ຕອນບ່າຍ ວັນທີ 14 ມີນາ 2024 ທີ່ສໍານັກງານນາຍົກລັດຖະ ມົນຕີ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບບັນດາທ່ານ ຄະນະຜູ້ແທນ ທີ່ໄດ້ເຂົ້າຮ່ວມກອງປະຊຸມໂຕະມົນ ປະຈໍາປີ 2023 ທີ່ໄດ້ຈັດຂຶ້ນໃນວັນທີ 13 ກຸມພາ ທີ່ຜ່ານມາ, ເຊິ່ງຄະນະຜູ້ແທນ ທີ່ເຂົ້າຢ້ຽມຂໍ່ານັບໃນຄັ້ງນີ້ ນຳພາໂດຍ ທ່ານ ນາງ ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງ ທຶນ.
ໃນໂອກາດນີ້, ທ່ານຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານໃຫ້ຊາບ ກ່ຽວກັບຜົນຂອງກອງປະຊຸມໂຕະມົນ ປະຈໍາປີ 2023 ເຫັນວ່າ: ກອງປະຊຸມໄດ້ຈັດຂຶ້ນ ພາຍໃຕ້ຫົວຂໍ້ “ເລັ່ງລັດການຈັດຕັ້ງປະຕິບັດ ຜົນການທົບທວນກາງສະໄໝ ຂອງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ເພື່ອບັນລຸເປົ້າໝາຍການພັດທະນາແບບຍືນຍົງ ແລະ ການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ຂອງ ສປປ ລາວ”. ດັ່ງນັ້ນ, ເນື້ອໃນສຳຄັນ ກອງປະຊຸມ ຈຶ່ງໄດ້ປຶກສາຫາລື ແລະ ປະກອບຄຳຄິດເຫັນ ຕໍ່ບັນດາຫົວຂໍ້ ກໍ່ຄືວາລະຕ່າງໆ ເປັນຕົ້ນ ການສະຫຼຸບການຈັດຕັ້ງປະຕິບັດ ກາງສະໄໝແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025), ຍຸດທະສາດການເງິນ ເພື່ອສະໜັບສະໜູນແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ຂອບການຟື້ນຟູເສດຖະກິດຂອງ ສປປ ລາວ; ບົດລາຍງານແຫ່ງຊາດແບບສະໝັກໃຈ ຄັ້ງທີ III ກ່ຽວກັບການຈັດຕັ້ງປະຕິ ບັດວາລະ 2030 ເພື່ອການພັດທະນາແບບຍືນຍົງ ຂອງ ສປປ ລາວ ແລະ ແຜນຍຸດທະສາດ ການຂ້າມຜ່ານອອກຈາກສະຖານະ ພາບປະເທດດ້ອຍພັດທະນາຢ່າງໂລ່ງລ່ຽນ ຂອງສປປ ລາວ (2022-2026 ແລະ ວິໄສທັດຮອດປີ 2030) ແລະ ທິດທາງໃນຕໍ່ໜ້າ; ການຮ່ວມມືເພື່ອການພັດທະນາທີ່ມີປະສິດທິຜົນ (ການເຂົ້າຮ່ວມ ຕິດຕາມປະສິດທິຜົນ ການຮ່ວມມື ເພື່ອການພັດທະນາ ໃນລະດັບສາກົນ ຄັ້ງທີ IV ຂອງ ສປປ ລາວ ແລະ ຄໍາແນະນໍາກ່ຽວກັບຂະບວນການໂຕະມົນ); ສະພາບເສດຖະກິດ ແລະ ທິດທາງການເຕີບໂຕ ເພື່ອຄວາມຍືນຍົງ ແລະ ສີຂຽວ; ການພັດທະນາຊັບພະຍາກອນມະນຸດ ເພື່ອການພັດທະນາແບບຍືນຍົງ ແລະ ອື່ນໆ.
ໃນໂອກາດດຽວກັນ, ທ່ານ ນາຍົກລັດຖະມົນຕີ ກໍ່ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ບັນດາທ່ານ ຄະນະຜູ້ແທນ ທີ່ໄດ້ເຂົ້າຮ່ວມກອງປະຊຸມໂຕະມົນ ປະຈຳປີ 2023; ສະແດງຄວາມຂອບໃຈ ແລະ ຊົມເຊີຍ ຕໍ່ຜົນສຳເລັດຂອງກອງປະຊຸມດັ່ງກ່າວ ໂດຍສະເພາະ ການປະກອບຄໍາຄິດເຫັນ ຂອງຄະນະຜູ້ແທນ ທີ່ກົງໄປກົງມາ ແລະ ສ້າງສັນ ຕໍ່ບັນດາຫົວຂໍ້ທີ່ໄດ້ນຳມາປຶກສາຫາລື ໃນກອງປະຊຸມ ເຊິ່ງເປັນການເສີມຂະຫຍາຍການຮ່ວມມື ແລະ ປະກອບສ່ວນສຳຄັນ ເຂົ້າໃນການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ ຂອງ ສປປ ລາວ ແລະ ບັນດາເປົ້າໝາຍການພັດທະນາແບບຍືນຍົງ (SDGs) ກໍ່ຄື ການກະກຽມອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ. ຫວັງຢ່າງຍິ່ງວ່າ ບັນດາຄູ່ຮ່ວມພັດທະນາ ຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ 5 ປີ ຄັ້ງທີ IX (2021-2025) ໂດຍສະເພາະ ໄລຍະສອງປີທ້າຍສະໄໝ ແລະ ບັນລຸໄດ້ບັນດາເປົ້າໝາຍການພັດທະນາແບບຍືນຍົງ ຮອດປີ 2030. ການປະກອບສ່ວນຊ່ວຍເຫຼືອ ໃນໄລຍະຜ່ານມາ ຂອງບັນດາຄູ່ຮ່ວມພັດທະນາ, ລັດຖະບານ ສປປ ລາວ ຖືເປັນປະໂຫຍດອັນສຳຄັນ ເຊິ່ງໄດ້ເປັນພື້ນຖານອັນດີ ໃຫ້ແກ່ການຈັດຕັ້ງວຽກງານຂອງລັດຖະບານ ກໍ່ຄື ການຈັດຕັ້ງປະຕິ ບັດມະຕິຂອງສະພາແຫ່ງຊາດ, ການສືບຕໍ່ປະຕິບັດວາລະແຫ່ງ ຊາດ, ການເປັນປະທານອາຊຽນ ແລະ ປີທ່ອງທ່ຽວລາວ 2024 ໃຫ້ມີຜົນສຳເລັດຕາມຄາດໝາຍທີ່ກຳນົດໄວ້. ພ້ອມກັນນັ້ນ, ທ່ານ ນາຍົກລັດຖະ ມົນຕີ ຍັງໄດ້ແຈ້ງໃຫ້ຊາບ ກ່ຽວກັບຄວາມພະຍາຍາມ ແລະ ເອົາໃຈໃສ່ ຂອງລັດຖະບານ ຕໍ່ການພັດທະ ນາ ໃນຂົງເຂດວຽກງານຕ່າງໆ ທີ່ຕິດພັນກັບການຊ່ວຍເຫຼືອຂອງຄູ່ຮ່ວມພັດທະນາ, ລວມທັງ ທ່າແຮງ, ຂໍ້ຫຍຸ້ງຍາກ ແລະ ສິ່ງທ້າຍທາຍ ຕໍ່ການປະຕິບັດແຜນການດ້ານຕ່າງໆ ຕື່ມອີກ.
ຂ່າວ ແລະ ພາບ: ກົມປະຊາສຳພັນ ຫສນຍ.
