່ຍິງຖືພາ, ທັງເປັນການພັດທະນາລະບົບການປະຕິບັດງານຂອງແພດໝໍໃຫ້ທັນສະໄໝຂຶ້ນຕື່ມເປັນກ້າວໆ.
ນອກຈາກນີ້, ໃນໂອກາດທີ່ທ່ານລັດຖະມົນຕີກະຊວງສາທາລະນະສຸກ ໄດ້ລົງມາເຄື່ອນໄຫວວຽກງານໃນຄັ້ງນີ້, ທ່ານຍັງໄດ້ເລາະຊົມອາຄານຫ້ອງການ, ຈຸດປິ່ນປົວຄົນເຈັບ, ຫ້ອງກວດພະຍາດ, ຫ້ອງຜ່າຕັດ, ຫ້ອງວິເຄາະວິໃຈໃນດ້ານຕ່າງໆ ແລະ ທັງໄດ້ເດີນທາງໄປສໍາຫຼວດເບິ່ງ ໂຮງໝໍເມືອງໄຊຈໍາພອນຫຼັງໄໝ່ ຢູ່ເຂດເມືອງໄໝ່, ບ້ານນໍ້າອ້ອນອີກດ້ວຍ.

ຫຼັງຈາກນັ້ນ, ໃນຕອນບ່າຍຂອງວັນດຽວກັນ, ທ່ານທ່ານຮສຈ ປອ ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ພ້ອມດ້ອຍຄະນະ ແລະ ບັນດາການນໍາຂອງແຂວງ ຍັງໄດ້ເດີນທາງໄປສໍາຫຼວດເບິງ ການປັບປຸງກໍ່ສ້າງອາຄານຕຶກ ໂຮງໝໍເມືອງຄໍາເກີດ ທີ່ ກອງທຶນໜຶ່ງດວງໃຈບໍລິຄໍາໄຊຊ່ວຍເຫຼື່ອສັງຄົມ ໄດ້ສົມທົບທຶນ ເຂົ້າໃນການປັບປຸງກໍ່ສ້າງ ແລະ ສະໜອງອຸປະກອນການແພດໃນດ້ານຕ່າງໆ ໃຫ້ກັບໂຮງໝໍແຫ່ງດັ່ງກ່າວໃນໄລຍະຜ່ານມາຕື່ມອີກ.