ໃນລະຫວ່າງວັນທີ 22-24 ສິງຫາ ປີນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ລົງເຄື່ອນໄຫວຕິດຕາມ ໂຄງການກໍ່ສ້າງ ອ່າງເກັບນໍ້າ- ນໍ້າຊາງ ເມືອງ ແກ່ນທ້າວ, ເຊິ່ງໂຄງການດັ່ງກ່າວຕັ້ງຢູ່ ບ້ານ ຫ້ວຍເລິກ ເມືອງ ແກ່ນທ້າວ ແລະ ຈະໄດ້ລົງມືກໍ່ສ້າງທ້າຍລະດູຝົນນີ້, ໂດຍແມ່ນ ບໍລິສັດ ວິໄຈກຸມມານມີຊ່າ ກໍ່ສ້າງ ຈໍາກັດ ເປັນຜູ້ຮັບເໝົາກໍ່ສ້າງ ໃນມູນຄ່າ 14,76 ລ້ານໂດລາສະຫະລັດ, ໜ້າວຽກປະກອບມີ: ກໍ່ສ້າງເຂື່ອນດິນສູງ 30 ແມັດ, ຍາວ 222 ແມັດ, ເຊິ່ງສາມາດເກັບນໍ້າໄດ້ 9,21 ລ້ານແມັດກ້ອນ, ກໍ່ສ້າງທາງລະບາຍນໍ້າລົ້ນ, ກໍ່ສ້າງລະບົບປະຕູນໍ້າ, ລະບົບຄອງເໝືອງສົ່ງນໍ້າ ແລະ ອາຄາຕ່າງໆຕາມຄອງເໝືອງ, ໂຄງການດັ່ງກ່າວເມື່ອສ້າງສໍາເລັດແລ້ວ ຈະສາມາດສະໜອງນໍ້າໃຫ້ເນື້ອທີ່ການຜະລິດໃນລະດູຝົນໄດ້ 1.020 ເຮັກຕາ ແລະ ລະດູແລ້ງ 850 ເຮັກຕາ, ຈາກນັ້ນທີມງານຂອງທ່ານເຈົ້າແຂວງແມ່ນໄດ້ຢ້ຽມຢາມການລ້ຽງສັດແບບເປັນກຸ່ມເປັນຟາມຕິດພັນກັບການປູກຫຍ້າຂອງປະຊາຊົນເມືອງ ແກ່ນທ້າວ ເຊັ່ນ: ຢ້ຽມຢາມ ຟາມໝູຂອງພໍ່ໝອນ-ແມ່ແກ້ວ ບ້ານ ທ້າວແກ່ນ, ເຊິ່ງມີໝູທັງໝົດໃນປະຈຸບັນ 120 ໂຕ, ຢ້ຽມຢາມຟາມງົວຂອງ ທ່ານ ສຸວັນນະແສງ ບ້ານຈອມເພັດ ເຊິ່ງມິ ງົວທັງໝົດ 180 ກວ່າໂຕ, ຟາມງົວ ເຕໂຊຟາມ ບ້ານ ເມືອງໝໍ ມີງົວທັງໝົດ 230 ໂຕ, ຟາມລ້ຽງງົວຂອງທ່ານ ອໍາໄພ ບ້ານ ເມືອງໝໍ ມີງົວທັງໝົດ 190 ໂຕ, ພ້ອມດຽວກັນກໍ່ໄດ້ລົງກວດກາຄວາມເສຍຫາຍຂອງເສັ້ນທາງ ແລະ ຂົວຂ້າມແມ່ນນໍ້າເຂດບ້ານ ປາກຄານ ເມືອງ ປາກລາຍ ທີ່ຖືກຜົນກະທົບຈາກພາຍຸ ມູນລານ.
ຂ່າວ-ພາບ: ອຸ່ນເຮືອນ ໂພທິລັກ
