ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 01 ກຸມພາ 2023 ທີ່ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າອວຍພອນຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເນື່ອງໃນໂອກາດວັນສ້າງຕັ້ງພັກກອມມູນິດຫວຽດນາມ ຄົບຮອບ 93 ປີ (3/2/1930 – 3/2/2023) ໂດຍໄດ້ຮັບການຕ້ອນຮັບຈາກສະຫາຍ ນາງ ຫງວຽນ ທິ ຮວ່າງ ເວິນ, ຮອງຫົວໜ້າຜູ້ປະຈໍາຄະນະພົວພັນຕ່າງປະເທດສູນກາງພັກກອມມູນິດຫວຽດນາມ.
ໃນໂອກາດນີ້ ສະຫາຍ ນາງ ຫງວຽນ ທິ ຮວ່າງ ເວິນ, ຮອງຫົວໜ້າຜູ້ປະຈໍາຄະນະພົວພັນຕ່າງປະເທດສູນກາງພັກກອມມູ ນິດຫວຽດນາມ ໄດ້ກ່າວສະແດງຄວາມຂອບໃຈ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ທີ່ໄດ້ນຳພາຄະນະ ມາອວຍ ພອນວັນສ້າງ ຕັ້ງພັກກອມມູນິດຫວຽດ ນາມຄົບຮອບ 93 ປີ ຊຶ່ງເປັນການສະແດງໃຫ້ເຫັນເຖິງຄວາມສະໜິດສະໜົມຢ່າງໃກ້ຊິດຖານສະຫາຍອ້າຍນ້ອງ ໃນຄອບ ຄົວດຽວກັນຂອງສອງປະເທດ ແລະ ທັງເປັນການເພີ່ມທະວີສາຍພົວພັນມິດຕະ ພາບອັນຍິ່ງ ໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດ ຫວຽດນາມ – ລາວ, ລາວ – ຫວຽດນາມ ໃຫ້ນັບມື້ຈະເລີນງອກງາມຍິ່ງໆຂຶ້ນ.
ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ກໍໄດ້ກ່າວສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານອັນໃຫຍ່ຫຼວງ, ຮອບດ້ານ, ເລິກເຊິ່ງທີ່ຕະຫລອດໄລຍະ 93 ປີ ຜ່ານມາ, ພັກກອມມູນິດຫວຽດນາມ ໄດ້ນຳພາປະຊາຊົນຫວຽດນາມອ້າຍນ້ອງ ຕໍ່ສູ້ຢ່າງພິລະອາດຫານ ຕ້ານການຮຸກຮານຂອງພວກລ່າເມືອງຂຶ້ນ ແລະ ຈັກກະພັດ ເພື່ອຍາດເອົາເອກະລາດແຫ່ງຊາດໃນຫຼາຍທົດສະວັດ ແລະ ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ທ້ອນໂຮມປະເທດຊາດ ໃນວັນທີ 30 ເມສາ 1975 ຢ່າງສະຫງ່າອົງອາດ, ພັກກອມມູນິດຫວຽດນາມສືບຕໍ່ນຳພາປະຊາຊົນ ທັງຊາດ ດຳເນີນສອງພາລະກິດ ຄື: ປົກປັກຮັກສາ ແລະ ສ້າງສາ ພັດທະນາປະ ເທດຊາດ.
ພ້ອມນັ້ນ, ສະຫາຍເອກອັກຄະລັດຖະທູດ ກໍຍັງໄດ້ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງທີ່ແສນເຄົາລົບຮັກຂອງປະຊາຊົນລາວ ແລະ ຫວຽດນາມ ກໍຄືບັນດາຮຸ່ນການນຳຕ່າງໆ ຂອງສອງພັກ, ສອງລັດ ແລະ ປະຊາຊົນສອງປະເທດ ໄດ້ເພີ່ມພູນຄູນສ້າງ ແລະ ຮັກສາໄວ້ ໃຫ້ຮຸ່ນຄົນຕໍ່ໄປສືບຕໍ່ຖະນຸຖະໜອມໃຫ້ນັບມື້ຈົ່ງຂຽວສົດງົດງາມ ໝັ້ນຄົງຂະໜົງແກ່ນ ຕະຫລອດໄປ.
(ຂ່າວ,ພາບ: ສະຖານທູດລາວທີ່ຮ່າໂນ້ຍ ສສ ຫວຽດນາມ)