ວັນທີ 01 ກຸມພາ 2021 ທີ່ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າອວຍພອນຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເນື່ອງໃນໂອກາດວັນສ້າງຕັ້ງພັກກອມມູນິດຫວຽດນາມ ຄົບຮອບ 91 ປີ ໂດຍໄດ້ການຕ້ອນຮັບຈາກສະຫາຍ ຫງວຽນ ຮຸຍ ຕັງ, ຮອງຫົວໜ້າຜູ້ປະຈໍາຄະນະພົວພັນຕ່າງປະເທດສູນກາງພັກກອມມູນິດຫວຽດນາມ.
ໃນໂອກາດນີ້ ສະຫາຍ ຫງວຽນ ຮຸຍ ຕັງ, ຮອງຫົວໜ້າຜູ້ປະຈໍາຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໄດ້ກ່າວສະແດງຄວາມຂອບໃຈ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ທີ່ໄດ້ນຳພາຄະນະ ມາອວຍພອນວັນສ້າງຕັ້ງພັກກອມມູນິດຫວຽດນາມຄົບຮອບ 91 ປີ ເປັນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດຫວຽດນາມ – ລາວ, ລາວ – ຫວຽດນາມ.
ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ກໍໄດ້ກ່າວສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານອັນໃຫຍ່ຫຼວງ, ຮອບດ້ານ, ເລິກເຊິ່ງທີ່ຕະຫລອດໄລຍະ 91 ປີ ຜ່ານມາ, ພັກກອມມູນິດຫວຽດນາມ ໄດ້ນຳພາປະຊາຊົນຫວຽດນາມອ້າຍນ້ອງ ຕໍ່ສູ້ຢ່າງພິລະອາດຫານ ຕ້ານການຮຸກຮານຂອງພວກລ່າເມືອງຂຶ້ນ ແລະ ຈັກກະພັດ ເພື່ອຍາດເອົາເອກະລາດແຫ່ງຊາດໃນຫຼາຍທົດສະວັດ ແລະ ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ, ທ້ອນໂຮມປະເທດຊາດ ໃນປີ 1975 ຢ່າງສະຫງ່າອົງອາດ, ພັກກອມມູນິດຫວຽດນາມສືບຕໍ່ນຳພາປະຊາຊົນທັງຊາດດຳເນີນສອງພາລະກິດ ຄື: ປົກປັກຮັກສາ ແລະ ສ້າງສາ ພັດທະນາປະເທດຊາດ.
ປັດຈຸບັນ, ຫວຽດນາມກຳລັງດຳເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດຫວຽດ ນາມ ເປັນເຫດການການເມືອງທີ່ມີຄວາມສຳຄັນຂອງພັກ, ລັດ ແລະ ປະຊາຊົນຫວຽດນາມ ແລະ ເປັນຂີດໝາຍທີ່ສຳຄັນໃນການພັດທະນາຂອງພັກກອມມູນິດຫວຽດນາມ ແລະ ປະເທດຊາດຫວຽດນາມໃນການກຳນົດແນວທາງ, ເພີ່ມທະວີໃນການກໍ່ສ້າງ, ປັບປຸງພັກ ແລະ ລະບົບການເມືອງໃຫ້ປອດໄສ, ໜັກແໜ້ນ, ເຂັ້ມແຂງ; ເສີມຂະຫຍາຍຄວາມມຸ່ງໝັ້ນແລະ ກຳລັງແຮງມະຫາສາມັກຄີທົ່ວປວງຊົນສົມທົບກັບກຳລັງແຮງຂອງຍຸກສະໄໝ; ຍູ້ແຮງການປ່ຽນແປງໃໝ່ແບບປະດິດສ້າງ, ພັດທະນາໄວ ແລະ ໝັ້ນທ່ຽງ; ປົກປັກຮັກສາປະເທດຊາດໄວ້ຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ມີສະຖຽນລະພາບ; ບັນລຸບັນດາເປົ້າໝາຍຍຸດທະສາດຮອດປີ 2030 – ເປັນໄລຍະເວລາຄົບຮອບ 100 ປີ ແຫ່ງການສ້າງຕັ້ງພັກກອມມູນິດຫວຽດນາມ.
ພ້ອມນັ້ນ, ສະຫາຍເອກອັກຄະລັດຖະທູດ ກໍຍັງໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງທີ່ແສນເຄົາລົບຮັກຂອງປະຊາຊົນລາວ ແລະ ຫວຽດນາມ ກໍຄືບັນດາຮຸ່ນການນຳຕ່າງໆ ຂອງສອງພັກ, ສອງລັດ ແລະ ປະຊາຊົນສອງປະເທດ ໄດ້ເພີ່ມພູນຄູນສ້າງ ແລະ ຮັກສາໄວ້ໃຫ້ຮຸ່ນຄົນຕໍ່ໄປສືບຕໍ່ຖະນຸຖະໜອມໃຫ້ນັບມື້ ຈົ່ງຂຽວສົດງົດງາມ ໝັ້ນຄົງຂະໜົງແກ່ນຕະຫລອດໄປ. ອວຍພອນໃຫ້ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດຫວຽດນາມ ຈົ່ງປະສົບຜົນສຳເລັດຢ່າງຈົບງາມ ແລະ ເນື່ອງໃນໂອກາດປີໃໝ່ປະເພນີຫວຽດນາມທີ່ໃກ້ຈະໝູນວຽນມາເຖິງນີ້ ສະຫາຍເອກອັກຄະລັດຖະທູດ ກໍໄດ້ຖືໂອກາດນີ້ ສົ່ງຄໍາອວຍພອນອັນປະເສີດ ໄປຍັງການນໍາ ພັກ, ລັດ ແລະ ປະຊາຊົນຫວຽດນາມທຸກຖ້ວນໜ້າ ຈົ່ງມີພາລະນາໄມສົມບຸນ, ພ້ອມກັນສະຫຼອງປີໃໝ່ດ້ວຍຄວາມເບີກບານມ່ວນຊື່ນ.
 
Loading...