ພາຍຫຼັງສຳເລັດການຢ້ຽມຢາມ ແລະ ພົບປະໂອ້ລົມ ຕໍ່ປະຊາຊົນບ້ານບວມອໍ້, ເມືອງຊຽງເງິນ ໃນຕອນເຊົ້າວັນທີ 5 ສິງຫາ 2024 ແລະ ມາໃນຕອນບ່າຍ ຂອງວັນດຽວກັນ ທ່ານ ສອນໄຊ ສີພັນດອນ, ນາຍົກລັດຖະມົນຕີ ກໍ່ໄດ້ສືບຕໍ່ພົບປະໂອ້ລົມ ຕໍ່ການນໍາຫຼັກແຫຼ່ງຂອງແຂວງຫຼວງພະບາງ ທີ່ຫ້ອງວ່າການແຂວງດັ່ງກ່າວ; ໂດຍມີທ່ານ ຄຳຂັນ ຈັນທະວີສຸກ, ເຈົ້າແຂວງໆຫຼວງພະບາງ ນຳພາຄະນະນຳ ແລະ ພະນັກ ງານຫຼັກແຫຼ່ງຂອງແຂວງ ເຂົ້າຮ່ວມຮັບຟັງການພົບປະໂອ້ລົມ ແລະ ຮັບເອົາທິດຊີ້ນຳຂອງທ່ານ ນາຍົກລັດຖະມົນຕີ ໄປຈັດຕັ້ງປະຕິບັດຜັນຂະຫຍາຍ ສູ່ວຽກງານຕົວຈິງ.
ໃນໂອກາດນີ້, ທ່ານ ເຈົ້າແຂວງໆຫຼວງພະບາງ ໄດ້ລາຍງານໃຫ້ຊາບ ກ່ຽວກັບ ສະພາບ ການພັດທະນາເສດຖະ ກິດ-ສັງຄົມ, ຕິດພັນກັບການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ຂອງແຂວງ ເຫັນວ່າ: ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ; ເສດຖະກິດຂະຫຍາຍຕົວ ໃນລະດັບ 3.6%, ລາຍຮັບໃສ່ຫົວຄົນສະເລ່ຍໄດ້ 20.99 ລ້ານກີບ; ການເກັບລາຍຮັບ ມາຮອດວັນທີ 22 ກໍລະກົດ ທີ່ຜ່ານມາ ປະຕິບັດໄດ້ 86.35% ຂອງແຜນການ, ແຜນລາຍຈ່າຍ ປະຕິບັດໄດ້ 58.77% ຂອງແຜນການ; ສາມາດສົ່ງອອກສິນຄ້າກະສິກໍາ ມູນຄ່າ 22.94 ລ້ານໂດລາ; ສ້າງຄອບຄົວພົ້ນທຸກໄດ້ 367 ຄອບຄົວ ແລະ ບ້ານພົ້ນທຸກໄດ້ 01 ບ້ານ; ໄດ້ລົງຕິດຕາມ, ກວດກາ, ຄຸ້ມຄອງລາຄາສິນຄ້າ ໝວດສິນຄ້າທີ່ຈະກະທົບເຖິງການດໍາລົງຊີວິດປະຈໍາວັນ ບໍ່ໃຫ້ສວຍໂອກາດຂຶ້ນລາຄາ ທີ່ບໍ່ສົມເຫດສົມຜົນ; ໂຄງລ່າງເສັ້ນ ທາງ ຢູ່ເທດສະບານແຂວງ ແລະ ໄປຫາບັນດາເມືອງ ໄດ້ຮັບການປັບປຸງ ແລະ ກໍ່ສ້າງໃໝ່ຈໍານວນໜຶ່ງ; ການຈັດຕັ້ງປະຕິບັດ 11 ຄາດໝາຍ ດ້ານສາທາລະນະສຸກ ບັນລຸໄດ້ 8 ຄາດໝາຍ ແລະ ຍັງບໍ່ສາມາດບັນລຸ 3 ຄາດໝາຍ; ໄດ້ເອົາໃຈໃສ່ໂຄສະນາປະຊາສໍາພັນ ແລະ ສ້າງກິດຈະກໍາ ເພື່ອສົ່ງເສີມການທ່ອງທ່ຽວ ເປັນຂະບວນການຟົດຟື້ນດີ ຊຶ່ງໄດ້ຮັບຄວາມສົນໃຈຈາກແຂກພາຍໃນ ແລະ ຕ່າງປະເທດ ໂດຍສາມາດດຶງດູດນັກທ່ອງທ່ຽວ ໄດ້ 911,618 ເທື່ອຄົນ, ເທົ່າກັບ 51.25% ຂອງແຜນການປີ ຊຶ່ງຄາດຄະເນໜົດປີຈະສາມາດບັນລຸໄດ້ຕາມແຜນ, ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 66.66%. ນອກນັ້ນ ຍັງໄດ້ລາຍງານ ກ່ຽວກັບຜົນກະທົບຈາກໄພພິບັດທາງທໍາມະຊາດນໍ້າຖ້ວມ ຢູ່ເມືອງໂພນທອງ, ເມືອງປາກແຊງ ແລະ ເມືອງວຽງຄຳ ໃນທ້າຍເດືອນກໍລະກົດທີ່ຜ່ານມາ ຕື່ມອີກ.
