ທ່ານ ຊິນໂຊ ອາເບະ ອະດີດນາຍົກລັດຖະມົນຕີ ແຫ່ງປະເທດຍີ່ປຸ່ນ ໄດ້ເສຍຊີວິດຢ່າງກະທັນຫັນ ຍ້ອນຖືກລອບຍິງໃນຂະນະທີ່ ທ່ານກໍາລັງກ່າວປາໄສໂຄສະນາຫາສຽງຊ່ວຍສະມາຊິກພັກເສລີປະຊາທິປະໄຕຍີ່ປຸ່ນ ທີ່ເມືອງນາຣະ ໃນວັນທີ 8 ກໍລະກົດ 2022, ລວມອາຍຸໄດ້ 67 ປີ.
ຕະຫລອດໄລຍະທີ່ດຳລົງຕຳແໜ່ງເປັນ ນາຍົກລັດຖະມົນຕີ ທ່ານ ຊິນໂຊ ອາເບະ ເປັນຜູ້ນໍາຄົນໜຶ່ງທີ່ມີວິໄສທັດກວ້າງໄກ, ມີບົດບາດສໍາຄັນ ແລະ ປະກອບສ່ວນຢ່າງໃຫຍ່ຫລວງ ໃນການຊີ້ນໍາ-ນໍາພາປະເທດຍີ່ປຸ່ນ ກໍຄື ການສົ່ງເສີມການພົວພັນ ແລະ ການຮ່ວມມືໃນເວທີພາກພື້ນ ແລະ ສາກົນ, ໂດຍສະເພາະແມ່ນໄດ້ປະກອບ ສ່ວນອັນສໍາຄັນ ເຂົ້າໃນການເພີ່ມທະວີຮັດແໜ້ນການພົວພັນ ແລະ ການຮ່ວມມືທີ່ດີມີມາແຕ່ດົນນານ ລະຫວ່າງ ຍີ່ປຸ່ນ ແລະ ສປປ ລາວ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ກ້າວໄປເຖິງການຍົກລະດັບເປັນຄູ່ຮ່ວມຍຸດທະສາດຂອງສອງປະເທດ ຍີ່ປຸ່ນ ແລະ ສປປ ລາວ ໃນປີ 2015 ຜ່ານມາ.
ໃນໄລຍະທີ່ ທ່ານ ຊິນໂຊ ອາເບະ ເປັນນາຍົກລັດຖະມົນຕີ ແຫ່ງປະເທດຍີ່ປຸ່ນ ສະໄໝທີ 1 (2006-2007) ແລະ ສະໄໝທີ 2 (2012-2020), ການພົວພັນຮ່ວມມືສອງປະເທດ ເຫັນວ່ານັບມື້ໄດ້ຮັບການເສີມຂະຫຍາຍ ການນຳແຕ່ລະຂັ້ນໄດ້ການແລກປ່ຽນຢ້ຽມ ຢາມຄະນະຜູ້ແທນຂັ້ນຕ່າງໆ, ໃນນັ້ນການຢ້ຽມຢາມຂອງການນຳຂັ້ນສູງຂອງລາວ ໄດ້ເດີນ ທາງໄປ ຍີ່ປຸ່ນຈຳນວນ 30 ກວ່າຄັ້ງ, ພ້ອມທັງໄດ້ຮ່ວມລົງນາມໃນເອກະສານ ການຮ່ວມມືຊ່ວຍເຫລືອຫລາຍສະບັບ ເປັນຕົ້ນ ໄດ້ລົງນາມເອກະສານແລກປ່ຽນ ກ່ຽວກັບເງິນຊ່ວຍ ເຫລືອລ້າ ສຳລັບໂຄງການນ້ຳປະປາເກົ້າລ້ຽວ ແລະ ໂຄງການຍົກລະດັບ ໂຮງໝໍເມືອງ ຈາກລັດຖະບານຍີ່ປຸ່ນ ໃນວົງເງິນ 192 ລ້ານເຢັນ; ລົງນາມເອກະສານແລກປ່ຽນ ກ່ຽວກັບເງິນຊ່ວຍເຫລືອລ້ານອກໂຄງການ ຈາກລັດຖະບານຍີ່ປຸ່ນ ໃນວົງເງິນ 1.100 ລ້ານເຢັນ ແລະ ລົງນາມໃນເອກະສານແລກປ່ຽນກ່ຽວກັບເງິນກູ້ 500 ລ້ານເຢັນ ສໍາລັບໂຄງການແກ້ໄຂຄວາມທຸກຍາກ ຢູ່ ສປປ ລາວ; ລົງນາມເອກະສານແລກປ່ຽນໂຄງການຊ່ວຍເຫລືອລ້າ 2 ໂຄງການຄື: ໂຄງການຊ່ວຍເຫລືອລ້ານອກໂຄງການ ມູນຄ່າ 500 ລ້ານເຢັນ, ໂຄງການເກັບກູ້ລະເບີດທີ່ບໍ່ທັນແຕກ ມູນຄ່າ 845 ລ້ານເຢັນ ດັ່ງນີ້ເປັນຕົ້ນ.
