ໃນໂອກາດທີ່ເດີນທາງໄປຢ້ຽມຢາມ ແລະມອບເຄື່ອງຊ່ວຍເຫລືອໃຫ້ປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ເມືອງຊົນນະບູລີແຂວງສະຫວັນນະເຂດໃນລະຫວ່າງວັນທີ 14-15 ພະຈິກ 2020 ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ໃຫ້ກຽດໂອ້ລົມພະນັກງານການນໍາຂອງແຂວງ ຢູ່ທີ່ຫ້ອງວ່າການປົກຄອງແຂວງສະຫວັນນະເຂດ ມີທ່ານ ເພັດ ພົມພິພັກ ກໍາມະການສູນກາງພັກ, ລັດຖະມົນຕີກະຊວງກະສິກໍາ ແລະປ່າໄມ້ຮ່ວມເຄື່ອນໄຫວ; ໂດຍໄດ້ຮັບການຕ້ອນຮັບຈາກທ່ານສັນຕິພາບ ພົມວິຫານ ກໍາມະການສູນກາງພັກ, ເລຂາພັກແຂວງ ເຈົ້າແຂວງສະຫວັນນະເຂດ ບັນດາທ່ານຄະນະປະຈໍາພັກແຂວງເຂົ້າຮ່ວມຮັບຟັງ.
ທ່ານສັນຕິພາບ ພົມວິຫານ ໄດ້ລາຍງານສະພາບການນໍ້າຖ້ວມ, ການບັນເທົາທຸກໃຫ້ປະຊາຊົນໃນເບື້ອງຕົ້ນ ແລະການກະກຽມດໍາເນີນກອງປະຊຸມໃຫຍ່ອົງຄະນະພັກແຂວງຄັ້ງທີ IX ໃຫ້ທ່ານຮອງນາຍົກໄດ້ຮັບຊາບ, ນັບແຕ່ເດືອນກັນຍາ ຫາ ເດືອນຕຸລາ ໄດ້ມີພາຍຸຕິດຕໍ່ກັນຫລາຍລູກພັດຜ່ານເຂົ້າມາເຮັດໃຫ້ຝົນຕົກແຮງ ເຮັດໃຫ້ແມ່ນ້ຳທີ່ສໍາຄັນຄື: ນ້ຳເຊບັ້ງຫຽງ, ເຊໂປນ, ເຊລະນອງ ແລະເຊກອກ ເພີ່ມຂຶ້ນລົ້ນຝັ່ງ ໄຫລຖ້ວມເນື້ອທີ່ບ່ອນຕໍ່າ ແລະເນື້ອທີ່ຕອນລຸ່ມຂອງເຊບັ້ງຫຽງ. ຖ້ວມແຮງທີ່ສຸດແມ່ນວັນທີ 18 ຕຸລາໂດຍສະເພາະເມືອງເຊໂປນ ແມ່ນຖ້ວມໜັກແບບບໍ່ເຄີຍມີມາກ່ອນໃນຮອບຫຼາຍສິບປີ. ເຮັດໃຫ້ 8 ເມືອງ ຖືກຜົນກະທົບ ແລະນ້ຳຖ້ວມໝັກຄື: ເມືອງພີນ, ວິລະບູລີ, ເມືອງນອງ, ຈຳພອນ, ຊົນນະບູລີ, ສອງຄອນແລະເມືອງທ່າປາທອງ. ບ້ານເຮືອນປະຊາຊົນເສຍຫາຍຈຳນວນ 141 ບ້ານ, 10.908 ຫຼັງຄາເຮືອນ 11.710 ຄອບຄົວ, ພົນລະເມືອງ 64.999 ຄົນ, ເຮືອນເປ່ເພທັງໝົດ 120 ຫຼັງ, ເນື້ອທີ່ທໍາການຜະລິດເສຍຫາຍ 23.852 ເຮັກຕາ, ສັດລ້ຽງຕາຍ ແລະສູນຫາຍ, ລະບົບຊົນລະປະທານ, ເສັ້ນທາງເປ່ເພເສຍຫາຍ, ບັນດາໂຮງຮຽນ-ສຸກສາລາ ແລະພື້ນຖານໂຄງລ່າງອື່ນໆໄດ້ຮັບຜົນກະທົບ, ຄາດຄະເນເບື້ອງຕົ້ນມູນຄ່າເສຍຫາຍປະມານ 215 ຕື້ກ່ວາກີບ.
