ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ຈີນ​ກ່າວ​ຄຳ​ອວຍ​ພອນ​ປີ​ໃໝ່​​ປີ 2020 ທີ່​ຈະໝູນ​ວຽນ​ມາ​ເຖິງ

ເນື່ອງ​ໃນໂອ​ກາດ​ປີ​ໃໝ່ 2020 ​ທີ່​ຈະໄດ້​ໝູນ​ວຽນ​ມາ​ເຖິງ, ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ຈີນ ໄດ້​ກ່າວ​ຄຳ​ອວຍ​ພອນ​ປີ​ໃໝ່ ໂດຍ​ຜ່ານ​ສະ​ຖາ​ນີ​ວິ​ທະ​ຍຸ​ໂທ​ລະ​ພາບ​ສູນ​ກາງ​ ແລະ ອິນ​ເຕີ​ເນັດ ເພື່ອ​ສົ່ງ​ພອນ​ໄຊ​ອັນ​ປະ​ເສີດ​ມາ​ຍັງ​ປະ​ຊາ​ຊົນ​ທັງຫຼາຍ​ໃນໂອ​ກາດ​ປີ​ໃໝ່​ໄດ້​ວຽນ​ມາ​ເຖິງ. ທ່ານ​ສີ​ຈິ້ນ​ຜິ້ງ ກ່າວ​ວ່າ: ປີ 2019 ແມ່ນ​ປີ​ໜຶ່ງ​ທີ່​ຈີນ​ເຮັດ​ແທ້​ທຳ​ຈິງ ແລະ ກ້າວ​ເດີນ​ໄປ​ໜ້າ​ຢ່າງ​ໜັກ​ແໜ້ນ ເຊິ່ງ​ເຫັນ​ໄດ້​ຈາກ​ດ້ານ​ຕ່າງໆ ເຊັ່ນ: ເສດ​ຖະ​ກິດ​ສັງ​ຄົມ​​ໄດ້ພັດ​ທະ​ນາ​ດ້ວຍ​ຄຸນ​ນະ​ພາບ​ສູງ ເຊິ່ງ​ໄດ້​ຮັບ​ການ​ຊຸກ​ຍູ້​ແລະ​ມີ​ຄວາມ​ຄືບ​ໜ້າ​ຢ່າງ​ໜັກ​ແໜ້ນ, ລວມຍອດຜະລິດ​ຕະພັນ​ພາຍ​ໃນ ຫຼື GDP ຄາດ​ວ່າ​ຈະ​ບັນລຸ​ເກືອບ 1.000 ຕື້​ຢວນ, ​ລາຍ​ໄດ້ສະ​ເລ່ຍຕໍ່​ຫົວ​ຄົນ​ຈະ​ບັນລຸ 10.000 ​ໂດ​ລາ​ສະຫະລັດ. ​ໃນ​ທົ່ວ​ປະ​ເທດ​ມີ 10 ກວ່າ​ລ້ານ​ຄົນ​ໄດ້​ຫຼຸດພົ້ນອອກ​ຈາກ​ຄວາ​ມທຸກ​ຍາກ. ປີ 2019 ທີ່​ຜ່ານ​ມາ, ການ​ປະຕິ​ຮູບ​ແລະ​ເປີດ​ປະຕູ​ສູ່​ພາຍ​ນອກ​ຂອງ​ຈີນ​ໄດ້​ເປັນ​ການ​ສ້າງ​ພະລັງ​​ແຮງໃຫ້​ແກ່​ການ​ພັດທະນາ​ຢ່າງ​ມີ​ຊີວິດ​ຊີວາ​ເລື້ອຍໆ, ​ໄດ້​ສ້າງ​ເຂດ​ການ​ຄ້າ​ເສລີ​​ໃໝ່​​ເພີ່ມ​ຂຶ້ນຈຳນວນ​ໜຶ່ງ, ​ກະ​ດານຕະຫຼາດຫຸ້ນການ​ປະດິດ​ສ້າງ​ໃໝ່​ດ້ານ​ວິທະຍາສາດ​ເຕັກນິກ​ໄດ້​ສ້າງຕັ້ງຂຶ້ນ​ແລະ​ດຳ​ເນີນ​ໄປ​ດ້ວຍ​ດີ, ​ໄດ້​ປັບຫຼຸດພາ​ສີ​ອາກອນ​ແລະ​ຄ່າ​ທຳນຽມ​ຕ່າງໆ​ໃຫ້​ໜ້ອຍ​ລົງ 