ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສະຖາປະນາ ສປປ ລາວ ຄົບຮອບ 45 ປີ
( 02 ທັນວາ 1975 – 2020 ) ຢ່າງສຸດໃຈ

ທ່ານ ນາຍົກລັດຖະມົນຕີ ຊຸກຍູ້ວຽກງານ ແຂວງຄຳມ່ວນ

ໃນວັນທີ 19 ພະຈິກ 2020 ທ່ານ ທອງລຸນ ສີສຸລິດ, ນາ​ຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມ​ຢາມ, ພົບປະໂອ້ລົມ ແລະ ຊີ້ນຳ ວຽກງານແຂວງຄຳມ່ວນ; ໂດຍມີທ່ານ ວັນໄຊ ພອງສະຫວັນ, ຮັກສາການເຈົ້າແຂວງໆຄຳມ່ວນ ພ້ອມດ້ວຍ ຄະນະການນຳ, ພະນັກງານຫຼັກແຫຼ່ງ ແລະ ພະນັກງານອາວຸໂສບຳນານ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງການໂອ້ລົມ ຢູ່ສະໂມສອນໃຫຍ່ ຂອງແຂວງ.

ໃນໂອກາດນີ້, ທ່ານ ຮັກສາການເຈົ້າແຂວງຄຳມ່ວນ ໄດ້ລາຍງານ ກ່ຽວກັບຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຂວງ ໃນໄລຍະ 11 ເດືອນຜ່ານມາ ແລະ ການກະກຽມດຳເນີນກອງປະຊຸມໃຫຍ່ ຂອງອົງຄະນະພັກແຂວງ ຄັ້ງທີ X ໂດຍຫຍໍ້ ໃຫ້ຄະນະຂອງທ່ານ ນາຍົກລັດຖະມົນຕີ ຊາບວ່າ: ທົ່ວແຂວງ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ; ເສດຖະກິດຂອງແຂວງ ຂະຫຍາຍຕົວ ໃນລະດັບ 4,45% (ແຜນການ 6,76%), ລວມຍອດຜະລິດຕະພັນບັນລຸ 8.476 ຕື້ກີບ (ແຜນການ 9.000 ຕື້ກີບ), ສະເລ່ຍລາຍຮັບຕໍ່ຫົວຄົນ 2.199 ໂດລາສະຫະລັດ; ການເກັບລາຍຮັບເຂົ້າງົບປະມານແຫ່ງລັດ, ພູດສູນກາງ ປະຕິບັດໄດ້ 326,29 ຕື້ກີບ ເທົ່າກັບ 78,26% ຂອງແຜນປີ, ພູດຂອງແຂວງ ປະຕິບັດໄດ້ 187,57 ຕື້ກີບ ເທົ່າກັບ 72,72% ຂອງແຜນປີ, ດ້ານລາຍຈ່າຍ ປະຕິບັດໄດ້ 412,38 ຕື້ກີບ ເທົ່າກັບ 73,59 ຂອງແຜນປີ. ສາຍເຫດທີ່ບໍ່ສາມາດປະຕິບັດໄດ້ຕາມຄາດໝາຍ ແມ່ນຍ້ອນພົບກັບຄວາມຫຍຸ້ງຍາກຫຼາຍດ້ານ ເປັນຕົ້ນ ການລະບາດຂອງພະຍາດ, ໄພທຳມະຊາດ ແລະ ອື່ນໆ; ພ້ອມກັນນີ້, ໄດ້ເອົາໃຈໃສ່ວຽກງານວັດທະນະທຳ-ສັງຄົມ, ໃນນີ້ ໄດ້ເອົາໃຈໃສ່ປັບປຸງຄຸນນະພາບການສຶກສາ, ການບໍລິການ ດ້ານສາທາລະນະສຸກ, ພ້ອມກັນນີ້ ກໍ່ໄດ້ເອົາໃຈໃສ່ວຽກງານພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ ແນໃສ່ເຮັດໃຫ້ຈຳນວນບ້ານ ແລະ ຄອບຄົວທຸກຍາກຫຼຸດລົງເປັນກ້າວໆ. ສຳລັບການກະກຽມດຳເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ, ມາຮອດປະຈຸບັນ ມີຄວາມພ້ອມໂດຍພື້ນຖານແລ້ວ, ວຽກງານຮອບດ້ານ ແມ່ນມີຄວາມຮັບປະກັນ ທັນດຳເນີນກອງປະຊຸມໃຫຍ່ ໃນໄວໆນີ້.

