ໃນຕອນບ່າຍຂອງວັນທີ 20 ເມສາ 2022 ນີ້ ຢູ່ທີ່ບ້ານແຈ້ງ ເມືອງທຸລະຄົມ ແຂວງວຽງຈັນ ໄດ້ຮັບກຽດຕ້ອນຮັບການລົງມາເຄື່ອນໄຫວຢ້ຽມຢາມ ແລະ ເຮັດວຽກ ຂອງ ທ່ານ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິ ການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ໂດຍໄດ້ຮັບການຕ້ອນຮັບຢ່າງອົບອຸ່ນຈາກຄະນະພັກ, ອົງ ການປົກຄອງເມືອງ, ການຈັດຕັ້ງບ້ານ ແລະ ພໍ່ແມ່ປະຊາຊົນເປັນຢ່າງດີ, ພ້ອມນັ້ນ ຍັງໄດ້ຮັບກຽດເຂົ້າຮ່ວມຈາກການນໍາຂອງແຂວງວຽງຈັນ ນໍາໂດຍ: ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ມີຮອງເລຂາພັກແຂວງ, ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ພະແນກການ, ກົມກອງ, ອົງການ ແລະ ພາກສ່ວນກ່ຽວຂ້ອງຂັ້ນແຂວງ ແລະ ຂັ້ນເມືອງເຂົ້າຮ່ວມ; ໃນພິທີອັນມີຄວາມໝາຍສໍາຄັນນີ້ ທ່ານ ນາງ ວົງເດືອນ ວັດຕະໂສ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆທຸລະຄົມ ໄດ້ຕາງໜ້າໃຫ້ຄະນະພັກ-ຄະນະນໍາເມືອງ ແລະ ປະຊາຊົນບັນດາເຜົ່າຊາວເມືອງ ຂຶ້ນກ່າວຕ້ອນຮັບ ແລະ ລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານຮອບດ້ານຂອງເມືອງທຸລະຄົມໃນໜຶ່ງປີ ຜ່ານມາ, ເຊິ່ງໄດ້ຍົກໃຫ້ເຫັນສະພາບລວມ, ສະພາບຈຸດພິເສດ ແລະ ທ່າແຮງຂອງເມືອງ, ການຈັດຕັ້ງຜັນຂະຫຍາຍມະຕິ XIຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ ຕິດພັນກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງເມືອງທຸລະຄົມ, ລາຍງານວຽກງານກໍ່ສ້າງພັກ-ພະນັກງານ ນັບແຕ່ຂັ້ນເມືອງຮອດຂັ້ນຮາກ ຖານ ຄຽງຄູ່ກັບການປະຕິບັດແຜນພັດທະນາເສດຖະກິດສັງ ຄົມຂອງອົງການປົກຄອງທຸກຂັ້ນວາງອອກ, ວຽກງານການປ້ອງ ກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ 19 ແລະ ວຽງການຂະບວນ ການປິ່ນອ້ອມອື່ນໆ, ຈາກນັ້ນ ທ່ານ ບົວລຽນ ວົງວິໄລ ເລຂາພັກບ້ານ-ນາຍບ້ານໆແຈ້ງ ໄດ້ຕາງໜ້າໃຫ້ພໍ່ແມ່ປະຊາຊົນຂຶ້ນລາຍງານຫຍໍ້ກ່ຽວກັບການຈັດຕັ້ງ ແລະ ການ ເຄື່ອນໄຫວວຽກງານຮອບດ້ານພາຍໃນໜຶ່ງປີຜ່ານມາ ເຊິ່ງມີເນື້ອໃນສໍາຄັນບາງຕອນວ່າ: ບ້ານແຈ້ງຈັດເຂົ້າໃນກຸ່ມບ້ານພັດທະ ນາຕານປ່ຽວ ເປັນບ້ານໜຶ່ງຂອງ 42 ບ້ານທົ່ວເມືອງ, ມີເນື້ອທີ່ທັງໝົດ 1,152,22 ເຮັກຕ້າ, ມີພົນລະເມືອງ 2.044 ຄົນ, ຍິງ 1,044ຄົນ, ມີ 395 ຫລັງຄາ, ຈັດຕັ້ງເປັນ 1 ໜ່ວຍພັກ ຂຶ້ນກັບຄະນະພັກຮາກຖານກຸ່ມບ້ານຕານປ່ຽວ ໃຕ້ການນໍາພາໂດຍກົງຂອງຄະນະປະຈໍາພັກເມືອງ, ເນື້ອທີ່ຜະລິດນາປີ 443,95 ຮຕ, ນາແຊງ 120 ຮຕ, ເນື້ອທີ່ຄັງລ້ຽງ ສັດ-ໜອງປາ ແລະ ອື່ນໆ47,17 ຮຕ, ບ້ານແຈ້ງມີລະບົບຊົນລະ ປະທານສະໜອງນໍ້າເຂົ້າສູ່ການຜະລິດໄດ້ຕະຫລອດປີ, ແຕ່ໃດໆມາບ້ານແຈ້ງເຄີຍເປັນບ້ານທີ່ມີຄວາມເຂັ້ມແຂງໜັກແໜ້ນ ແລະ ເປັນບ້ານມີຊື່ສຽງຂອງເມືອງ, ເປັນແຫລ່ງຜະລິດສະບຽງອາ ຫານຈາກການປູກຝັງ-ລ້ຽງສັດ, ເປັນອູ່ເຂົ້າອູ່ປາຂອງຊາວເມືອງ ແລະ ເມືອງອ້ອມຂ້າງ, ເນື່ອງຈາກບ້ານແຈ້ງມີທ່າແຮງເອື້ອອໍານວຍທາງດ້ານການຜະ ລິດກະສິກໍາມາແຕ່ດົນນານ ຍ້ອນມີເນື້ອທີ່ກວ້າງ ຂວາງ, ມີດິນອຸດົມສົມບູນ, ພິເສດມີສາຍນໍ້າງື່ມ ນອກຈາກໄດ້ສະ ໜອງນໍ້າເຂົ້າສູ່ການຜະລິດແລ້ວ ຍັງສາມາດແກ້ໄຂຊີວິດການເປັນຢູ່ຈາກການຫາປາລ້ຽງຊີບ ແລະ ມີນໍ້າໄວ້ໃຫ້ສັດລ້ຽງກິນ; ນອກນັ້ນປະ ຊາຊົນຍັງມີມູນເຊື້ອດຸໝັ່ນຮັກການອອກແຮງງານເພີ່ມພູນຜະ ລິດຜົນ, ມູນເຊື້ອຮັກບ້ານເກີດເມືອງນອນ, ຮັກແພງສາມັກຄີຊ່ວຍເຫຼືອເຊິ່ງກັນ ແລະ ກັນ, ມີຄວາມເອກະພາບສູງຕໍ່ການນໍາພາຂອງພັກ, ຂອງຄະນະພັກທຸກຂັ້ນ ເຊິ່ງໃນເມື່ອກ່ອນບ້ານແຈ້ງຍັງເປັນເຂດເຄື່ອນໄຫວຂອງພະນັກ ງານຂົນຂວາຍຢູ່ແນວຫລັງ ເພື່ອເປັນເສນາທິການໃຫ້ຄະນະພັກຂັ້ນເທິງ ແລະ ໃຫ້ກໍາລັງຝ່າຍປະຕິວັດປົດປ່ອຍປະເທດຊາດທີ່ສໍາຄັນອີກແຫ່ງໜຶ່ງ; ເຊິ່ງມາເຖິງໄລຍະປະຈຸບັນ ຄະນະພັກ- ອົງການປົກຄອງບ້ານ ກໍ່ໄດ້ພ້ອມພຽງກັນປົກປັກຮັກສາ ແລະ ສ້າງສາບ້ານ ໄປຕາມການຊີ້ນໍາ-ນໍາພາຂອງພັກ, ສືບຕໍ່ສຸມໃສ່ວຽກ ງານປູກຝັງລ້ຽງສັດ ປະສົມປະສານກັບເຕັກນິກວິທະຍາສາດເພື່ອຫລຸດຜ່ອນແຮງງານຄົນ, ຂະຫຍາຍການຜະລິດເປັນສິນຄ້າ, ຜະ ລິດແນວພັນເຂົ້າ ແລະ ຜະລິດເຂົ້າໃຫ້ເປັນສິນຄ້າໃຫ້ນັບວັນຫລາຍຂຶ້ນ ຄຽງຄູ່ກັບການປົກປັກຮັກສາບ້ານນາມມະຍົດຕ່າງໆທີ່ໄດ້ປະກາດຮັບ ຮອງແລ້ວໃຫ້ມີຄວາມຍືນຍົງຢ່າງສົມກຽດ; ພາຍຫລັງໄດ້ຮັບຟັງການລາຍງານຂອງທ່ານເຈົ້າເມືອງ ແລະ ນາຍ ບ້ານ, ທ່ານ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດມີຄໍາເຫັນໂອ້ລົມ ເຊິ່ງໂດຍລວມແລ້ວ ທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານໃນແຕ່ລະດ້ານທີ່ປະຊາ ຊົນຊາວບ້ານແຈ້ງ ກໍ່ຄືຊາວເມືອງທຸລະຄົມ ສູ້ຊົນຍາດມາໄດ້, ພ້ອມນັ້ນ ທ່ານຍັງໄດ້ຖາມຂ່າວຄາວສຸກທຸກຂອງປະຊາຊົນ, ນໍາເອົາຄວາມເປັນຫ່ວງເປັນໃຍຂອງກົມການເມືອງ, ຂອງຄະນະເລຂາທິກາສູນກາງພັກ ກໍ່ຄືຄະນະບໍລິຫານງານສູນກາງພັກ ມາຍັງຊາວເມືອງທຸລະຄົມ ກໍ່ຄືຊາວແຂວງວຽງຈັນທຸກຖ້ວນໜ້າ;
ທ່ານຫົວໜ້າຄະນະຈັດຕັ້ງສູນກາງພັກ ໄດ້ຮຽກຮ້ອງ ແລະ ເນັ້ນໜັກ ໃຫ້ສືບຕໍ່ສຸມໃສ່ການຈັດຕັ້ງຜັນຂະຫຍາຍມະຕິ XI ຂອງພັກ, ວຽກງານປັບປຸງກໍ່ສ້າງ ແລະ ຂະຫຍາຍພັກ ດ້ວຍປະລິມານ ແລະ ຄຸນນະພາບຢ່າງສົມເຫດສົມຜົນ, ພ້ອມກັນຜັນຂະຫຍາຍມະຕິຂອງພັກ, ຂອງຄະນະພັກທຸກຂັ້ນເປັນແຜນງານລະອຽດ ຕິດພັນກັບການປະເມີນສະຫລຸບຖອດຖອນບົດ ຮຽນເປັນແຕ່ລະໄລຍະ, ສົ່ງເສີມບົດຮຽນຕັ້ງໜ້າ, ແກ້ໄຂແນວຄິດຄອງເດີມ, ຄໍາພີຕາຍຕົວ, ມັກງ່າຍ, ອາດຍາສິດ ແລະ ສິ່ງຫຍໍ້ທໍ້ອື່ນໆທີ່ອາດເກີດຂຶ້ນໃນຖັນແຖວພະນັກງານສະມາຊິກພັກ ເພື່ອແນໃສ່ສ້າງໃຫ້ພັກເຂັ້ມແຂງໜັກແໜ້ນປອດໃສ ນັບແຕ່ຂັ້ນພື້ນຖານຂຶ້ນໄປ, ເພີ່ມທະວີຄວາມສາມັກຄີເປັນຈິດໜຶ່ງໃຈດຽວເພື່ອເຂົ້າຮ່ວມ, ມີສ່ວນຮ່ວມ ຈັດຕັ້ງປະຕິບັດແນວທາງຂອງພັກ, ແຜນພັດທະນາເສດຖະກິດສັງຄົມຂອງອົງການປົກຄອງແຕ່ລະຂັ້ນວາງອອກຢ່າງເປັນຮູບປະທໍາ, ສ້າງຄອບຄົວຕົວແບບໃຫ້ໄດ້ຫລາຍຂະແໜງການ, ສຸມໃສ່ການຜະລິດເປັນສິນຄ້າໃຫ້ກວ້າງຂວາງ, ມີຜະລິດຕະພັນຫລາກຫລາຍ ທີ່ມີຄຸນນະ ພາບ, ສະອາດ ແລະ ປອດໄພ, ເຂົ້າຮ່ວມຢ່າງແຂງແຮງເພື່ອຕອບໂຕ້ກັບການລະບາດຂອງເຊື້ອພະຍາດໂຄວິດ 19, ຕ້ອງຮຽນຮູ້ເຂົ້າໃຈວິທີປ້ອງກັນຢ່າງຖືກຕ້ອງເພື່ອຫລີກເວັ້ນຜົນກະທົບຈາກເຊື້ອພະຍາດດັ່ງກ່າວ; ໃນໂອກາດຕອນທ້າຍການນໍາຂອງແຂວງວຽງຈັນ ແລະ ເມືອງທຸລະຄົມ ຍັງໄດ້ນໍາພາທ່ານຫົວໜ້າຄະນະຈັດຕັ້ງສູນກາງພັກ ໄປຢ້ຽມຢາມກຸ່ມສະຫະກອນຜະ ລິດ ແລະ ແປຮູບເຂົ້າຂອງບ້ານແຈ້ງ ແລະ ໄປຄໍານັບກາບໄຫວ້ຫໍສີລາຈາລຶກວິລະບູລຸດນັກຮົບປະສົມລາວ-ຫວຽດນາມ ຢູ່ທີ່ບ້ານໂພນແຮ່ອີກດ້ວຍ.