2.000 ກວ່າ​ຕື້​ຢວນ. ການ​ປະຕິ​ຮູບ​ດ້ານ​ການ​ປ້ອງ​ກັນ​ປະ​ເທດ​ແລະ​ກອງທັບ​ຂອງ​ຈີນ​ພວມ​ດຳ​ເນີນ​ແລະ​ໄດ້​ຮັບ​ຄວາມຄືບ​ໜ້າ​ຢ່າງ​ໜັກ​ແໜ້ນ, ກຳ​ປັ່ນ​ບັນທຸກ​ເຮືອບິນ​ທີ່​ຈີນ​ຜະລິດ​ເອງ​ລຳ​ທຳ​ອິດ​ໄດ້​ເຂົ້າປະຈຳການ​ຢ່າງ​ເປັນ​ທາງ​ການ. ທ່ານ​ສີ​ຈິ້ນ​ຜິ​ງ ກ່າວ​ຕື່ມ​ວ່າ: ປີ 2019 ທີ່​ຜ່ານ​ມາ, ສິ່ງ​ທີ່ຊາວ​ຈີນ​​ຈະ​ບໍ່​ມີ​ວັນ​ຫຼົງ​ລືມ​ຈັກ​ເທື່ອນັ້ນກໍ​ຄື ການ​ສະ​ເຫຼີມສະຫຼອງວັນຊາດ​ຄົບຮອບ 70 ປີ​ທີ່​ຍິ່ງ​ໃຫຍ່, ປະຊາຊົນ​ຍ້ອງຍໍ​ຊົມ​ເຊີຍ​ຕໍ່​ຜົນງານ​ອັນ​ສະຫວ່າງ​ສະ​ໄຫວ​ທີ່​ຈີນ​ໄດ້​ຮັບ​ຕະຫຼອດ​ໄລ​ຍະ 70 ປີຜ່ານມາ, ຈິດ​ໃຈ​ຮັກ​ຊາດ​ໄດ້ປະກອບ​ເປັນ​ກະ​ດູກ​ສັນຫຼັງຂອງ​ຊົນ​ຊາດ​ຈີນ. ຂະນະ​ທີ່ປີ 2020 ຈະ​ເປັນ​ປີ​ທີ່​ມີ​ຄວາມ​ໝາຍສຳຄັນ​​ອັນເປັນ​ຂີດ​ໝາຍ​ໃນ​ປະຫວັດສາດ. ທົ່ວ​ປະ​ເທດ​ຕ້ອງ​ສຸມ​ຈິດ​ສຸມ​ໃຈ​ແລະ​ພະຍາຍາມ​ຢ່າງ​ສຸດ​ຂີດ ​ເພື່ອ​ສ້າງ​ສັງຄົມ​ທີ່​ອິ່ມໜຳສຳລານ​ໃຫ້​ສຳ​ເລັດ ​ແລະ ບັນລຸ​ເປົ້າໝາຍ​ທີ່​ເຮັດ​ໃຫ້​ປະຊາກອນ​ຜູ້​ທຸກ​ຍາກ​ຕາມ​ມາດຖານ​ໃນ​ປັດຈຸ​ບັນ ນັ້ນ ຫຼຸດພົ້ນອອກ​ຈາກ​ຄວາມທຸກ​ຍາກ​ທັງ​ໝົດ​ຕາມ​ເວລາ​ກຳນົດ. ທ່ານ​ສີ​ຈິ້ນ​ຜິ​ງ ກ່າວ​ຕໍ່​ໄປ​ວ່າ: ການຈັດ​ຕັ້ງ​ປະຕິບັດ​ຕົວ​ຈິງ​ຢ່າງ​ປະສົບ​ຜົນສຳ​ເລັດ​ນັບ​ແຕ່​ມາ​ກາວ​ກັບ​ຄືນ​ສູ່​ປະ​ເທດ​ຊາດ​ຕະຫຼອດ​ໄລຍະ 20 ປີຜ່ານມາ​ໄດ້​ສະ​ແດງ​​ໃຫ້​ເຫັນ​ວ່າ: ນະ​ໂຍບາຍ “ປະ​ເທດ​ດຽວ​ສອ​ງລະບອບ” ​ແມ່ນ​ສາ​ມາດ​ປະຕິບັດ​ໄດ້​ຈິງ​, ສຳ​ເລັດຜົນ ​​ແລະ ​ໄດ້​ຮັບ​ການ​ສະໜັບສະໜູນ​ຈາກ​ປະຊາຊົນ. ຂະນະ​ທີ່​ສະຖານະ​ການ​ຢູ່​ຮົງ​ກົງ​ໃນຫຼາຍ​ເດືອນ​ຜ່ານ​ມາ​ກໍ​​ໄດ້​ສ້າງ​ຄວາມເປັນ​ຫ່ວງຫຼາຍ. ຖ້າ​ບໍ່​ມີ​ສະພາບ​ແວດ​ລ້ອມ​ທີ່​ປອງ​ດອງ​ກັນ​ແລະ​ມີ​ສະຖຽນ​ລະ​ພາບ, ​ບ້ານ​ເກີດ​ເມືອງ​ນອນຈະ​ມີ​ຄວາມ​ສະຫງົບ​ສຸກ​ໄດ້​ແນວ​ໃດ! ຫວັງ​​ດ້ວຍ​ຈິງ​ໃຈ​ວ່າ​ຮົງ​ກົງ​ຈະ​ມີ​ສະພາບ​ທີ່​ດີ​ຂຶ້ນ, ພີ່ນ້ອງ​ຮ່ວມ​ຊາດ​ຮົງ​ກົງ​ຈະ​ດີ​ທຸກ​ຢ່າງ. ຄວາມ​ຈະ​ເລີ​ນຮຸ່ງ​ເຮືອງ​​ແລະ​ສະຖຽນ​ລະ​ພາບຂອງຮົງ​ກົງ​ແມ່ນ​ຄວາມປາຖະໜາ​ຮ່ວມ​ຂອງ​ພີ່ນ້ອງ​ຮ່ວມ​ຊາດ​ຮົງ​ກົງ ​ແລະ ກໍ​ແມ່ນ​ຄວາມ​ຫວັງ​ຂອງ​ປະຊາຊົນ​ທົ່ວ​ປະ​ເທດ​ຊາດ​ເຊັ່ນ​ດຽວ​ກັນ. ​ໃນ​ເວລາ​ກ່າວ​ເຖິງ​ວຽກ​ງານ​ການ​ຕ່າງປະ​ເທດຂອງ​ຈີນ, ທ່ານ​ສີ​ຈິ້ນ​ຜິ​ງ ກ່າວ​ວ່າ: ​ໃນ​ປີ​ໃໝ່​ 2020 ທີ່​ຈະ​ໝູນ​ວຽນມາ​ເຖິງ​ນີ້, ຈີນ​ຈະ​ບໍ່​ສະທ້ານ​ຢ້ານ​ກົວ​ຕໍ່​ຟ້າ​ຝົນ​ລົມ​ແດງ ​ແລະ ສິ່ງ​ກີດຂວາງ​ຕ່າງໆ ​ແລະ ຈະ​ກ້າວ​ເດີນ​ໄປ​ຕາມ​ເສັ້ນທາງ​ແຫ່ງ​ການ​ພັດທະນາ​ໂດຍ​ສັນຕິ​ຢ່າງ​ເດັດດ່ຽວ​ໜຽວ​ແໜ້ນ, ​ຈະປົກ​ປັກ​ຮັກສາ​ສັນຕິພາບ​ໂລກ, ຊຸກຍູ້​ການ​ພັດທະນາ​ຮ່ວມ​ກັນ. ຈີນ​ຍິນ​ດີ​ຮ່ວມ​ມື​ກັບ​ປະຊາຊົນ​ບັນດາ​ປະ​ເທດ​ເພື່ອ​ຮ່ວມ​ກັນ​ສ້າງ “ໜຶ່ງ​ແລວ​ໜຶ່ງ​ເສັ້ນທາງ”, ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ ​ແລະ ພະຍາຍາມ​ຢ່າງ​ບໍ່​ລົດ​ລະ​ເພື່ອ​ສ້າງ​ອະ​ນາ​ຄົດ​ທີ່​ດີງາມ​ຂອງ​ມະນຸດ.