ຕອນແລງວັນທີ 30 ທັນວາ 2020 ທີ່ ສູນກາງແນວໂຮມປະເທດຊາດຫວຽດນາມນະຄອນຫຼວງຮ່າໂນ້ຍ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາ ມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ເຈີ່ນ ແທງ ເໝີນ, ເລຂາທິການສູນກາງພັກ, ປະທານສູນ ກາງແນວໂຮມແຫ່ງຊາດຫວຽດນາມ ເນື່ອງໃນໂອກາດມາດຳລົງຕໍາແໜ່ງເປັນເອກະອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.
ສະຫາຍ ເຈີ່ນ ແທງ ເໝີນ, ເລຂາທິການສູນກາງພັກ, ປະທານສູນກາງແນວໂຮມແຫ່ງຊາດຫວຽດນາມ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງ ຕໍ່ການມາດຳລົງຕຳແໜ່ງເປັນເອກອັກຄະລັດຖະທູດຂອງ ສະຫາຍ ແສງເພັດ ຮຸ່ງບຸນຍວງ ພ້ອມທັງເຊື່ອໝັ້ນວ່າ ສະຫາຍຈະປະສົບຜົນສຳເລັດຢ່າງຈົບງາມໃນການປະຕິບັດໜ້າທີ່ຢູ່ ສສ ຫວຽດນາມ ເພື່ອເປັນຂົວຕໍ່ໃຫ້ແກ່ການເພີ່ມທະວີສາຍພົວພັນມິດຕະ ພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດຫວຽດນາມ – ລາວ, ລາວ – ຫວຽດນາມ, ໂດຍສະເພາະແມ່ນລະຫວ່າງສອງແນວໂຮມແຫ່ງຊາດຫວຽດນາມ ແລະ ສູນກາງແນວລາວສ້າງຊາດ.
ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ໄດ້ກ່າວສະແດງຄວາມຂອບໃຈ ແລະ ຕີລາຄາສູງຕໍ່ຜົນງານອັນໃຫຍ່ຫຼວງ, ຮອບດ້ານ, ເລິກເຊິ່ງທີ່ແນວໂຮມປະເທດຊາດຫວຽດນາມຍາດມາໄດ້ໃນໄລຍະຜ່ານມາ ໂດຍສະເພາະການປະກອບສ່ວນເຂົ້າໃນການຕ້ານ ແລະ ສະກັດກັ້ນພະຍາດໂຄວິດ-19 ປະສົບຜົນສຳເລັດຢ່າງໃຫຍ່ ຫຼວງ. ພ້ອມກັນນີ້, ກໍໄດ້ສະແດງຄວາມຂອບໃຈມາຍັງການນຳພັກ, ລັດ ແນວໂຮມແຫ່ງຊາດຊາດຫວຽດນາມ ແລະ ປະຊາຊົນຫວຽດນາມ ທີ່ຍາມໃດກໍໄດ້ໃຫ້ການຊ່ວຍ ເຫຼືອພາລະກິດປະຕິວັດຂອງປະຊາຊົນລາວຕະຫຼອດມາ, ພິເສດ ເນື່ອງໃນໂອກາດ ວັນສະຖາປະນາ ສປປ ລາວ ຄົບ ຮອບ 45 ປີ ແລະ ວັນຄ້າຍວັນເກີດ ປະທານ ໄກ ສອນ ພົມວິຫານ ຄົບຮອບ 100 ປີ ພັກ,ລັດ, ສະພາແຫ່ງຊາດຫວຽດນາມ, ແນວໂຮມແຫ່ງຊາດຫວຽດນາມ ແລະ ນະຄອນຫຼວງຮ່າໂນ້ຍ ກໍໄດ້ຈັດຕັ້ງງານໂຮມຊຸມນຸມມິດຕິງຂຶ້ນ ໃນວັນທີ 2/12/2020 ທີ່ໂຮງລະຄອນໃຫຍ່, ນະຄອນຫຼວງຮ່າໂນ້ຍ ໂດຍການເຂົ້າຮ່ວມຂອງສະຫາຍ ນາງ ຫງວຽນ ທິ ກິມ ເງີນ, ປະທານສະພາແຫ່ງຊາດ ພ້ອມກັບການນໍາ, ອະດີດການນໍາຂັ້ນສູງພັກ, ລັດ, ບັນດາການນຳກະຊວງຕ່າງໆ, ບັນດາອາດີດທະຫານອາສາສະໝັກ ແລະ ຊ່ຽວຊານຫວຽດນາມຊ່ວຍລາວ, ບັນດາການນໍາຂອງກຳລັງປ້ອງກັນຊາດ, ປ້ອງກັນຄວາມສະຫງົບ, ກໍໄດ້ເຂົ້າຮ່ວມຢ່າງພ້ອມພຽງ.
ໃນຕອນທ້າຍ, ສະຫາຍ ແສງເພັດ ຮຸ່ງບຸນຍວງ ກໍໄດ້ຢືນຢັນວ່າ ຈະພະຍາຍາມສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະ ຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດລາວ – ຫວຽດນາມ, ຫວຽດນາມ – ລາວ ໃຫ້ນັບມື້ຈະເລີນງອກງາມຕະຫຼອດໄປ.
Loading...