ພ້ອມນີ້, ການນຳຈາກປະເທດຍີ່ປຸ່ນ ກໍໄດ້ເດີນທາງມາ ສປປ ລາວ ຈຳນວນ 14 ຄັ້ງ ແລະ ຮ່ວມເປັນສັກຂີພິຍານໃນການລົງນາມ ບົດບັນທຶກການຮ່ວມມື ໃນຂົງເຂດການຮັກສາສຸຂະພາບ ລະຫວ່າງ ກະຊວງສາທາລະນະສຸກ ສປປ ລາວ ແລະ ກະຊວງສາທາ ລະນະສຸກ, ແຮງງານ ແລະ ສະຫວັດດີການ ຍີ່ປຸ່ນ, ເຊັນສັນຍາຂົນສົ່ງທາງອາກາດ ລະ ຫວ່າງ ສປປ ລາວ ແລະ ຍີ່ປຸ່ນ ໃນວັນທີ 16 ມັງກອນ 2015.
ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 6 ກັນ ຍາ 2016 ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມທີ່ກ່ຽວຂ້ອງອື່ນໆທີ່ ສປປ ລາວ ເປັນເຈົ້າພາບຈັດຂຶ້ນ ໃນລະຫວ່າງວັນທີ 6-8 ກັນຍາ 2016 ທີ່ນະຄອນຫລວງວຽງຈັນ, ທ່ານ ຊິນໂຊ ອາເບະ ກໍໄດ້ພົບປະສອງຝ່າຍກັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ທັງສອງຝ່າຍໄດ້ຕົກລົງກ່ຽວກັບ ແຜນເສີມຂະຫຍາຍການພົວພັນຮ່ວມມື ຍີ່ປຸ່ນ-ລາວ ເຊິ່ງຖືວ່າເປັນບາດກ້າວໃໝ່ ແຫ່ງການພົວພັນຮ່ວມມືຂອງສອງປະເທດ ໂດຍຍີ່ປຸ່ນຈະສືບຕໍ່ກະຕຸກຊຸກຍູ້ການຈັດຕັ້ງປະຕິ ບັດແຜນດັ່ງກ່າວ ໃຫ້ໄດ້ຮັບໝາກຜົນໂດຍໄວ ເພື່ອຊ່ວຍພັດທະນາປະເທດລາວ ໃຫ້ຫລຸດພົ້ນອອກຈາກຄວາມດ້ອຍພັດທະນາໃນປີ 2020. ພ້ອມທັງໄດ້ຕົກລົງກ່ຽວກັບ ການລົງທຶນດ້ານການຄົມມະນາຄົມຂົນສົ່ງ, ໂຮງງານຜະລິດກະແສໄຟຟ້າ, ຊັບພະຍາກອນມະນຸດ, ວຽກງານກະສິກຳ ແລະ ວຽກງານສາທາລະນະສຸກ ຕື່ມອີກ.
