ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 17 ມັງກອນ 2022, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກປີ 2022 ຜ່ານທາງວີດີໂອຢູ່ທີ່ນະຄອນຫຼວງປັກກິ່ງ, ທັງໄດ້ກ່າວຄຳປາໄສທີ່ມີຫົວຂໍ້ວ່າ “ຮັກສາຄວາມໝັ້ນໃຈຢ່າງໜັກແໜ້ນ ກ້າວເດີນໄປຂ້າງໜ້າຢ່າງກ້າຫານ, ຮ່ວມກັນສ້າງໂລກທີ່ດີງາມໃນຍຸກຫຼັງຈາກການແຜ່ລະບາດຂອງພະຍາດໂຄວິດ-19”.
ທ່ານສີຈິ້ນຜິງກ່າວເນັ້ນວ່າ, ປະຈຸບັນນີ້ ໂລກພວມປະເຊີນໜ້າກັບການປ່ຽນແປງທີ່ບໍ່ເຄີຍມີມາໃນຮອບຮ້ອຍປີຜ່ານມາ. ການປ່ຽນແປງຮອບນີ້ບໍ່ໄດ້ຈຳກັດຢູ່ໃນໄລຍະໜຶ່ງ ຫຼື ເຫດການໜຶ່ງ, ປະເທດໜຶ່ງ ຫຼື ເຂດແຄວ້ນໜຶ່ງເທົ່ານັ້ນ, ແຕ່ແມ່ນການປ່ຽນແປງຂອງຍຸກສະໄໝທີ່ເລິກເຊິ່ງ ແລະ ກວ້າງຂວາງ. ການປ່ຽນແປງຂອງຍຸກສະໄໝ ແລະ ການແຜ່ລະບາດຂອງພະຍາດໂຄວິດ-19 ທີ່ບໍ່ເຄີຍມີມາໃນຮອບຮ້ອຍປີຜ່ານມາໄດ້ສະຫຼັບສັບຊ້ອນກັນ, ໂລກໄດ້ເຂົ້າສູ່ໄລຍະທີ່ເກີດມີການປ່ຽນແປງ ແລະ ຄວາມວຸ້ນວາຍຮອບໃໝ່. ເຮັດແນວໃດຈຶ່ງຈະສາມາດເອົາຊະນະການແຜ່ລະບາດຂອງພະຍາດໂຄວິດ-19ໄດ້? ເຮັດແນວໃດຈຶ່ງຈະສາມາດສ້າງໂລກພາຍຫຼັງການແຜ່ລະບາດຂອງພະຍາດໃຫ້ໄດ້? ນີ້ແມ່ນບັນຫາສຳຄັນທີ່ປະຊາຊົນບັນດາປະເທດໃນໂລກສົນໃຈຮ່ວມກັນ, ກໍແມ່ນຫົວຂໍ້ສຳຄັນທີ່ພວກເຮົາຕ້ອງຄົ້ນຄວ້າແລະແກ້ໄຂໃຫ້ໄດ້ໂດຍດ່ວນ.
ທ່ານສີຈິ້ນຜິງກ່າວເນັ້ນວ່າ, ເມື່ອສັງເກດເບິ່ງປະຫວັດສາດແລ້ວເຫັນວ່າ, ມະນຸດໄດ້ພັດທະນາເຕີບໃຫຍ່ຂຶ້ນພາຍຫຼັງເອົາຊະນະການກວດສອບທຸກຄັ້ງ ແລະ ຜ່ານຜ່າວິກິດການທຸກຄັ້ງ. ພວກເຮົາຕ້ອງກ້າວເດີນໄປຂ້າງໜ້າທ່າມກາງຂະບວນວິວັດຂອງປະຫວັດສາດ, ແລະພັດທະນາຢູ່ທ່າມກາງກະແສຟອງແຫ່ງການພັດທະນາຂອງຍຸກສະໄໝ. ຕ້ອງຮູ້ວິທີຄົ້ນຄິດໃນການສົມທຽບແລະວິເຄາະປະຫວັດສາດຮອບວຽນໄລຍະຍາວ, ທັງຮູ້ວິທີສັງເກດແລະຮັບຮູ້ການປ່ຽນແປງຂອງໂລກຈາກລາຍລະອຽດ, ບົ່ມເພາະໂອກາດອັນໃໝ່ໃນວິກິດການ ແລະ ເປີດສະພາບການໃໝ່ໃນການປ່ຽນແປງ, ເຕົ້າໂຮມກຳລັງແຮງສັງລວມທີ່ເຂັ້ມແຂງເພື່ອເອົາຊະນະຄວາມຫຍຸ້ງຍາກ ແລະ ສິ່ງທ້າທາຍ. ທ່ານສີຈິ້ນຜິງໄດ້ວາງຂໍ້ສະເໜີ 4 ຂໍ້, ຄື:
ໜຶ່ງ, ຮ່ວມມືກັນ ເຕົ້າໂຮມກຳລັງແຮງສັງລວມເພື່ອເອົາຊະນະການແຜ່ລະບາດຂອງພະຍາດໂຄວິດ-19. ສອງ, ແກ້ໄຂຄວາມສ່ຽງຊະນິດຕ່າງໆ, ຊຸກຍູ້ເສດຖະກິດໂລກໃຫ້ຟື້ນຄືນຢ່າງໝັ້ນທ່ຽງ. ສາມ, ແກ້ໄຂຄວາມແຕກໂຕນກັນດ້ານການພັດທະນາ, ຟື້ນຟູພາລະກິດການພັດທະນາຂອງໂລກຄືນໃໝ່. ສີ່, ປະຖິ້ມແນວຄິດສົງຄາມເຢັນ, ບັນລຸການຢູ່ຮ່ວມກັນໂດຍສັນຕິ ແລະ ຕ່າງຝ່າຍຕ່າງມີຜົນປະໂຫຍດ.
ທ່ານສີຈິ້ນຜິງກ່າວເນັ້ນຕື່ມວ່າ, ປີ 2021 ແມ່ນປີທີ່ພັກກອມມູນິດຈີນສ້າງຕັ້ງຂຶ້ນຄົບຮອບ 100 ປີ. ພັກກອມມູນິດຈີນໄດ້ເຕົ້າໂຮມຄວາມສາມັກຄີ ແລະ ນຳພາປະຊາຊົນຈີນບຸກບືນສູ້ຊົນຢ່າງທໍລະຫົດອົດທົນເປັນໄລຍະຍາວນານ, ໄດ້ຮັບຜົນສຳເລັດທີ່ປະຈັກຕາຊາວໂລກໃນການສ້າງສາພັດທະນາປະເທດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ໄດ້ບັນລຸເປົ້າໝາຍທີ່ສ້າງສັງຄົມອີ່ມໜຳສຳລານໃຫ້ສຳເລັດຢ່າງຮອບດ້ານຕາມເວລາກຳນົດ, ໄດ້ຮັບໄຊຊະນະໃນບັ້ນລຶບລ້າງຄວາມທຸກຍາກຕາມເວລາກຳນົດ, ສາມາດແກ້ໄຂບັນຫາຄວາມທຸກຍາກເດັດຖານຄັ້ງປະຫວັດສາດ, ປັດຈຸບັນໄດ້ກ້າວເຂົ້າສູ່ຂະບວນການໃໝ່ແຫ່ງການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ຈີນຈະຊຸກຍູ້ການພັດທະນາດ້ວຍຄຸນນະພາບສູງຢ່າງເດັດດ່ຽວໜຽວແໜ້ນ, ຊຸກຍູ້ການປະຕິຮູບ ແລະ ເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ, ແລະຊຸກຍູ້ການສ້າງສາຄວາມສິວິໄລດ້ານນິເວດຢ່າງເດັດດ່ຽວໜຽວແໜ້ນ.