ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ນາຍົກລັດຖະມົນຕີ ຕ້ອນຮັບຜູ້ແທນກະຊວງແຮງງານ, ເສຍອົງຄະ ແລະ ສັງຄົມ ຫວຽດນາມ.
ໃນຕອນເຊົ້າວັນທີ 4 ທັນວາ 2023 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ, ນາຍົກ ລັດຖະ ມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ດາວ ຫງອກ ຢຸງ, ລັດຖະມົນຕີ ກະຊວງແຮງງານ, ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 3-5 ທັນວາ 2023.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຄະນະຜູ້ແທນກະຊວງແຮງງານ, ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ທີ່ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນ ເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ໄດ້ຮັບການເສີມຂະຫຍາຍ ໃນທຸກຂົງເຂດວຽກງານ ໂດຍສະເພາະ ໃນຂົງ ເຂດແຮງງານ ແລະ ສະຫວັດດີການສັງຄົມ ຂອງສອງປະເທດ ເພື່ອນໍາເອົາຜົນປະໂຫຍດມາສູ່ປະຊາຊົນສອງຊາດ ໃຫ້ນັບມື້ເພີ່ມຂຶ້ນ; ຕີລາຄາສູງ ຕໍ່ແຜນການພົບປະເຮັດວຽກສອງຝ່າຍ ລະຫວ່າງ ກະຊວງແຮງງານ, ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ແລະ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ໃນຄັ້ງນີ້ ເຊິ່ງຈະໄດ້ພ້ອມກັນທົບທວນຄວາມຄືບໜ້າ ໃນການຈັດຕັ້ງປະຕິບັດ ບັນດາເນື້ອໃນຂໍ້ຕົກລົງວ່າດ້ວຍການຮ່ວມມືໃນຂົງເຂດແຮງງານ ແລະ ສະຫວັດດີການສັງຄົມ ໄລຍະ 2021-2025 ເວົ້າລວມ, ເວົ້າສະເພາະ ແມ່ນບົດບັນທຶກກອງປະຊຸມ ລັດຖະມົນຕີແຮງງານ ແລະ ສະຫວັດດີການສັງຄົມ ຄັ້ງທີ VII ປີ 2021 ທີ່ຜ່ານມາ ແລະ ປຶກສາຫາລື ວາງແຜນການຮ່ວມມືໃນໄລະຍະ 2023-2025 ເປັນການປະກອບສ່ວນອັນສໍາຄັນ ເຂົ້າໃນການຈັດຕັ້ງປະຕິບັດ ຂໍ້ຕົກລົງວ່າດ້ວຍຍຸດທະສາດການ ຮ່ວມມື ໄລຍະ 10 ປີ (2021-2030) ແລະ ສັນຍາວ່າດ້ວຍການຮ່ວມມືທະວິພາຄີ ໄລຍະ 5 ປີ (2021-2025) ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ສສ ຫວຽດນາມ; ໄດ້ສະເໜີກະຊວງແຮງງານ, ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ແລະ ກະຊວງແຮງງານ ແລະ ສະຫວັດດີການຄົມ ແຫ່ງ ສປປ ລາວ ສືບຕໍ່ຈັດຕັ້ງປະຕິບັດບັນດາເນື້ອໃນທີ່ສອງຝ່າຍໄດ້ເອກະພາບຮ່ວມກັນ ໃນໄລຍະຜ່ານມາ. ພ້ອມນັ້ນ, ກໍ່ສະເໜີຝ່າຍ ສສ ຫວຽດນາມ ຊ່ວຍຖ່າຍທອດບົດຮຽນ ແລະ ປະສົບການດ້ານຕ່າງໆ ໃຫ້ຂະແໜງແຮງງານ ແລະ ສະຫວັດດີການສັງຄົມ ຂອງ ສປປ ລາວ ບາງດ້ານຕື່ມ ເປັນຕົ້ນ ການສ້າງຄ່ານິຍົມໃຫ້ແຮງງານລາວ ອອກແຮງງານ ຢູ່ພາຍໃນປະເທດ ແລະ ມີລະບຽບວິໄນ; ການຝຶກວິຊາຊີບຕ່າງໆ ໃຫ້ແຮງງານ; ການຄຸ້ມຄອງສູນປິ່ນປົວຜູ້ຕິດຢາເສບຕິດ; ການຈັດຕັ້ງປະຕິບັດວຽກງານປະກັນສັງຄົມ ແລະ ອື່ນໆ; ໄດ້ຝາກຄວາມຢ້ຽມຢາມຖາມຂ່າວ ໄປຍັງທ່ານ ນາຍົກລັດຖະມົນຕີ ແຫ່ງ ສສ ຫວຽດນາມ.
ໃນໂອກາດດຽວກັນ, ທ່ານ ດາວ ຫງອກ ຢຸງ ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ແຈ້ງໃຫ້ຊາບ ກ່ຽວກັບສະພາບການຈັດຕັ້ງປະຕິບັດວຽກງານແຮງງານ, ເສຍອົງຄະ ແລະ ສັງຄົມ ຂອງຫວຽດນາມ ທີ່ພົ້ນເດັ່ນ, ລວມທັງ ຈຸດປະສົງ ແລະ ແຜນການເຄື່ອນໄຫວເຮັດວຽກຮ່ວມກັບຂະແໜງການ ແລະ ທ້ອງຖິ່ນກ່ຽວຂ້ອງ ຂອງ ສປປ ລາວ; ໄດ້ນຳເອົາຄຳຢ້ຽມຢາມຖາມຂ່າວ ແລະ ຄຳເຊື້ອເຊີນ ຢ້ຽມຢາມ ສສ ຫວຽດນາມ ຂອງທ່ານນາຍົກລັດຖະມົນຕີ ແຫ່ງ ສສ ຫວຽດນາມ ມາຍັງທ່ານ ນາຍົກລັດຖະມົນຕີ ແຫ່ງ ສປປ ລາວ.
ຂ່າວ ແລະ ພາບ: ກົມປະຊາສຳພັນ ຫສນຍ.