ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຕອນເຊົ້າວັນທີ 16 ພະຈິກນີ້, ຢູ່ທີ່ປັກກິ່ງ, ທ່ານສີຈີ້ນຜິງ ປະທານປະເທດຈີນໄດ້ພົບປະກັບທ່ານໂຈ ໄບເດັນ ປະທາ ນາທິບໍດີອາເມຣິກາດ້ວຍຮູບແບບຜ່ານທາງວິດີໂອ. ທ່ານສີຈີ້ນຜິງກ່າວວ່າ, ໃນສະເພາະໜ້ານີ້, ການພັດທະນາຂອງຈີນ ແລະ ອາເມຣິກາລ້ວນແຕ່ຢູ່ໃນໄລຍະສຳຄັນ. ຈີນ ແລະ ອາເມຣິກາໃນຖານະທີ່ເປັນສອງກຸ່ມເສດຖະກິດໃຫຍ່ທີ່ສຸດໃນໂລກ ແລະ ເປັນປະເທດສະມາຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດ, ຄວນເພີ່ມທະວີການພົວພັນ ແລະ ການຮ່ວມມືກັນ ທັງເຮັດວຽກງານພາຍໃນປະເທດຕົນໃຫ້ດີ ທັງແບກຫາບໜ້າທີ່ຄວາມຮັບຜິດຊອບທີ່ມີຕໍ່ສາກົນທີ່ຄວນປະຕິບັດ, ພ້ອມກັນຊຸກຍູ້ພາລະກິດອັນສູງສົ່ງກ່ຽວກັບສັນຕິພາບ ແລະ ການພັດທະນາຂອງມວນມະນຸດ. ນີ້ແມ່ນຄວາມປາຖະໜາຮ່ວມຂອງສອງປະເທດຈີນ-ອາເມຣິກາ ແລະ ປະຊາຊົນປະເທດຕ່າງໆໃນໂລກ, ທັງແມ່ນພາລະກຳຮ່ວມຂອງຜູ້ນຳສອງປະເທດຈີນ-ອາເມຣິກາ.
ທ່ານສີຈີ້ນຜິງກ່າວເນັ້ນວ່າ, ການຊຸກຍູ້ສາຍພົວພັນຈີນ ແລະ ອາເມຣິກາທີ່ຕ່າງຝ່າຍຕ່າງໄດ້ຮັບການພັດທະນາ ແລະ ປົກປັກຮັກສາສະພາບແວດລ້ອມສາກົນທີ່ມີສັນຕິພາບ ແລະ ສະຖຽນລະພາບ ພ້ອມທັງການຮັບມືກັບສິ່ງທ້າທາຍຂອງທົ່ວໂລກເຊິ່ງລວມທັງການປ່ຽນແປງຂອງດິນຟ້າອາກາດ ແລະ ການແຜ່ລະບາດຂອງພະຍາດໂຄວິດ-19, ລ້ວນແຕ່ຕ້ອງການສາຍພົວພັນຈີນ-ອາເມຣິກາທີ່ປອດໃສ ແລະ ໝັ້ນທ່ຽງ. ຈີນ ແລະ ອາເມຣິກາຄວນເຄົາລົບເຊິ່ງກັນແລະກັນ, ຢູ່ຮ່ວມກັນໂດຍສັນຕິ, ດຳເນີນການຮ່ວມມືເພື່ອຕ່າງຝ່າຍຕ່າງໄດ້ຮັບຜົນປະໂຫຍດ. ຂ້າພະເຈົ້າຍິນດີຮ່ວມກັບທ່ານປະທານາທິບໍດີໂຈ ໄບເດັນ, ສ້າງຄວາມຮັບຮູ້ທີ່ຄ້າຍຄືກັນ, ປະຕິບັດງານຢ່າງຕັ້ງໜ້າ, ຊັກນຳການພົວພັນຈີນ-ອາເມຣິກາໃຫ້ຂະຫຍາຍໄປໜ້າຢ່າງຕັ້ງໜ້າ. ນີ້ແມ່ນຄວາມຕ້ອງການທີ່ສ້າງຄວາມສຸກໃຫ້ແກ່ປະຊາຊົນສອງປະເທດ ທັງແມ່ນຄວາມຫວັງຂອງປະຊາຄົມໂລກ.
ທ່ານໂຈ ໄບເດັນກ່າວວ່າ: “ຂ້າພະເຈົ້າດີໃຈທີ່ໄດ້ມີໂອກາດພົບປະກັບທ່ານ. ຫວັງວ່າການສົນທະນາລະຫວ່າງພວກເຮົາຈະສາມາດດຳເນີນໄປແບບກົງໄປກົງມາ, ຄືທີ່ໄດ້ເຮັດໃນໄລຍະຜ່ານມາ. ຂ້າພະເຈົ້າເຫັນວ່າ, ໃນຖານະເປັນຜູ້ນຳຂອງປະເທດຈີນ ແລະ ປະເທດອາເມຣິກາ, ພວກເຮົາມີຄວາມຮັບຜິດຊອບ ແລະຮັບປະກັນວ່າ ການແຂ່ງຂັນລະຫວ່າງສອງປະເທດຈະບໍ່ກ້າວໄປສູ່ການປະທະກັນ, ບໍ່ວ່າຈະເປັນການກະທຳທີ່ມີເຈດຕະນາ ຫຼື ບໍ່ມີເຈດຕະນາກໍຕາມ. ຂ້າພະເຈົ້າເຫັນວ່າ, ພວກເຮົາຕ້ອງການສ້າງຄວາມຮັບຮູ້ທີ່ເປັນເອກະພາບກັນຄືນໃໝ່, ແກ້ໄຂຄວາມ ຂັດແຍ້ງກັນລະຫວ່າງພວກເຮົາຢ່າງກົງໄປກົງມາ, ສຸມຄວາມພະຍາຍາມຮ່ວມກັນໃນບັນຫາທີ່ພົວພັນເຖິງຜົນປະໂຫຍດຮ່ວມກັນ, ໂດຍສະເພາະໃນບັນຫາດ້ານການປ່ຽນແປງຂອງດິນຟ້າອາກາດຂອງໂລກ ກໍຄືບັນຫາທີ່ມີລັກສະນະທົ່ວໂລກ ແລະອື່ນໆ. ການພົວພັນລະຫວ່າງສອງປະເທດພວກເຮົາ, ບໍ່ພຽງແຕ່ມີຜົນສະທ້ອນທີ່ສຳຄັນຕໍ່ກັບສອງປະເທດພວກເຮົາເທົ່ານັ້ນ, ແຕ່ຍັງມີຜົນສະທ້ອນຕໍ່ທົ່ວໂລກນຳອີກ.”