ສຳລັບການໃຫ້ການຊ່ວຍເຫຼືອເບື້ອງຕົ້ນຂອງຄະນະກຳມະການຄຸ້ມຄອງໄພພິບັດແຂວງໄດ້ລະດົມພະນັກງານ, ທະຫານ, ຕຳຫຼວດ, ຊາວໜຸ່ມລົງເກັບກູ້ເຂົ້ານາປີແລະຊ່ວຍຍົກຍ້າຍປະຊາຊົນໄປຢູ່ສູນບ່ອນປອດໄພໄດ້ທັງໝົດ 3.252 ເທື່ອຄົນ; ແຈກເຂົ້າສານ 18.800 ໂຕນ, ເຄື່ອງອຸປະໂພກ-ບໍລິໂພກອື່ນໆ ລວມມູນຄ່າໃຫ້ການຊ່ວຍເຫຼືອເບື້ອງຕົ້ນເປັນເງິນ 765 ລ້ານກວ່າກີບ; ນອກຈາກນີ້ຍັງໄດ້ປຸກລະດົມການປະກອບສ່ວນທົ່ວສັງຄົມໄດ້ທັງໝົດ 69 ພາກສ່ວນລວມມູນຄ່າທັງໝົດ 1.451 ລ້ານກວ່າກີບ.
ໃນໂອກາດນີ້ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມແລະໃຫ້ທິດຊີ້ນໍາການນໍາຂອງແຂວງ ໂດຍໃຫ້ການນໍາຂອງແຂວງຮີບຮ້ອນໃຫ້ການຊ່ວຍເຫຼືອ ແລະຟື້ນຟູຊີວິດການເປັນຢູ່ຂອງປະຊາຊົນ ໃຫ້ກັບຄືນສູ່ສະພາບປົກກະຕິໂດຍໄວ, ການແກ້ໄຂໃນສະເພາະໜ້າ ຕ້ອງຮີບຮ້ອນລະດົມການຊ່ວຍເຫຼືອເຂົ້າກິນ ທັງຈັດແຈງແຈກຢາຍເຂົ້າທີ່ທົ່ວສັງຄົມຊ່ວຍເຫຼືອແລະການຊ່ວຍເຫຼືອຂອງຕ່າງປະເທດ ເພື່ອໃຫ້ຜູ້ໄດ້ຮັບຜົນກະທົບມີເຂົ້າກິນ; ສ້ອມແປງແລະປຸກສ້າງທີ່ຢູ່ອາໄສໃຫ້ປະຊາຊົນທີ່ບໍ່ມີບ່ອນພັກທັງບ່ອນພັກຊົ່ວຄາວແລະຖາວອນ; ຮີບຮ້ອນຟື້ນຟູອາຄານສະຖານທີ່ຕ່າງໆ ເຊັ່ນ: ສຸກສາລາວັດວາອາຮາມ ແລະໂຮງຮຽນໃຫ້ນັກຮຽນໄດ້ເຂົ້າຮຽນເປັນປົກກະຕິແລະຕໍ່ເນື່ອງ; ຈັດສັນທີ່ດິນທໍາການຜະລິດໃຫ້ປະຊາຊົນທີ່ຖືກຜົນກະທົບໜັກ ແລະບໍ່ສາມາດທໍາການຜະລິດຢູ່ບ່ອນເກົ່າໄດ້; ປັບປຸງສ້ອມແປງແລະສ້າງເງື່ອນໄຂໃຫ້ປະຊາຊົນສາມາດທໍາການຜະລິດໃນລະດູແລ້ງໂດຍໄວ ເປັນຕົ້ນສ້ອມແປງຊົນລະປະທານ, ຈັກສູບນໍ້າ, ສະໜອງແນວພັນປູກແລະອື່ນໆ ໂດຍສົມທົບລະຫວ່າງການສະໜອງງົບປະມານຂອງລັດ ແລະການປຸກລະດົມກຳລັງແຮງສັງລວມຂອງປະຊາຊົນເຂົ້າໃນການສ້ອມແປງ ເພື່ອໃຫ້ສາມາດສະຫນອງນໍ້າໃຫ້ແກ່ການຜະລິດໃນລະດູແລ້ງນີ້ພ້ອມທັງສ້ອມແປງຖະໜົນຫົນທາງທີ່ເປ່ເພ ເພື່ອໃຫ້ສັນຈອນໄປ-ມາ ຂົນສົ່ງອຸປະກອນທໍາການຜະລິດ ແລະຜົນຜະລິດ; ຄຽງຄູ່ກັນນີ້ກໍຕ້ອງຊຸກຍູ້ສົ່ງເສີມການຜະລິດໃນລະດູແລ້ງຂອງປະຊາຊົນ ໂດຍການປູກພືດໜ້າແລ້ງຊະນິດຕ່າງໆເພື່ອທົດແທນຜົນຜະລິດທີ່ສູນເສຍໄປກັບໄພນໍ້າຖ້ວມໃຫ້ສາມາດສະໜອງສະບຽງອາຫານໃນລະດູແລ້ງນີ້ເພື່ອບໍ່ໃຫ້ເກີດໄພອຶດຫິວ ແລະສາມາດແຮໄວ້ໃນໄລຍະຍາວພ້ອມທັງວາງແຜນການຜະລິດໄລຍະຍາວເພື່ອໃຫ້ຮັບປະກັນທາງດ້ານສະບຽງອາຫານໃຫ້ປະຊາຊົນຕື່ມອີກ;
ນອກຈາກນີ້ໃຫ້ສືບຕໍ່ເອົາໃຈໃສ່ການເຝົ້າລະວັງ ແລະສະກັດກັ້ນການແຜ່ລະບາດຂອງພະຍາດຕາມລະດູການ ພິເສດແມ່ນເອົາໃຈໃສ່ໃນການເຝົ້າລະວັງແລະສະກັດກັ້ນການແຜ່ລະບາດຂອງພິຍາດໂຄວິດ 19 ເນື່ອງຈາກແຂວງສະຫວັນນະເຂດ ເປັນແຂວງທາງຜ່ານ ແລະເປັນປະຕູເຊື່ອມຕໍ່ກັບບັນດາປະເທດທີ່ສໍາຄັນຂອງລາວ. ສ່ວນການກະກຽມດໍາເນີນກອງປະຊຸມໃຫຍ່ອົງຄະນະພັກແຂວງ ເຫັນວ່າອານຸກໍາມະການຕ່າງໆ ໄດ້ກະກຽມຮອບດ້ານແລ້ວໃນນີ້ໃຫ້ເອົາໃຈໃສ່ບາງບັນຫາຕື່ມ ຄືເອົາໃຈໃສ່ການຮັກສາຄວາມສະຫງົບໃນທົ່ວປວງຊົນ ຮັບປະກັນໃຫ້ສັງຄົມມີຄວາມສະຫງົບປອດໄພ ໂດຍຫັນວຽກງານປ້ອງກັນຄວາມສະຫງົບໃຫ້ເປັນຂະບວນການຂອງປະຊາຊົນ ແລະການຮັກສາຄວາມສະຫງົບພາຍໃນພັກ.

 

ໂດຍ: ແສງເພັດແຊ່ຈ່າວ

Loading...