ວັນທີ 20 ມັງກອນ 2021 ທີ່ ກະຊວງປ້ອງກັນປະເທດຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ໂງ ຊວນ ລິກ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດຫວຽດນາມ ເນື່ອງໃນໂອກາດມາດຳລົງຕໍາແໜ່ງເປັນເອກະອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.
ສະຫາຍ ໂງ ຊວນ ລິກ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດຫວຽດ ນາມ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງ ຕໍ່ການມາດຳລົງຕໍາແໜ່ງເປັນເອກອັກຄະລັດຖະທູດຂອງ ສະຫາຍ ແສງເພັດ ຮຸ່ງບຸນຍວງ ພ້ອມທັງເຊື່ອໝັ້ນວ່າ ສະຫາຍຈະປະສົບຜົນສຳເລັດຢ່າງຈົບງາມໃນການປະຕິບັດໜ້າທີ່ຢູ່ ສສ ຫວຽດນາມ. ອວຍພອນວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ ພ້ອມທັງຊົມເຊີຍຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ທີ່ປະສົບຜົນສຳເລັດຢ່າງຈົບງາມ.
ພ້ອມນັ້ນ, ສະຫາຍກໍຍັງກ່າວວ່າ ພາຍຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ສະຫາຍ ເລຂາທິການໃຫຍ່, ປະທານປະເທດແຫ່ງ ສສ ຫວຽດນາມ ຫງວຽນຟູຈ້ອງ ກໍໄດ້ໂທລະສັບທາງໄກສົນທະນາກັບ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຕິວັດລາວ ສະໄໝທີ XI, ເລຂາທິການໃຫຍ່ທັງສອງ ໄດ້ສະແດງຄວາມປິຕິຍິນດີ ຕໍ່ສາຍພົວພັນພິເສດ ລະຫວ່າງ ລາວ-ຫວຽດນາມ-ລາວ ທີ່ນັບມື້ໄດ້ຮັບການເສີມຂະຫຍາຍທັງທາງກວ້າງ ແລະ ເລິກເຊິ່ງ, ໄດ້ຢືນຢັນວ່າ ສາຍພົວພັນພິເສດລະຫວ່າງສອງປະເທດເປັນບັນຫາຍຸດທະສາດ, ມີຄວາມໝາຍສຳຄັນໃນພາລະກິດ ປົກປັກຮັກສາ ແລະ ສ້າງສາປະເທດຊາດຂອງແຕ່ລະປະເທດ, ປະກອບສ່ວນສຳຄັນເຂົ້າໃນພາລະກິດ ສັນຕິພາບ, ສະຖຽນລະພາບ, ການຮ່ວມມື ເພື່ອພັດທະນາໃນພາກພື້ນ ແລະ ໃນໂລກ.
ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ໄດ້ກ່າວສະແດງຄວາມຂອບໃຈ ແລະ ຕີລາຄາສູງຕໍ່ຜົນງານອັນໃຫຍ່ຫຼວງ, ຮອບດ້ານ,ເລິກເຊິ່ງ ທີ່ກະຊວງປ້ອງກັນປະເທດຫວຽດນາມ ຍາດມາໄດ້ໃນໄລຍະຜ່ານມາ. ພ້ອມທັງສະແດງຄວາມຂອບໃຈ ແລະ ຮູ້ບຸນຄຸນມາຍັງ ການນຳພັກ, ລັດ ແລະປະຊາຊົນຫວຽດນາມ ພິເສດແມ່ນກະຊວງປ້ອງກັນປະເທດຫວຽດນາມ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ຢ່າງໝົດຈິດໝົດໃຈນັບແຕ່ສະໄໝຕໍ່ສູ້ກູ້ຊາດມາຈົນຮອດປັດຈຸບັນ ເປັນຕົ້ນແມ່ນການບຳລູງສ້າງບຸກຄະລາກອນຂອງກະຊວງປ້ອງກັນປະເທດ ໃນຫຼາຍຂົງເຂດໃນຫຼາຍຮຸ້ນຜ່ານມາ ນັບທັງຮຸ້ນທີ່ກຳລັງມາສຶກສາຄົ້ນຄວ້າຢູ່ ສສ ຫວຽດນາມ ໃນປັດຈຸບັນ. ພ້ອມທັງໃຫ້ຄຳໝັ້ນສັນຍາວ່າ ຈະເຮັດສຸດຄວາມສາມາດຂອງຕົນ ໃນການເປັນຂົວຕໍ່ໃຫ້ແກ່ການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດຫວຽດນາມ – ລາວ, ລາວ – ຫວຽດນາມ, ໂດຍສະເພາະແມ່ນລະຫວ່າງສອງກະຊວງປ້ອງກັນປະເທດລາວ-ຫວຽດນາມ. ສະຫາຍເອກອັກຄະລັດຖະທູດ ກໍໄດ້ອວຍ ພອນໃຫ້ຫວຽດນາມ ດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ ປະສົບຜົນສຳເລັດຢ່າງຈົບງາມ ພ້ອມທັງໄດ້ອວຍພອນໃຫ້ ການນຳພັກ, ລັດ ປະຊາຊົນຫວຽດນາມ ແລະ ທ່ານລັດຖະມົນຕີ ກະຊວງປ້ອງກັນປະເທດຫວຽດນາມ ເນື່ອງໃນໂອກາດປີໃໝ່ປະເພນີຫວຽດນາມ ທີ່ໃກ້ຈະໝູນວຽນມາເຖີງນີ້ ຈົ່ງພ້ອມກັນສະຫຼອງປີໃໝ່ດ້ວຍຄວາມມ່ວນຊື່ນເບີກບານ.
(ພາບ,ຂ່າວ: ໂອລຳ)
Loading...