ວັນທີ 31 ສິງຫາ 2024 ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ພ້ອມຄະນະໄດ້ຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫຼວງວຽງຈັນ ຢູ່ບ້ານດົງໂພສີ ເມືອງຫາດຊາຍຟອງ ຕ້ອນຮັບໂດຍ ທ່ານ ພັນໂທ ອຸດສາ ລາສະທອນ ຫົວໜ້າຄະນະຄຸ້ມຄອງດ່ານສາກົນສະຖານີລົດໄຟທ່ານາແລ້ງ ແລະ ດ່ານສາກົນທ່າບົກທ່ານາແລ້ງ; ທ່ານ ສຸກສະຫວັນ ບົວພາ ຫົວໜ້າພາສີປະຈຳດ່ານສາກົນສິນຄ້າທ່າບົກທ່ານາແລ້ງ; ທ່ານ ຈັນທອນ ສິດທິໄຊ ປະທານບໍລິສັດ ວຽງຈັນໂລຊິດສະຕິກພາກ ຈຳກັດ; ທ່ານ ອາລຸນແກ້ວ ກິດຕິຄຸນ ປະທານກຳມະການຍຸດທະສາດ ແລະ ການວາງແຜນບໍລິສັດ ພີທີແອວໂຮນດິ້ງ ຈຳກັດ; ທ່ານ ສີລາ ວຽງແກ້ວ ຮອງປະທານກຳມະການບໍລິຫານການຄ້າ ແລະ ລະບຽບການບໍລິສັດ ພີທີແອວໂຮນດິ້ງ ຈຳກັດ; ທ່ານ ນາງ ມະໂນລາ ປະເສີດ ຮອງປະທານບໍລິສັດ ພີທີແອວໂຮນດິ້ງ ຈຳກັດ; ທ່ານ ຈຳປາ ຄຳສຸກໃສ ຮອງປະທານຝ່າຍພັດທະນາອາສັງຫາລິມະຊັບ ແລະ ການລົງທຶນບໍລິສັດ ພີທີແອວໂຮນດິ້ງ ຈຳກັດ; ທ່ານ ວຽງຄອນ ສິດທິໄຊ ຮອງປະທານບໍລິສັດ ວຽງຈັນໂລຊິດສະຕິກພາກ ຈຳກັດ; ທ່ານ ສາຄອນ ພິລາງາມ ຜູ້ອຳນວຍການໃຫຍ່ບໍລິສັດ ທ່າບົກທ່ານາແລ້ງ ຈຳກັດຜູ້ດຽວ ພ້ອມດ້ວຍຄະນະບໍລິຫານ ແລະ ພະນັກງານ ບໍລິສັດ ທ່າບົກທ່ານາແລ້ງ ຈຳກັດຜູ້ດຽວ ແລະ ບໍລິສັດ ວຽງຈັນໂລຊິດສະຕິກພາກ ຈຳກັດ.
ທ່ານ ຈັນທອນ ສິດທິໄຊ ໄດ້ກ່າວຕ້ອນຮັບພ້ອມທັງລາຍງານຄວາມເປັນມາຂອງໂຄງການໃຫ້ຮູ້ວ່າ: ໂຄງການດັ່ງກ່າວເປັນໂຄງການຍຸດທະສາດສຳຄັນໜຶ່ງທີ່ເຊື່ອມໂຍງເຊື່ອມຈອດດ້ານການຂົນສົ່ງການຄ້າ ຫັນ ສປປ ລາວ ຈາກປະເທດບໍ່ມີຊາຍແດນຕິດກັບທະເລ ກາຍເປັນປະເທດເຊື່ອມໂຍງເຊື່ອມຈອດດ້ານການຂົນສົ່ງການຄ້າ ດ້ານຍຸດທະສາດຂອງລັດຖະບານ; ເປັນໂຄງການໜຶ່ງຂອງລາວໂລຊິດສະຕິກລິ້ງໂດຍອີງໃສ່ການຜັນຂະຫຍາຍນະໂຍບາຍວ່າດ້ວຍການເຊື່ອມໂຍງເຊື່ອມຈອດເອົາຈຸດທີ່ຕັ້ງຂອງປະເທດລາວເຮົາສ້າງເປັນຈຸດແຂງເພື່ອປະກອບສ່ວນເຂົ້າໃນວຽກງານການຂົນສົ່ງການຄ້າ. ລາວໂລຊິດສະຕິກລິ້ງ ປະກອບມີທ່າເຮືອຢູ່ວຸ່ງອ່າງ ສສ ຫວຽດນາມ, ເສັ້ນທາງລົດໄຟລາວ-ຫວຽດນາມ, ເຂດໂລຊິດສະຕິກຢູ່ແຂວງຄຳມ່ວນ ແລະ ເຂດໂລຊິດສະຕິກ ຢູ່ນະຄອນຫຼວງວຽງຈັນ ເຊິ່ງທັງໝົດນີ້ແມ່ນຍຸດທະວສາດຂອງລັດຖະບານລາວ ເຊິ່ງເປົ້າໝາຍຂອງລາວໂລຊິດສະຕິກລິ້ງ ຖ້າຫາກເສັ້ນທາງລົດໄຟເຊື່ອມໂຍງກັບທ່າເຮືອວຸ້ງອ່າງທີ່ຜ່ານແຂວງຄຳມ່ວນ ຫາ ແຂວງຮ່າຕິ້ງ ຫາ ທ່າເຮືອງວຸ່ງອ່າງ ແມ່ນຈະເຮັດໃຫ້ປະເທດລາວມີຈຸດປ່ຽນຈາກປະເທດທີ່ບໍ່ມີຊາຍແດນຕິດກັບທະເລກາຍເປັນປະເທດທີ່ເຊື່ອມໂຍງກັບທະເລ ປັດຈຸບັນລັດຖະບານໄດ້ຮ່ວມກັບບໍລິສັດ ລາວເອເຊຍຮ່ວມທຶນກັບ ຫວຽດນາມ ສ້າງຕັ້ງໂຄງການທ່າເຮືອວຸ່ງອ່າງ ກຸ່ມບໍລິສັດ ພີທີແອວໂຮນດິ້ງ ຈຳກັດ ໄດ້ຮັບການມອບໝາຍຈາກລັດຖະບານສ້າງຕັ້ງເສັ້ນທາງລົດໄຟລາວ-ຫວຽດນາມ ປັດຈຸບັນໄດ້ສຳເລັດການສຶກສາສຳຫຼວດອອກແບບດ້ານສິ່ງແວດລ້ອມຕ່າງໆ ຍັງຢູ່ໃນຂັ້ນຕອນສັນຍາເນື້ອໃນ ແລະ ການປະກອບແຫຼ່ງທຶນ ຖ້າເສັ້ນທາງລົດໄຟສຳເລັດຈະເຮັດໃຫ້ລາວເຮົາມີທາງອອກສູ່ທະເລໄປສູ່ປາຊີຟິກ ຍົກສູງການຜະລິດ ການຄ້າ ກະສິກຳ ແລະ ການທ່ອງທ່ຽວ ໃນນັ້ນເຂດໂລຊິດສະຕິກຢູ່ຕາມເສັ້ນທາງລົດໄຟລາວ-ຫວຽດນາມແລ້ວເຊື່ອມໂຍງໃສ່ເຂດໂລຊິດສະຕິກນະຄອນຫຼວງວຽງຈັນ.
ໂຄງການທ່າບົກທ່ານາແລ້ງແມ່ນນອນຢູ່ໃນໂຄງການຍຸດທະສາດຫຼັກທີ່ລັດຖະບານໄດ້ຊຸກຍູ້ ແລະ ສົ່ງເສີມ ກຸ່ມບໍລິສັດ ພີທີແອວໂຮນດິ້ງ ຈຳກັດ ໄດ້ເຮັດການກໍ່ສ້າງ ແລະ ເປີດບໍລິການໃນທ້າຍປີ 2021 ໂຄງການມີເນື້ອທີ່ທັງໝົດ 418 ເຮັກຕາ ໃນນັ້ນເນື້ອທີ່ເຂດໂລຊິດສະຕິກ 327 ເຮັກຕາ ແລະ ທ່າບົກທ່ານາແລ້ງເນື້ອທີ່ 98 ເຮັກຕາ ເຊິ່ງເປັນການລົງທຶນຂອງເອກະຊົນລາວ 100% ເປັນແຫຼ່ງທຶນຈາກແຫຼ່ງທຶນສາກົນ ເປັນໂຄງການດຽວທີ່ ສປປ ລາວ ໄດ້ຮັບແຫຼ່ງທຶນຈາກທະນາຄານໂລກ ດ້ວຍມູນຄ່າໂຄງການ 727 ລ້ານໂດລາສະຫະລັດ ປັດຈຸບັນບໍລິສັດສຳເລັດພັດທະນາໂຄງການທ່າບົກທ່ານາແລ້ງໃນໄລຍະທີ 1 ເລີ່ມກໍ່ສ້າງເດືອນທັນວາ 2020 ແລະ ສຳເລັດເປີດບໍລິການພ້ອມດຽວເປີດເສັ້ນທາງລົດໄຟລາວ-ຈີນໃນວັນທີ 4 ທັນວາ 2021 ຫ່າງກັນພຽງ 