ຕອນເຊົ້າຂອງວັນທີ 09 ກຸມພາ 2024 ທີ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນໍາ ຕໍ່ກອງປະຊຸມເປີດກວ້າງວຽກງານທະນາຄານ ປະຈຳປີ 2023 ແລະ ທິດທາງແຜນການ ປີ 2024; ມີທ່ານ ບຸນເຫຼືອ ສິນໄຊວໍຣະວົງ, ຜູ້ວ່າການທະນາຄານແຫ່ງ ສປປ ລາວ, ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານ ຮອງລັດຖະມົນຕີ, ຜູ້ຕາງໜ້າກະຊວງ-ອົງການ, ບັນດາທະນາຄານທຸລະກິດ, ສະຖາບັນການເງິນທີ່ບໍ່ແມ່ນທະນາຄານ ແລະ ຫົວໜ່ວຍທຸລະກິດ-ຜູ້ປະກອບການຕ່າງໆ ພ້ອມດ້ວຍພະນັກງານຫຼັກແຫຼ່ງ ຂອງຂະແໜງທະນາຄານ ແຫ່ງ ສປປ ລາວ ເຂົ້າຮ່ວມ.
ໃນໂອກາດນີ້, ທ່ານຜູ້ວ່າການທະນາຄານແຫ່ງ ສປປ ລາວ ໄດ້ລາຍງານໃຫ້ຊາບໂດຍສັງເຂບ ກ່ຽວກັບຜົນຂອງການດຳເນີນກອງປະຊຸມເປີດກວ້າງຄົບຄະນະບໍລິຫານງານພັກ ທຫລ ຄັ້ງທີ 11, ສະໄໝທີ IV ໂດຍສະເພາະ ການສະຫຼຸບຕີລາຄາການນໍາພາປະຕິບັດໜ້າທີ່ການເມືອງຂອງຂະແໜງທະນາຄານ ປີ 2023 ແລະ ວາງທິດທາງແຜນການ ປີ 2024, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃນຂະແໜງທະນາຄານ. ພ້ອມນັ້ນ, ກອງປະຊຸມຍັງໄດ້ລົງເລິກຄົ້ນຄວ້າແຜນວຽກປີ 2024 ໃນ 05 ກຸ່ມວຽກທີ່ສໍາຄັນ ຄື: 1.) ວຽກສະຖຽນລະພາບເງິນຕາ; 2.)ວຽກສະຖຽນລະພາບທາງດ້ານການເງິນ; 3.) ວຽກບໍລິຫານ-ການເງິນ; 4.) ວຽກຈັດຕັ້ງ-ກວດກາ ແລະ 5.) ວຽກຫັນເປັນທັນສະໄໝ.
ໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ຕີລາຄາສູງຕໍ່ຜົນສໍາເລັດ ທີ່ຂະແໜງທະນາຄານ ສາມາດຍາດມາໄດ້ໃນໄລຍະຜ່ານມາ ໂດຍສະເພາະ ການປະກອບສ່ວນໃນການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງຂະແໜງທະນາຄານໄດ້ມີບົດບາດສໍາຄັນໃນການດໍາເນີນມາດຕະການຕ່າງໆເປັນຢ່າງດີ ເປັນຕົ້ນແມ່ນ ການອອກມາດຕະການຄຸ້ມຄອງເງິນຕາ ແລະ ອັດຕາແລກປ່ຽນ, ການພັດທະນາ-ນໍາໃຊ້ລະບົບທັນສະໄໝເຂົ້າໃນການຊໍາລະສະສາງ ແລະ ເສຍພາສີ-ອາກອນ, ການຄວບຄຸມອັດຕາດອກເບັ້ຍ, ການຄຸ້ມຄອງການເງິນທຸລະກິດ ແລະ ອື່ນໆ. ນອກນັ້ນ, ຍັງໄດ້ພັດທະນານໍາໃຊ້ລະບົບ CMS ເຂົ້າໃນການຄຸ້ມຄອງກະແສເງິນຕາ ໂດຍໄດ້ເຊັນບົດບັນທຶກຄວາມເຂົ້າໃຈຮ່ວມກັບຂະແໜງການກ່ຽວຂ້ອງແລ້ວ. ສະນັ້ນ, ເພື່ອເປັນທິດທາງໃນການຈັດຕັ້ງປະຕິບັດໃນຕໍ່ໜ້າ, ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ຜູ້ເຂົ້າຮ່ວມກອງປະຊຸມ ເອົາໃຈໃສ່ຕື່ມບາງດ້ານ ດັ່ງນີ້: 1.) ໃຫ້ຄະນະພັກ-ຄະນະນໍາ ທະນາຄານແຫ່ງ ສປປ ລາວ ເອົາໃຈໃສ່ວຽກງານນໍາພາການເມືອງ-ແນວຄິດ ຂອງພະນັກງານໃຫ້ເປັນປົກກະຕິຕໍ່ເນື່ອງ; 2.) ເພີ່ມທະວີຄວາມສາມັກຄີເປັນເອກະພາບພາຍໃນຄະນະພັກ-ຄະນະນຳ ໂດຍສະເພາະ ຄວາມເປັນເອກະພາບ ໃນການປັບປຸງການຈັດຕັ້ງ, ແກ້ໄຂບັນຫາພະນັກງານ; 3.) ສືບຕໍ່ປັບປຸງການຈັດຕັ້ງທຸກຂັ້ນ ໄປຕາມທິດກະທັດຮັດ, ມີປະສິດທິພາບ ແລະ ສົມເຫດສົມຜົນ; 4.) ເລັ່ງໃສ່ປັບປຸງຕໍາແໜ່ງງານ ໃຫ້ຮັບປະກັນຄຸນນະພາບ ເພື່ອເປັນບ່ອນອີງໃນການບັນຈຸ, ສັບຊ້ອນຈັດວາງພະນັກງານ ໃຫ້ເໝາະສົມ; 5.) ເພີ່ມທະວີວຽກງານບໍາລຸງກໍ່ສ້າງພະນັກງານ ໂດຍສະເພາະ ພະນັກງານວິຊາການຊ່ຽວຊານສະເພາະດ້ານ ຢູ່ແຕ່ລະຕໍາແໜ່ງງານໃຫ້ສອດຄ່ອງກັບການເລັ່ງທວງຂອງສະພາບການໃນໄລຍະໃໝ່; 6.) ປັບປຸງແບບແຜນນໍາພາ ແລະ ແບບແຜນວິທີເຮັດວຽກ ໃຫ້ຄ່ອງຕົວກວ່າເກົ່າ, ຢຶດໝັ້ນປະຕິບັດຕາມກົດໝາຍ ແລະ ລະບຽບການຢ່າງເຂັ້ມງວດ, ມີການຕິດຕາມກວດກາ, ຊຸກຍູ້ຊີ້ນໍາການຈັດຕັ້ງປະຕິບັດ ແລະ ປະເມີນຜົນເປັນປະຈໍາ, ປະຕິບັດລະບອບສ່ອງແສງລາຍງານ ໃນການເຄື່ອນໄຫວວຽກງານ ກໍ່ຄືການແກ້ໄຂບັນຫາທີ່ເກີດຂຶ້ນຢູ່ແຕລະຫົວໜ່ວຍ ແລະ ໃນສັງຄົມໃຫ້ແທດເຖິງຕົວຈິງ ແລະ ທັນກັບສະພາບການ; 7.) ເພີ່ມທະວີຄວາມເປັນເຈົ້າການ ຕິດຕາມ, ກວດກາ ແລະ ຊຸກຍູ້ການຜັນຂະຫຍາຍ ແລະ ຈັດຕັ້ງປະຕິບັດມະຕິ, ຄໍາສັ່ງຂອງພັກ, ກົດໝາຍ ແລະ ລະບຽບການຂອງລັດຢ່າງໃກ້ຊິດ ແລະ ເປັນປະຈໍາ; 8.) ເອົາໃຈໃສ່ວຽກງານກວດກາພັກ, ວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ກໍ່ຄືໃຫ້ຊຸກຍູ້ຢ່າງແຂງແຮງການແກ້ໄຂຜົນຂອງການກວດສອບ, ຜົນຂອງການກວດກາ ໃຫ້ທັນກັບສະພາບການ, ເຂັ້ມງວດ ແລະ ຂາດຕົວ ເທື່ອລະກ້າວ; 9.) ເອົາໃຈໃສ່ຢ່າງແຂງແຮງການແກ້ໄຂບັນຫາຄົງຄ້າງທີ່ຕິດພັນກັບຈັດຕັ້ງປະຕິບັດແຜນເງິນຕາ ປີ 2024 ໂດຍສະເພາະ ໃຫ້ສຸມໃສ່ແກ້ໄຂບັນຫາອັດຕາເງິນເຟີ້ ດ້ວຍການພັດທະນາເຄື່ອງມືເງິນຕາ ເພື່ອຄວບຄຸມປະລິມານເງິນໃຫ້ເໜາະສົມ, ດຳເນີນນະໂຍບາຍອັດຕາແລກປ່ຽນ ເພື່ອບໍ່ໃຫ້ອັດຕາແລກປ່ຽນຜັນຜວນກະທົບກັບເງິນເຟີ້; 10.) ສືບຕໍ່ນຳໃຊ້ ລະບົບຄຸ້ມຄອງກະແສເງິນຕາຕ່າງປະເທດ (CMS) ເພີ່ມການມີສວນຮ່ວມໃນການຄຸ້ມຄອງນຳໃຊ້ ແລະ ຈັດຕັ້ງປະຕິບັດຢ່າງກວ້າງຂວາງໃນຂອບເຂດທົ່ວປະເທດ; 11.) ສືບຕໍ່ແລກປ່ຽນຂໍ້ມູນຂ່າວສານ ກັບບັນດາກະຊວງ-ອົງການທີ່ກ່ຽວຂ້ອງ. ພ້ອມນັ້ນ, ໃຫ້ເອົາໃຈໃສ່ຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈ ທີ່ໄດ້ເຊັນຮ່ວມກັນໃນຜ່ານມາ ໃຫ້ເປັນຮູບປະທຳ ແລະ ມີປະສິດທິຜົນ; 12.) ເອົາໃຈໃສ່ການຄຸ້ມຄອງ ແລະ ພັດທະນາລະບົບທະນາຄານ, ສະຖາບັນການເງິນທີ່ບໍ່ແມ່ນທະນາຄານ ໃຫ້ຖືກຕ້ອງຕາມກົດໝາຍ, ລະບຽບການ ແລະ ສອດຄ່ອງຕາມມາດຕະຖານສາກົນ, ທັງເຂັ້ມງວດປະຕິບັດບັນດາລະບຽບການທີ່ ທະນາຄານ ແຫ່ງ ສປປ ລາວ ວາງອອກ; 13.) ເອົາໃຈໃສພັດທະນາລະບົບການຊໍາລະໃຫ້ທັນສະໄໝ, ປອດໄພ, ກວ້າງຂວາງ, ລວມທັງ ລະບົບການຊໍາລະຂ້າມແດນໃຫ້ມີຫຼາຍຊ່ອງທາງ ໂດຍສະເພາະ ການຮ່ວມມືກັບປະເທດເພື່ອນມິດຍຸດທະສາດ ແລະ ປະເທດໃກ້ຄຽງ ບົນພື້ນຖານຮັບປະກັນບໍ່ໃຫ້ການຊໍາລະຂ້າມແດນ ເປັນການອຳນວຍຄວາມສະດວກເງິນຕາໄຫຼອອກນອກປະເທດ; 14.) ໃຫ້ສືບຕໍ່ຄົ້ນຄວ້າປັບປຸງແຜນຍຸດທະສາດໃນການພັດທະນາຕະຫຼາດທຶນຂອງ ສປປ ລາວ ໄລຍະ 10 ປີ (2021-2030) ແລະ ວິໄສທັດ ຮອດປີ 2035, ສືບຕໍ່ຄົ້ນຄວ້າສ້າງ ແລະ ປັບປຸງນິຕິກໍາໃຕ້ກົດໝາຍວ່າດ້ວຍຫຼັກຊັບ ເພື່ອຮັບໃຊ້ໃຫ້ແກ່ການເຄື່ອນໄຫວວຽກງານຫຼັກຊັບໃຫ້ມີຄວາມຄ່ອງຕົວ; 15.) ສືບຕໍ່ຈັດຕັ້ງຜັນຂະຫຍາຍທິດຊີ້ນໍາຂອງ ຂອງສະຫາຍ ເລຂາທິການໃຫຍ່, ປະທານປະເທດແຫ່ງ ສປປ ລາວ ໃນການຄົ້ນຄວ້າກໍານົດນະໂຍບາຍຫັນໄປສູ່ລະບອບ ເສດຖະກິດເອກະລາດ ເປັນເຈົ້າຕົນເອງ (ສອຈ) ໃຫ້ເຂົ້າສູ່ລວງເລິກໃນວຽກງານ ຂອງຂະແໜງການທະນາຄານ ຢ່າງມີປະສິດທິຜົນ.
ຂ່າວ ແລະ ພາບ: ກົມປະຊາສຳພັນ ຫສນຍ.
