ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ນາຍົກລັດຖະມົນຕີ ພົບປະໂອ້ລົມການນຳ ແລະ ພະນັກງານຫຼັກແຫຼ່ງແຂວງຜົ້ງສາລີ
ໃນໂອກາດທີ່ທ່ານ ສອນໄຊ ສີພັນດອນ, ນາຍົກລັດຖະມົນຕີ, ຫົວໜ້າຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງ ເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງ ປະເທດ (ຫົວໜ້າຄະນະສະເພາະກິດ 19/ກມສພ) ພ້ອມດ້ວຍບັນດາທ່ານຮອງລັດຖະມົນຕີ ກະຊວງ-ອົງການ ຈຳນວນໜຶ່ງ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ໃນທ້າຍເດືອນພະຈິກ 2023, ທ່ານ ນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມ ຕໍ່ການນຳ ແລະ ພະນັກງານຫຼັກແຫຼ່ງ ຂອງແຂວງດັ່ງກ່າວ ໂດຍການຕ້ອນຮັບ ແລະ ນຳພາຄະນະເຂົ້າຮ່ວມຮັບຟັງການພົບປະໂອ້ລົມຂອງທ່ານ ຄໍາຜອຍ ວັນນະສານ, ເຈົ້າແຂວງໆຜົ້ງສາລີ.
ໃນໂອກາດນີ້, ທ່ານ ເຈົ້າແຂວງໆຜົ້ງສາລີ ໄດ້ລາຍງານໃຫ້ຊາບ ກ່ຽວກັບຜົນສຳເລັດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະຜ່ານມາ ແລະ ທິດທາງຄາດໝາຍ 5 ປີ (2021-2025) ເຫັນວ່າ ແຂວງໄດ້ສຸມໃສ່ແກ້ໄຂ 8 ບັນຫາຕົ້ນຕໍ ທີ່ພົບພໍ້ຜ່ານມາ ແລະ ພວມປະເຊີນໃນປັດຈຸບັນ ເປັນຕົ້ນ ຄວາມທຸກຍາກຂອງປະຊາຊົນ ໃນລະດັບບ້ານ ແລະ ຄອບຄົວ ຍັງກວມອັດຕາສ່ວນສູງ; ປະກົດການຫຍໍ້ທໍ້ໃນສັງຄົມ ຍັງເກີດຂຶ້ນຢູ່ຫຼາຍບໍລິ ເວນ ແລະ ມີທ່າອ່ຽງເພີ່ມຂຶ້ນໃນລະດັບທີ່ແຕກຕ່າງກັນ ທັງຢູ່ໃນຕົວເມືອງ ແລະ ຊົນນະບົດ; ການນໍາໃຊ້ຊັບພະຍາກອນ ທໍາມະຊາດ ຍັງຟູມເຟືອຍ, ບໍ່ມີປະສິດທິຜົນສູງ ແລະ ກ້າວໄປເຖິງດັບສູນ; ຄວາມສາມາດຂອງພະນັກງານນໍາພາ-ຄຸ້ມຄອງ ແລະ ພະນັກງານວິຊາການ ຍັງຈໍາກັດ; ຄຸນນະພາບ ຂອງຊັບພະຍາກອນມະນຸດຢູ່ພາຍໃນແຂວງຍັງຕໍ່າ; ປະຊາຊົນໃນເຂດຊົນນະບົດ ສ່ວນຫຼາຍຍັງບໍ່ຮູ້ພາສາລາວ; ຄວາມຕ້ອງການພັດທະນາສູງ ແຕ່ທຶນຮອນງົບປະມານມີຈໍາກັດ; ການປ່ຽນແປງດິນຟ້າອາກາດ ແລະ ການລະບາດພະຍາດຕ່າງໆ ຍັງເປັນໄພຂົມຂູ່ ຕໍ່ການດໍາລົງຊີວິດ ແລະ ການສ້າງສາພັດທະນາ. ຄຽງຄູ່ກັບຄວາມພະຍາຍາມ ໃນການແກ້ໄຂຄວາມຫຍຸ້ງຍາກດັ່ງກ່າວ, ແຂວງ ໄດ້ມີບາງຂໍ້ສະເໜີ ຕໍ່ລັດຖະບານ ເປັນຕົ້ນ ຄົ້ນຄ້ວາແຫຼ່ງທຶນ ເພື່ອມາຈັດຕັ້ງປະຕິບັດໂຄງການກໍ່ສ້າງຍົກລະດັບເສັ້ນທາງ ຈາກເມືອງບຸນໃຕ້ ຫາສະຖານີລົດໄຟ ເມືອງນາໝໍ້, ແຂວງອຸດົມໄຊ; ຄົ້ນຄວ້າສະໜອງເງິນອຸດໜູນ ໃຫ້ຄູອາສາສະໝັກ; ລະດົມແຫຼ່ງທຶນມາຊ່ວຍກໍ່ສ້າງໂຄງລ່າງພື້ນຖານແກ້ໄຂຄວາມທຸກຍາກ ຂອງປະຊາຊົນ ເປັນຕົ້ນ ບ້ານທີ່ບໍ່ເສັ້ນທາງລົດເຂົ້າເຖິງ, ບ້ານບໍ່ໄດ້ຊົມໃຊ້ລະບົບນໍ້າລິນ-ນໍ້າສະອາດ, ໂຄງລ່າງພື້ນຖານຫ້ອງຮຽນ ແລະ ໂຮງຮຽນ ທີ່ຍັງປະຖົມປະຖານ.
ໃນໂອກາດດຽວກັນ, ທ່ານ ນາຍົກລັດຖະມົນ ກໍ່ໄດ້ໃຫ້ກຽດໂອ້ລົມໃຫ້ທິດຊີ້ນຳ, ເຊິ່ງກ່ອນອື່ນທ່ານ ໄດ້ກ່າວສະ ແດງຄວາມຍ້ອງຍໍຊົມເຊີຍ ຕໍ່ທຸກພາກສ່ວນທີ່ກ່ຽວຂ້ອງຂອງແຂວງ ທີ່ໄດ້ມີຄວາມພະຍາຍາມປະກອບສ່ວນເຂົ້າໃນການສ້າງສາພັດທະນາປະເທດຊາດ ກໍ່ຄື ການພັດທະນາເສດຖະກິດ-ສັງຄົມຂອງແຂວງ ຈົນໄດ້ມີຜົນສຳເລັດໃນຫຼາຍດ້ານ. ສໍາລັບທິດທາງ ແລະ ແຜນການລວມ ແມ່ນເຫັນດີເປັນເອກະພາບນຳແຂວງ ໂດຍສະເໜີໃຫ້ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດ ໃຫ້ມີຜົນສຳເລັດ ແລະ ໄດ້ຮັບໝາກຜົນຕົວຈິງ. ພ້ອມນັ້ນ, ທ່ານ ໄດ້ມີຄຳເຫັນເນັ້ນໜັກໃຫ້ການນຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ສືບຕໍ່ສຸມໃສ່ວຽກງານຈຳນວນໜຶ່ງ ເປັນຕົ້ນ ສືບຕໍ່ເອົາໃຈໃສ່ນຳພາ-ຊີ້ນໍາ ວຽກງານປ້ອງກັນຊາດ-ປ້ອງກັນຄວາມສະຫງົບ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ ໃຫ້ມີຄວາມສະຫງົບ; ເອົາໃຈໃສ່ວຽກງານປັບປຸງກໍ່ສ້າງສະມາຊິກພັກ ໃຫ້ມີແນວຄິດໜັກແໜ້ນເຂັ້ມແຂງ, ຫັນຈາກແນວຄິດ ແລະ ຄວາມເຊື່ອຖື ທີ່ເປັນການກົດໜ່ວງຖ່ວງດຶງການພັດທະນາ ໄປສູ່ອັນໃໝ່ທີ່ກ້າວໜ້າ ແລະ ເປັນເຈົ້າການກວ່າເກົ່າ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໃຫ້ມີຜົນສຳເລັດຕາມແຜນທີ່ກຳນົດໄວ້; ສືບຕໍ່ຊຸກຍູ້ການສ້າງພື້ນຖານການຜະລິດ ໃນຂົງເຂດອຸດສາຫະກໍາ, ກະສິກໍາ, ຫັດຖະກໍາ ທີ່ເປັນທ່າແຮງຂອງແຂວງ ໂດຍສະເພາະ ການປູກຊາ, ອ້ອຍ ແລະ ການບໍລິການຕ່າງໆ ໃຫ້ແຂງແຮງກວ່າເກົ່າ; ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍຖືເອົາວຽກງານຫັນລົງກໍ່ສ້າງຮາກຖານການເມືອງ, ສ້າງຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບວຽກງານ 3 ສ້າງ ໃຫ້ເປັນຂະບວນຟົດຟື້ນກວ້າງຂວາງ; ເພີ່ມທະວີຄວາມເອົາໃຈໃສ່ ຊຸກຍູ້ການເກັບລາຍຮັບຢູ່ບັນດາດ່ານຊາຍແດນ, ປັບປຸງການຄຸ້ມຄອງດ່ານ ແລະ ບຸກຄະລາກອນ ໃຫ້ແທດເໝາະ ຕາມທິດຫັນເປັນທັນສະໄໝ, ໂປ່ງໃສ, ມີຄວາມສະດວກ, ວ່ອງໄວ, ຫຼຸດຜ່ອນຂັ້ນຂອດທີ່ບໍ່ຈໍາເປັນ ແລະ ດໍາເນີນຂັ້ນຕອນອະນຸມັດໂຄງການໃຫ້ໄວ; ເພີ່ມທະວີດຶງດູດການລົງທຶນ ທີ່ມີຄຸນນະພາບໃຫ້ຫຼາຍຂຶ້ນ. ພ້ອມນັ້ນ, ການຊຳລະໃຫ້ແກ່ນໍາເຂົ້າ-ສົ່ງອອກສິນຄ້າ ແລະ ການນໍາເຂົ້າທຶນ ຕ້ອງຜ່ານລະບົບທະນາຄານ; ຄຸ້ມຄອງການເຄື່ອນໄຫວທາງການເງິນ ຂອງທະນາຄານທຸລະກິດ ໃຫ້ມີຄວາມໂປ່ງໃສ; ສຸມໃສ່ແກ້ໄຂບັນຫາການແລກປ່ຽນເງິນຕາ ນອກລະບົບ, ຮັບປະກັນສະຖຽນລະພາບທາງດ້ານການເງິນ ໂດຍນໍາໃຊ້ມາດຕະການຕ່າງໆຢ່າງເຂັ້ມງວດ, ເດັດຂາດຕໍ່ຜູ້ລະເມີດ ແລະ ກະທໍາຜິດກົດໝາຍ, ລວມທັງ ຜູ້ສວຍໃຊ້ໜ້າທີ່ຫາຜົນປະໂຫຍດແບບບໍ່ຊອບທໍາ ໂດຍບໍ່ມີການຍົກເວັ້ນ; ສືບຕໍ່ຂຶ້ນທະບຽນ ແລະ ຄຸ້ມຄອງຜູ້ນໍາເຂົ້າ-ສົ່ງອອກ, ແກ້ໄຂການຫຼົບຫຼີກເສຍພາສີ ແລະ ອື່ນໆ; ເອົາໃຈໃສ່ຊຸກຍູ້ ການປັບປຸງແກ້ໄຂຂັ້ນຂອດການບໍລິການ ໃຫ້ສະດວກ, ວ່ອງໄວ; ຄົ້ນຄວ້າກຳນົດຄ່າບໍລິການຢູ່ສາງຄ່ຽນຖ່າຍສິນຄ້າ ຢ່າງສົມເຫດສົມຜົນ; ສຳລັບບັນດາຂໍ້ສະເໜີຂອງແຂວງ ມອບໃຫ້ບັນດາກະຊວງ-ອົງການ ທີ່ກ່ຽວຂ້ອງ ນຳໄປຄົ້ນຄວ້າຕາມຂັ້ນຕອນ ແລະ ລະບຽບການ ແລ້ວລາຍງານລັດຖະບານ ເພື່ອພິຈາລະນາ.
ໃນຕອນທ້າຍ, ທ່ານ ນາຍົກລັດຖະມົນຕີ ໄດ້ມອບເຄື່ອງໃຊ້ຫ້ອງການ ແລະ ງົບປະມານຈຳນວນໜຶ່ງ ໃຫ້ແຂວງ ເພື່ອນຳໃຊ້ເຂົ້າໃນວຽກງານທີ່ຈຳເປັນ ໃນການຈັດຕັ້ງປະຕິບັດວຽກງານພາຍໃນແຂວງ ໃຫ້ມີຜົນສໍາເລັດ ແລະ ເກີດປະໂຫຍດສູງ ຕໍ່ການພັດທະນາເສດຖະກິດ-ສັງຄົມຂອງແຂວງ ກໍ່ຄື ຕໍ່ປະເທດຊາດ ແລະ ປະຊາຊົນ.
ຂ່າວແລະພາບ: ກົມປະຊາສຳພັນ ຫສນຍ.