2 ວັນ ແລະ ສືບຕໍ່ກໍ່ສ້າງໂຄງການໄລຍະທີ 2 ເຂດໂລຊິກສະຕິກໃນເນື້ອທີ່ 327 ເຮັກຕາ; ການພັດທະນາປະກອບດ້ວຍ 8 ເຂດຄື: ເຂດສາງເກັບມ້ຽນນໍາມັນ, ເຂດຜະລິດສົ່ງອອກ (ເຂດອຸດສາຫະກຳເບົາ), ເຂດໂລຊິດສະຕິກ ພາກ (ເຂດສາງສິນຄ້າ ແລະ ສາງເຢັນ), ເຂດການຄ້າ, ເຂດເຕັກໂນໂລຊີ, ເຂດການເງິນ, ເຂດໂຮງງານກັ່ນ ແລະ ຫຼອມຄໍາ, ແລະ ເຂດກັກກັ້ນພືດ ແລະ ສັດ ມູນຄ່າການກໍ່ສ້າງປະມານ 500 ລ້ານໂດລາສະຫະລັດ ຄາດໝາຍການກໍ່ສ້າງຈະໃຫ້ສຳເລັດພາຍໃນ 3 ປີຂ້າງໜ້າ ແລະ ຈະເລີ່ມກໍ່ສ້າງເດືອນພະຈິກ 2024.
ທ່ານ ສາຄອນ ພິລາງາມ ໄດ້ນໍາສະເໜີກ່ຽວກັບການພັດທະນາໂຄງການທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນ ໃຫ້ຮູ້ວ່າ: ທ່າບົກແມ່ນທ່າເຮືອຢູ່ເທິງບົກ; ລາວເປັນປະເທດດຽວໃນອາຊຽນທີ່ບໍ່ມີຊາຍແດນຕິດກັບທະເລເຮັດໃຫ້ເສຍປຽບດ້ານການຄ້າ ແລະ ການຂົນສົ່ງ ສະນັ້ນອົງການສະຫະປະຊາຊາດຈຶ່ງໄດ້ສົ່ງເສີມບັນດາປະເທດເຫຼົ່ານີ້ສ້າງທ່າບົກເປັນຂອງຕົນເພື່ອເຊື່ອມຈອດການຂົນສົ່ງດ້ວຍຫຼາຍຮູບແບບ ໂດຍສະເພາະການຂົນສົ່ງທາງລົດໄຟທີ່ເປັນການຂົນສົ່ງທີ່ຮອງລົງມາຈາກການຂົນສົ່ງທາງທະເລທີ່ສາມາດບັນທຸກໄດ້ຫຼາຍ ທ່າບົກແຫ່ງນີ້ໄດ້ດຳເນີນກິດຈະການມາແຕ່ວັນທີ 4 ທັນວາ 2021 ເປັນຕົ້ນມາ ເຊິ່ງເປັນທ່າບົກທີ່ສາກົນຮັບຮູ້ເປັນທ່າບົກຕັ້ງຢູ່ຊາຍແດນເຮັດໜ້າທີ່ 2 ໜ້າທີ່ຄື: ເປັນດ່ານສາກົນສິນຄ້າ ແລະ ເປັນທ່າເຮືອທາງບົກ ເປັນສະຖານີຂົນສົ່ງສິນຄ້າ ໂດຍລວມແລ້ວໂຄງການແມ່ນໄດ້ຮັບຜົນປະໂຫຍດຢ່າງຫຼວງຫຼາຍໃຫ້ແກ່ປະເທດດ້ານການຂົນສົ່ງສິນຄ້າ ເຊິ່ງມັນສະແດງໃຫ້ເຫັນການບໍລິການລົດຂົນສົ່ງນັບແຕ່ວັນທີ 1 ມັງກອນຫາວັນທີ 28 ສິງຫາ 2024 ຂົນສົ່ງໄດ້ 165.873 ຄັນ ສະເລ່ຍປະມານ 650 ຄັນຕໍ່ວັນ ການບໍລິການສູງສຸດ 1.000 ຄັນຕໍ່ວັນ ບໍລິການຕູ້ສິນຄ້າໄດ້ 73. 000 ຕູ້ ສົ່ງອອກ 10.000 ຕູ້ ນໍາເຂົ້າ 12.000 ຕູ້ ແລະ ຜ່ານແດນ 13.000 ຕູ້ ບໍລິການນໍ້າໜັກໄດ້ 2.621.000 ໂຕນ ໃນ 8 ເດືອນປີນີ້ເທົ່າກັບໝົດປີຂອງປີຜ່ານມາ.
