ທ່ານເອກອັກຄະລັດຖະທູດ ແລະ ທີ່ປຶກສາທູດປ້ອງກັນຊາດລາວ ປະຈຳ ຫວຽດນາມ ພ້ອມດ້ວຍຄະນະ ໄດ້ຕ້ອນຮັບ ກະຊວງປ້ອງກັນປະເທດຫວຽດນາມ ເຂົ້າອວຍພອນ ເນື່ອງໃນໂອກາດວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ.

ໃນຕອນແລງຂອງວັນທີ 18 ມັງກອນ 2024 ນີ້, ທີ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ ນ. ຄຳເພົາ ເອີນທະວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ແລະ ພັນເອກ ວົງໄຊ ອິນທະຄຳ, ທີ່ປຶກສາທູດປ້ອງກັນຊາດລາວ ປະຈຳ ຫວຽດນາມ ພ້ອມດ້ວຍພະນັກງານສະຖານທູດ ໄດ້ຕ້ອນຮັບ ສະຫາຍ ພົນໂທ ຮ່ວງ ຊວນ ຈ້ຽນ, ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນ ປະເທດ ທີ່ໄດ້ຕາງໜ້າໃຫ້ແກ່ກະຊວງປ້ອງກັນປະເທດຫວຽດນາມ ໄດ້ນຳເອົາຄຳອວຍພອນໄຊອັນປະເສີດຈາກຄະນະນຳກະຊວງປ້ອງກັນປະເທດ ຫວຽດນາມ ມາຍັງຄະນະນຳກະຊວງປ້ອງກັນປະເທດລາວ ພ້ອມນາຍ ແລະ ພົນທະຫານທຸກທົ່ວໜ້າ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ການອວຍພອນຄັ້ງນີ້ເປັນການສະແດງໃຫ້ເຫັນເຖິງນ້ຳໃຈມິດຕະພາບທີ່ຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ລາວ-ຫວຽດນາມ, ພ້ອມທັງເປັນການປຸກລະດົມ ແລະ ໃຫ້ກຳລັງໃຈແກ່ນາຍ ແລະ ພົນທະຫານຂອງກອງທັບປະຊາຊົນລາວອີກດ້ວຍ. ຕະຫຼອດໄລຍະ 75 ປີຜ່ານມາ ກອງທັບປະຊາຊົນລາວໄດ້ຮັບການກໍ່ສ້າງ, ປັບປຸງໃຫ້ເຕີບໃຫ່ຍຂະຫຍາຍຕົວ ແລະ ເຂັ້ມແຂງຂື້ນເປັນກ້າວໆ, ໃນນີ້ກໍ່ມີການປະກອບສວ່ນ ແລະ ຊ່ວຍເຫຼືອອັນໃຫ່ຍຫຼວງຢ່າງໝົດຈິດໝົດໃຈຈາກກອງທັບປະຊາຊົນຫວຽດນາມ, ບໍ່ວ່າໃນສະໃໝຕໍ່ສູ້ກູ້ຊາດ, ກໍ່ຄືໄລຍະປົກປັກ ຮັກສາ, ສ້າງສາພັດທະນາປະເທດຊາດລາວ ແລະ ໄດ້ເຮັດສຳເລັດໜ້າທີ່ຢ່າງມີກຽດສະຫງ່າ, ກອງທັບປະຊາຊົນລາວ ກໍ່ໃຫ້ສະແດງຄວາມຂອບໃຈຢ່າງຈິງໃຈ, ຮູ້ບຸນຄຸນເປັນຢ່າງຍິ່ງຕໍ່ການຊ່ວຍເຫຼືອອັນລ້ຳຄ່າຕະຫຼອດໄລຍະທີ່ຜ່ານມາ. ສອງກອງທັບແມ່ນເປັນເສົາຄ້ຳໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອແບບພິເສດຂອງພິເສດ. ນະໂອກາດດຽວກັນນີ້, ເນື່ອງໃນໂອກາດບຸນປີໃໝ່ປະຈຳຊາດຫວຽດນາມ 2024 ສະຫາຍເອກອັກຄະລັດຖະທູດ ກໍ່ໄດ້ນຳເອົາຄຳຢ້ຽມຢາມຖາມຂ່າວ ແລະ ຄຳອວຍພອນຂອງການນຳກະຊວງປ້ອງກັນປະເທດລາວ ເຖິງບັນດາສະຫາຍການນຳກະຊວງປ້ອງກັນປະເທດຫວຽດນາມ ແລະ ໄດ້ອວຍພອນ ສະຫາຍ ຮອງລັດຖະມົນຕີກະຊວງປ້ອງກັນປະເທດ ພ້ອມຄະນະ ມີສຸຂະພາບ ພາລາໄມທີ່ແຂງແຮງສົມບູນ ສືບຕໍ່ພ້ອມກັນປະສານສົມທົບ ແລະ ຈັດຕັ້ງຜັນຂະຫຍາຍແຜນການຮ່ວມມືປະຈຳປີ 2024 ລະຫວ່າງສອງກະຊວງປ້ອງກັນປະເທດ ລາວ-ຫວຽດນາມ ໃຫ້ມີປະສິດທິພາບປະສິດທິຜົນສູງຂື້ນກ່ວາເກົ່າ ແລະ ປະກົດຜົນເປັນຈິງ, ເອົາໃຈໃສ່ ແລະ ສະຖານທູດຈະສືບຕໍ່ເຮັດສຸດຄວາມສາມາດຂອງຕົນໃນການເປັນຂົວຕໍ່ ເພື່ອສົງເສີມການພົວພັນຮ່ວມມືລະຫວ່າງສອງຊາດລາວ-ຫວຽດນາມ ໃຫ້ນັບມື້ຂະຫຍາຍຕົວ ແລະ ຈະເລີນງອກງາມຍິ່ງໆຂື້ນ.