ໃນໂອກາດດຽວກັນ, ທ່ານ ນາຍົກລັດຖະມົນຕີ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳ ຕໍ່ການນຳຫຼັກແຫຼ່ງຂອງແຂວງ, ກ່ອນອື່ນ ທ່ານໄດ້ກ່າວສະແດງຄວາມຊົມເຊີຍ ຕໍ່ຜົນສຳເລັດ ທີ່ທາງແຂວງ ສາມາດຍາດມາໄດ້ ໃນໄລຍະທີ່ຜ່ານມາ ໂດຍສະເພາະ ການຈັດຕັ້ງຜັນຂະຫຍາຍ ແລະ ປະຕິບັດນິຕິກຳຕ່າງໆ ຂອງສູນກາງພັກ ແລະ ລັດຖະບານ, ການຮັກສາມູນເຊື້ອອັນດີງາມຂອງຊາດ-ຂອງແຂວງ, ການປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ ແລະ ອື່ນໆ, ພ້ອມທັງ ຍົກໃຫ້ເຫັນ ສະພາບການພົ້ນເດັ່ນ ທີ່ເກີດຂຶ້ນຢູ່ບາງປະເທດໃນໂລກ ແລະ ບາງປະເທດໃກ້ຄຽງ. ນອກຈາກນັ້ນ ກໍ່ຍັງໄດ້ຍົກໃຫ້ເຫັນ ທ່າແຮງດ້ານຕ່າງໆ ໃນການພັດທະນາເສດຖະ ກິດ-ສັງຄົມ ຂອງແຂວງຄຳມ່ວນ ກໍ່ຄື ສປປ ລາວ, ລວມທັງ ຂໍ້ຫຍຸ້ງຍາກ ແລະ ສິ່ງທ້າທາຍ ໃນການປົກປັກຮັກສາ ແລະ ສ້າງສາພັດທະນາປະເທດເຮົາ ໃນໄລຍະຜ່ານມາ ກໍ່ຄືປະຈຸບັນ ແລະ ອະນາຄົດ. ອັນສຳຄັນ, ທ່ານ ນາຍົກລັດຖະມົນຕີ ໄດ້ສະເໜີແລກປ່ຽນຄຳຄິດເຫັນ ແລະ ຊີ້ນຳ ໃຫ້ເອົາໃຈໃສ່ບາງບັນຫາຕື່ມ ເປັນຕົ້ນ ກວດກາຄືນ ຮ່າງບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ຂອງແຂວງ 5 ປີ ຕໍ່ໜ້າ ແມ່ນໃຫ້ກົມກຽວ ໄປລວງດຽວກັນ, ໄປຕາມທິດທີ່ກຳນົດໄວ້, ສອດຄ່ອງກັບທ່າແຮງບົ່ມຊ້ອນຕົວຈິງຂອງແຂວງ ແລະ ສາມາດໃນການຈັດຕັ້ງປະຕິບັດໄດ້, ພ້ອມກັນນັ້ນ ກໍ່ໃຫ້ກຳນົດໂຄງການຕ່າງໆ ໂດຍມີການຈັດລຽງບູລິມະສິດຄັກແນ່; ພ້ອມກັນຄົ້ນຄວ້າ, ຕີລາຄາຄືນ ແລະ ຊອກໃຫ້ເຫັນບັນດາສາຍເຫດ, ຈຸດອ່ອນ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ເພື່ອນຳໄປປັບປຸງແກ້ໄຂໃຫ້ຖືກຈຸດ ໄປຄຽງຄູ່ກັບ ເສີມຂະຫຍາຍຜົນສຳເລັດ ໃຫ້ມີການຫັນປ່ຽນທີ່ດີຂຶ້ນຢ່າງຈະແຈ້ງ; ພາຍຫຼັງສຳເລັດກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງແລ້ວ ໃຫ້ມີການແບ່ງໜ້າທີ່ ແລະ ຄວາມຮັບຜິດຊອບກັນ ຢ່າງລະອຽດຈະແຈ້ງ ໂດຍມີລະບອບແບບແຜນ ໃນການຕິດຕາມ, ຊຸກຍູ້ ແລະ ກວດກາ ຄວາມຮັບຜິດ-ຮັບຊອບ ເປັນແຕ່ລະໄລຍະ ຄັກແນ່; ການນຳພາ-ຊີ້ນຳວຽກງານ ຂອງຄະນະພັກ ໃຫ້ເລັ່ງໃສ່ຄຸນນະພາບ, ທັນສະໄໝ, ໂປ່ງໃສ, ຮັດກຸມ, ມີປະສິດທິພາບ ແລະ ປະສິດທິຜົນ, ພ້ອມກັນນັ້ນ ຄະນະພັກ-ຄະນະນຳ ຕ້ອງເປັນແບບຢ່າງທີ່ດີ ຕໍ່ສະມາຊິກພັກ-ພະນັກງານ, ຊຶ່ງສະມາຊິກພັກ-ພະນັກງານ ກໍ່ຕ້ອງເປັນແບບຢ່າງທີ່ດີ ໃຫ້ແກ່ສັງຄົມ ແລະ ປະຊາຊົນ ເຮັດໃຫ້ເຂົາເຈົ້າ ມີຄວາມເຊື່ອໝັ້ນ, ໄວ້ເນື້ອເຊື່ອໃຈ ແລະ ເຄົາລົບນັບຖື; ນຳໃຊ້ທ່າແຮງບົ່ມຊ້ອນຕົວຈິງ ຂອງແຂວງ-ຂອງປະເທດ ໃຫ້ເກີດປະໂຫຍດສູງສຸດ ໂດຍສະເພາະ ການເປັນຈຸດໃຈກາງ-ທາງຜ່ານການເຊື່ອມຈອດ ແຕ່ເໜືອຫາໃຕ້ ແລະ ການເຊື່ອມໂຍງຕາເວັນອອກ-ຕາເວັນຕົກ ກໍ່ຄືບັນປະເທດໃກ້ຄຽງ ສຳລັບການພັດທະນາວຽກງານການຄ້າ, ການລົງທຶນ, ການບໍລິການ, ການທ່ອງທ່ຽວ ແລະ ການຜະລິດອຸດສາຫະກຳປຸງແຕ່ງ ຕິດພັນກັບການຜະລິດກະສິກຳສະອາດ ເພື່ອນຳພາແຂວງ ຮັ່ງມີເຂັ້ມແຂງ, ປະຊາຊົນບັນດາເຜົ່າ ມີຊີວິດການເປັນຢູ່ທີ່ດີຂຶ້ນເປັນກ້າວໆ; ເອົາໃຈໃສ່ປົກປັກຮັກສາປ່າໄມ້, ສິ່ງແວດລ້ອມ, ແຫຼ່ງນໍ້າ, ສັດນໍ້າ-ສັດປ່າ ໃຫ້ມີຄວາມຍືນຍົງ; ສືບຕໍ່ພັດທະນາ ແລະ ປັບປຸງໂຄງລ່າງພື້ນຖານການທ່ອງທ່ຽວ ເພື່ອຮັບປະກັນສາມາດຮອງຮັບວຽກງານດັ່ງກ່າວໃນຕໍ່ໜ້າ; ເອົາໃຈໃສ່ ວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການສຶກສາອົບຮົມການເມືອງແນວຄິດ ໃຫ້ພະນັກງານ, ທະຫານ, ຕຳຫຼວດ ແລະ ປະຊາຊົນບັັນດາເຜົ່າ ໃຫ້ດີ ແລະ ເປັນປົກກະຕິ ເພື່ອໃຫ້ເຂົາເຈົ້າ ເຂົ້າໃຈຢ່າງຖືກຕ້ອງ ແລະ ເຂົ້າຮ່ວມຂະບວນການ ປົກປັກຮັກສາ ແລະ ສ້າງສາພັດທະນາປະເທດ ກໍ່ຄືການຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ທີ່ພົ້ນເດັ່ນໃນສັງຄົມ ເປັນຕົ້ນ ບັນຫາຢາເສບຕິດ, ການໂຄສະນາຊວນເຊື່ອ ແລະ ໃສ່ຮ້າຍປ້າຍສີ ຂອງກຸ່ມຄົນທີ່ບໍ່ຫວັງດີ; ສືບຕໍ່ເຕົ້າໂຮມຄວາມສາມັກຄີພາຍໃນ ໃຫ້ມີຄວາມໜັກແໜ້ນເຂັ້ມແຂງ, ໃຫ້ການສະໜັບສະໜູນ, ຊຸກຍູ້ຊ່ວຍເຫຼືອເຊິ່ງກັນ ແລະ ກັນ ເພື່ອພ້ອມກັນກ້າວໜ້າ ບໍ່ຢຸດຢັ້ງ.
ໃນໂອກາດເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ແຂວງຄຳມ່ວນຄັ້ງນີ້, ທ່ານ ນາຍົກລັດຖະມົນຕີ ຍັງໄດ້ມອບເງິນຊຸກຍູ້ກອງປະຊຸມໃຫຍ່ຂອງແຂວງຈຳນວນໜຶ່ງ, ພ້ອມທັງ ຢ້ຽມຢາມແຫຼ່ງທ່ອງທ່ຽວ ຂຸນກອງແລງ, ເມືອງຫີນບູນ ແລະ ໄປກວດກາເບິ່ງພື້ນທີ່ຕົວຈິງ ຄອງຊົນລະປະທານ ທີ່ປະຕູຮັບນໍ້າປ່ອງ 3 ແລະ ປ່ອງ 1 ທີ່ຮັບນ້ຳຈາກຄອງລະບາຍນ້ຳ ໂຄງການເຂື່ອນໄຟຟ້ານ້ຳເທີນ 2 ທີ່ ເມືອງຍົມມະລາດ ຕື່ມອີກ.

ພາບ ແລະ ຂ່າວ: ກົມປະຊາສຳພັນ ຫສນຍ.