ໂອກາດດັ່ງກ່າວ ທ່ານ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາກ່ອນອື່ນທ່ານໄດ້ສະແດງຄວາມຂອບໃຈມາຍັງຄະນະບໍລິຫານບໍລິສັດທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ດີໃຈທີ່ໄດ້ມີໂອກາດມາຢ້ຽມຢາມເບິ່ງໂຄງການ; ພາຍຫຼັງຟັງການລາຍງານກໍໄດ້ຮັບຊາບຄວາມເປັນມາຂອງໂຄງການ, ຜົນສຳເລັດ ແລະ ການປະກອບສ່ວນຂອງບໍລິສັດໃນການສ້າງລາຍຮັບໃຫ້ແກ່ປະເທດຊາດ ເຊິ່ງມັນສະແດງໃຫ້ເຫັນຄວາມຮັບຜິດຊອບສູງຂອງບໍລິສັດຕໍ່ໜ້າທີ່ການເມືອງຕໍ່ປະເທດຊາດໃນການພັດທະນາເສດຖະກິດ-ສັງຄົມແຫ່ງຊາດ ຂອງລັດຖະບານທີ່ເກີດໝາກເກີດຜົນຕົວຈິງ ໂດຍແມ່ນບໍລິສັດເປັນຜູ້ປະຕິບັດຕົວຈິງໂດຍກົງ ໂຄງການໄດ້ສ້າງວຽກເຮັດງານທຳສ້າງລາຍຮັບໃຫ້ປະຊາຊົນ ພ້ອມນີ້ທ່ານຍັງໄດ້ຊີ້ນໍາໃຫ້ບໍລິສັດສືບຕໍ່ການໂຄສະນາດ້ານການຂົນສົ່ງຜ່ານທ່າບົກທ່ານາແລ້ງແຫ່ງນີ້ ແລະ ພັດທະນາໂຄງການລົດໄຟລາວ-ຫວຽດນາມ ເພື່ອການຂົນສົ່ງທີ່ໃຊ້ເວລາສັ້ນລົງ ສືບຕໍ່ສ້າງພື້ນຖານອຸດສາຫະກຳຕິດພັນກັບສ້າງລາຍຮັບໃຫ້ປະເທດຊາດ ສືບຕໍ່ສ້າງເສດຖະກິດເອກະລາດເປັນເຈົ້າຕົນເອງຕິດພັນກັບການຊ່ວຍເຫຼືອກັບຕ່າງປະເທດ ເອົາໃຈໃສ່ຂອດການບໍລິການ ອຳນວຍຄວາມສະດວກໃຫ້ແກ່ການສົ່ງອອກ-ນໍາເຂົ້າສິນຄ້າ ປະກອບສ່ວນພັດທະນາເສດຖະກິດ-ສັງຄົມຂອງປະເທດກໍຄືປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ສືບຕໍ່ດຳເນີນທຸລະກິດໃຫ້ເຕີບໃຫຍ່ເຂັ້ມແຂງທຸກດ້ານ ແລະ ຖືໂອກາດນີ້ອວຍພອນໃຫ້ບໍລິສັດຈົ່ງປະສົບຜົນສຳເລັດໃນການປະຕິບັດໂຄງການ.
ຈາກນັ້ນຄະນະບໍລິຫານບໍລິສັດຍັງໄດ້ນໍາພາທ່ານຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ພ້ອມຄະນະຢ້ຽມຢາມຕຶກປະຕິບັດງານຂອງທ່າບົກທ່ານາແລ້ງ ແລະ ຕຶກພາສີທ່າບົກທ່ານາແລ້ງ ຢ້ຽມຢາມລານຕູ້ສິນຄ້າຊີວາຍ ສາງຄ່ຽນຖ່າຍສິນຄ້າ ແລະ ຈຸດຄ່ຽນຖ່າຍສິນຄ້າລະຫວ່າງລາງມາດຕະຖານ ແລະ ລາງໜຶ່ງແມັດ ແລະ ຢ້ຽມຢາມຈຸດເຊື່ອມຕໍ່ຂົວມິດຕະພາບລາວ-ໄທ ແຫ່ງທີ 1 ຕື່ມອີກ
ທີ່ມາ: ເສດຖະກິດການຄ້າ
