ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນຕອນເຊົ້າ ວັນທີ 6 ກຸມພາ 2024 ຢູ່ທີ່ສະໂມສອນໃຫຍ່ຂອງແຂວງບໍ່ແກ້ວ ທ່ານ ສອນໄຊ ສີພັນດອນ, ນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມ ແລະ ໃຫ້ທິດຊີ້ນຳ ຕໍ່ການນຳຫຼັກແຫຼ່ງແຂວງບໍ່ແກ້ວ ໂດຍມີທ່ານ ບົວຄົງ ນາມມະວົງ, ເຈົ້າແຂວງໆບໍ່ແກ້ວ ນຳພາຄະນະໃຫ້ການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມ.
ໃນໂອກາດນີ້, ທ່ານ ເຈົ້າແຂວງໆບໍ່ແກ້ວ ໄດ້ລາຍງານໃຫ້ຊາບ ກ່ຽວກັບສະພາບ ການພັດທະນາເສດຖະກິດ-ສັງ ຄົມຂອງແຂວງ ໃນໄລຍະ 1 ປີຜ່ານມາ ເຊິ່ງອັນພົ້ນເດັ່ນ ເຫັນວ່າ ທົ່ວແຂວງສືບຕໍ່ມີສະຖຽນລະພາບ ທາງດ້ານການ ເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ການແກ້ໄຂວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຫຼາຍພາກສ່ວນໃນສັງຄົມ ໄດ້ເປັນເຈົ້າການ ແລະ ມີສ່ວນຮ່ວມເຮັດໃຫ້ການແກ້ໄຂບັນຫາດັ່ງ ກ່າວ ໄດ້ຮັບຜົນດີເປັນກ້າວໆ; ເສດຖະກິດຂະຫຍາຍຕົວໃນລະດັບ 4,8%; ລວມຍອດຜະລິດຕະພັນພາຍໃນ (GDP) ມີມູນຄ່າ 3.715 ຕື້ກວ່າກີບ, ສາມາດຈັດເກັບລາຍຮັບໄດ້ 640 ຕື້ກວ່າກີບ ເທົ່າກັບ 136,83% ຂອງແຜນການປີ, ແຜນລາຍຈ່າຍ ປະຕິບັດໄດ້ 341 ຕື້ກວ່າກີບ ເທົ່າກັບ 97,93% ຂອງແຜນການປີ; ມີບ້ານຊົມໃຊ້ນໍ້າລິນ ແລະ ແບບຢ່າງດ້ານສາທາລະນະສຸກ ກວມ 98% ຂອງຈໍານວນບ້ານໃນທົ່ວແຂວງ, ບ້ານວັດທະນະທໍາ ກວມ 85%, ບ້ານພັດທະນາ ກວມ 48,39%, ຄອບຄົວພັດທະນາ ກວມ 59,62%, ບ້ານພົ້ນທຸກ ກວມ 75,81%, ຄອບຄົວພົ້ນທຸກ ກວມ 79,54%. ນອກນັ້ນ, ທ່ານເຈົ້າແຂວງ ຍັງໄດ້ລາຍງານໃຫ້ຊາບ ກ່ຽວກັບຂໍ້ຄົງຄ້າງຂອງແຂວງຈໍານວນໜຶ່ງ ແລະ ທິດທາງແຜນວຽກຈຸດສຸມໃນຕໍ່ໜ້າ ເພື່ອສືບຕໍ່ປົກປັກຮັກສາ ແລະ ພັດທະນາແຂວງ ໃຫ້ນັບມື້ຈະເລີນກ້າວໜ້າບໍ່ຢຸດຢັ້ງ.
ໃນໂອກາດດຽວກັນ, ທ່ານ ນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມ ຕໍ່ການນຳຫຼັກແຫຼ່ງ ກໍ່ຄືຜູ້ເຂົ້າຮ່ວມ ໂດຍໄດ້ເຈາະຈີ້ມ ຕໍ່ບາງຂົງເຂດວຽກງານ ທີ່ພາກລັດ ແລະ ສັງຄົມ ໃຫ້ຄວາມສົນໃຈ. ຫຼັງຈາກນັ້ນ ຜູ້ຕາງໜ້າຈາກຂະແໜງ ການກ່ຽວຂ້ອງຂອງແຂວງ ແລະ ສູນກາງ ກໍ່ໄດ້ມີຄຳເຫັນລາຍງານ ໃຫ້ຄວາມກະຈ່າງແຈ້ງ ກ່ຽວກັບສະພາບຄວາມເປັນຈິງ ຂອງບັນດາບັນຫາ ທີ່ທ່ານນາຍົກລັດຖະມົນຕີ ໄດ້ມີຄໍາເຫັນເຈາະຈີ້ມນັ້ນ; ພ້ອມກັນນັ້ນ, ທ່ານ ນາຍົກລັດຖະມົນຕີ ກໍ່ໄດ້ຍົກໃຫ້ເຫັນ ສະພາບການພົ້ນເດັ່ນທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ, ລວມທັງ ຂໍ້ຫຍຸ້ງຍາກ, ຂໍ້ຈຳກັດ ແລະ ສິ່ງທ້າທາຍ ຕໍ່ການພັດທະນາເສດຖະ ກິດ- ສັງຄົມແຫ່ງຊາດ ໃນໄລຍະຜ່ານມາ ກໍ່ຄື ປະຈຸບັນ. ອັນສຳຄັນ ທ່ານນາຍົກລັດ ຖະມົນຕີ ໄດ້ເນັ້ນໜັກ ໃຫ້ພະນັກງານຫຼັກແຫຼ່ງທົ່ວແຂວງບໍ່ແກ້ວ ເອົາໃຈໃສ່ຕື່ມບາງດ້ານ ເປັນຕົ້ນ ເອົາໃຈໃສ່ສຶກສາອົບ ຮົມການເມືອງແນວຄິດ ຂອງພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ໃຫ້ຮັບຮູ້ ແລະ ເຂົ້າໃຈແຈ້ງ ຕໍ່ສະພາບຄວາມເປັນຈິງ ກ່ຽວກັບບັນຫາຄວາມຫຍຸ້ງຍາກທາງດ້ານຕ່າງໆ ແລະ ຄວາມພະຍາຍາມເອົາໃຈໃສ່ ໃນການແກ້ໄຂ ຂອງພັກ ແລະ ລັດຖະບານ ກໍ່ຄື ອົງການປົກຄອງຂັ້ນຕ່າງໆ ເຊິ່ງເຫັນວ່າ ມີທ່າອ່ຽງດີຂຶ້ນເປັນກ້າວໆ; ພ້ອມກັນຈັດຕັ້ງຜັນຂະຫຍາຍມະຕິຂອງສູນກາງພັກ ວ່າດ້ວຍສືບຕໍ່ຊຸກຍູ້ການຜັນຂະຫຍາຍ ແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ເຂົ້າສູ່ທຸກຂົງເຂດວຽກງານຕົວຈິງ ເພື່ອໃຫ້ມີການຫັນປ່ຽນທີ່ດີຂຶ້ນຢ່າງຈະແຈ້ງ; ພ້ອມກັນຈັດຕັ້ງປະຕິບັດ ດໍາລັດສະບັບເລກທີ 381/ນຍ ວ່າດ້ວຍການກໍານົດໜ້າວຽກ ແລະ ແບ່ງຄວາມຮັບຜິດຊອບ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ທ້າຍສະໄໝ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ປະຈຳປີ 2024 ແລະ ແຜນການແກ້ໄຂຜົນການກວດສອບ ໃຫ້ໄດ້ຮັບຜົນດີ; ຊຸກຍູ້ສົ່ງເສີມການຂະຫຍາຍລະບົບຊຳລະສະສາງ ຜ່ານບັນຊີທະນາ ຄານ ໃຫ້ສັງຄົມໄດ້ຊົມໃຊ້ກວ້າງຂວາງ ແລະ ສະດວກສະບາຍ, ທັງເປັນການດຶງດູດເງິນຕາ ເຂົ້າສູ່ລະບົບການຄຸ້ມຄອງຂອງທະນາຄານ ໃຫ້ຫຼາຍຂຶ້ນ; ເອົາໃຈໃສ່ຄຸ້ມຄອງເງິນຕາ, ລວມທັງ ເງິນທີ່ນຳເຂົ້າມາລົງທຶນພາຍໃນແຂວງ ໃຫ້ຖືກຕ້ອງ ຕາມກົດໝາຍ ແລະ ລະບຽບການທີ່ກຳນົດໄວ້; ຊຸກຍູ້ສົ່ງເສີມການຊົມໃຊ້ຜະລິດຕະພັນສິນຄ້າພາຍໃນໃຫ້ຫຼາຍຂຶ້ນ, ສົ່ງ ເສີມການຜະລິດເປັນສິນຄ້າຂອງທ້ອງຖິ່ນຕົນ ໃຫ້ກຸ້ມຕົນເອງ ແລະ ສາມາດຈຳໜ່າຍສົ່ງອອກຕ່າງປະເທດ ເພື່ອຫຼີກລ້ຽງການນຳເຂົ້າປະເພດສິນຄ້າຟູມເຟືອຍ ນັບມື້ໃຫ້ຫຼຸດລົງ; ສົ່ງເສີມການທ່ອງທ່ຽວ ດ້ວຍການໂຄສະນາເຜີຍແຜ່ ດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວໃຫ້ນັບມື້ຫຼາຍຂຶ້ນ; ສືບຕໍ່ຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ, ສ້າງອາຊີບຄົງທີ ແລະ ວຽກເຮັດງານທຳໃຫ້ເຂົາເຈົ້າໄດ້ຮັບການພັດທະນາ ນັບມື້ດີຂຶ້ນເປັນກ້າວໆ ໂດຍອີງໃສ່ບັນດາມາດຕະຖານພົ້ນທຸກ ແລະ ມາດຕະຖານການພັດທະນາ ທີ່ໄດ້ກຳນົດໃນດຳລັດສະບັບເລກທີ 348/ລບ; ພ້ອມກັນສືບຕໍ່ກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ສໍາເລັດຕາມຄາດໝາຍທີ່ກໍານົດໄວ້ ໄປຄຽງຄູ່ກັບປັບປຸງກົງຈັກການຈັດຕັ້ງຂັ້ນຕ່າງໆ ຕາມທິດກະທັດຮັດ, ສົມເຫດສົມຜົນ ແລະ ມີປະສິດທິຜົນ.
ຂ່າວ ແລະ ພາບ: ກົມປະຊາສຳພັນ ຫສນຍ.