ໃນໂອກາດດຽວກັນ, ທ່ານ ນາຍົກລັດຖະມົນຕີ ກໍ່ໄດ້ມີຄຳເຫັນເຈາະຈີ້ມ ແລະ ສະເໜີຂະແໜງການກ່ຽວຂ້ອງຂອງແຂວງ ປະກອບຄຳເຫັນຕື່ມ ໂດຍສະເພາະ ການ ລາຍງານ ແລະ ສະເໜີບາງວຽກງານທີ່ຕິດພັນກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ. ຫຼັງຈາກນັ້ນ ກໍ່ໄດ້ໂອ້ລົມຕໍ່ຜູ້ເຂົ້າຮ່ວມ ໂດຍໄດ້ຍົກໃຫ້ເຫັນ ສະພາບການພົ້ນເດັ່ນ ໃນພັດທະນາເສດຖະກິດ-ສັງຄົມແຫ່ງຊາດ, ການຄຸ້ມ ຄອງລັດ-ຄຸ້ມຄອງສັງຄົມ, ລວມທັງ ຂໍ້ຫຍຸ້ງຍາກ ແລະ ສິ່ງທ້າທາຍ ຈາກປັດໃຈພາຍ ໃນ ແລະ ພາຍນອກ ຕໍ່ການປົກປັກຮັກສາ ແລະ ພັດທະນາປະເທດເຮົາ. ອັນສຳຄັນ, ທ່ານ ນາຍົກລັດຖະມົນຕີ ໄດ້ຊີ້ນຳໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ; ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ໃນສັງຄົມ; ເສີມຂະຫຍາຍທຸກຄວາມອາດສາມາດ ແລະ ທ່າແຮງບົ່ມຊ້ອນຂອງແຂວງ ເຂົ້າໃນການຜະລິດ ແລະ ບໍລິການໃຫ້ເຂັ້ມແຂງ, ຮັບປະກັນການພັດທະ ນາແບບຍືນຍົງ, ເອົາໃຈໃສ່ຈັດຕັ້ງຜັນຂະຫຍາຍທິດຊີ້ນໍາຂອງພັກ ກໍ່ຄື ມະຕິຕົກລົງ ໃນການສ້າງເສດຖະກິດເອກະລາດ ເປັນເຈົ້າຕົນເອງ ຕາມມະຕິ 05/ລບ ໃຫ້ປະກົດຜົນເປັນຮູບປະທຳຕົວຈິງ; ເພີ່ມທະວີຄວາມເອົາໃຈໃສ່ນຳພາ-ຊີ້ນຳຢ່າງໃກ້ຊິດ ຕໍ່ສະມາຊິກພັກ-ພະນັກງານ ໂດຍສະເພາະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ຄວາມເປັນເຈົ້າການ, ຄວາມເປັນແບບຢ່າງ ໃນການປະຕິບັດໜ້າທີ່ວຽກງານ, ຫຼີກລ່ຽງບໍ່ໃຫ້ມີການລະເມີດລະບຽບກົດໝາຍ; ສືບຕໍ່ຊຸກຍູ້ສົ່ງ ເສີມການຜະລິດພາຍໃນ ໃຫ້ເຂັ້ມແຂງ, ກຸ້ມຕົນເອງ ໄປຄຽງຄູ່ກັບການສົ່ງເສີມຜະລິດຕະພັນທ່ອງທ່ຽວ ເພື່ອເປັນການສົ່ງອອກສິນຄ້າກັບທີ່ ແລະ ສ້າງລາຍຮັບໃຫ້ແກ່ປະຊາຊົນ; ສືບຕໍ່ຊຸກຍູ້ສົ່ງເສີມວຽກງານການທ່ອງທ່ຽວ ຢ່າງແຂງແຮງ ຕິດພັນກັບການເປັນປະທານກອງປະຊຸມອາຊຽນ ດ້ວຍການສຸມໃສ່ປັບປຸງພື້ນຖານໂຄງລ່າງ ໂດຍສະເພາະ ເສັ້ນທາງ, ສະຖານທີ່່ທ່ອງທ່ຽວ ແລະ ບໍລິການນັກທ່ອງທ່ຽວ ເພື່ອສ້າງຄວາມປະທັບໃຈໃຫ້ນັກທ່ອງທ່ຽວ; ເອົາໃຈໃສ່ຜັນຂະຫຍາຍນິຕິກຳຂອງຄະນະສະເພາະກິດ 19/ກມສພ ໂດຍສະເພາະ ບັນດາວຽກຈຸດສຸມ ໃຫ້ເປັນຮູບປະທຳ ແລະ ໄວຂຶ້ນ; ເອົາໃຈ ໃສ່ປັບປຸງສະພາບແວດລ້ອມ ໃນການດຳເນີນທຸລະກິດ ແລະ ການລົງທຶນ ໃຫ້ດີຂຶ້ນກວ່າເກົ່າ, ທັງຄຸ້ມຄອງບັນດາໂຄງການຂະໜາດໃຫ່ຍ ໃຫ້ມີປະສິດທິຜົນ; ເອົາໃຈໃສ່ແກ້ໄຂບັນຫາຄູອາສາສະໝັກ, ການຂາດແຄນຄູສອນ ແລະ ການຂາດຮຽນຂອງນັກຮຽນ ໂດຍການປະຕິບັດນະໂຍບາຍ ຕາມມະຕິ ເລກທີ 09/ລບ; ສືບຕໍ່ເຄື່ອນໄຫວວຽກງານຕ່າງປະ ເທດ ເພື່ອຍາດແຍ່ງການຊ່ວຍເຫຼືອ ແລະ ແກ້ໄຂບັນຫາຄົງຄ້າງຕ່າງໆຕາມເຂດຊາຍແດນ; ເພີ່ມທະວີສະຕິລະວັງ ໃນການຮັບ ແລະ ຊົມໃຊ້ຂໍ້ມູນ ຈາກສື່ສັງຄົມອອນລາຍ, ພ້ອມທັງເປັນເຈົ້້າການຊີ້ແຈງ-ອະທິບາຍໃຫ້ແກ່ສັງຄົມ ເຂົ້້າໃຈໃຫ້ເລິກເຊິ່ງ-ທັນການ ຕໍ່ຫາງສຽງບໍ່ດີຕ່າງໆ ເພື່ອຕີຖອຍກົນອຸ ບາຍ ຂອງກຸ່ມຄົນທີ່ບໍ່ຫວັງດີ; ສືບຕໍ່ເອົາໃຈໃສ່ເຝົ້າລະວັງຢ່າງໃກ້ຊິດ ໃນການຕິດ ຕາມສະພາບ ການປ່ຽນແປງດິນຟ້າອາກາດ, ພ້ອມທັງ ແຈ້ງເຕືອນ ໃຫ້ປະຊາຊົນຮັບຮູ້ ຢ່າງເປັນປົກກະຕິ ເພື່ອວາງແຜນກຽມພ້ອມຮັບມື ໃຫ້ທັນກັບສະພາບການ.
ໃນຕອນທ້າຍ, ທ່ານ ນາຍົກລັດຖະມົນຕີ ຍັງໄດ້ມອບເງິນຈຳນວນໜຶ່ງ ເພື່ອປະ ກອບສ່ວນຊ່ວຍເຫຼືອ ແລະ ແກ້ໄຂໄພພິບັດນໍ້າຖ້ວມ ຢູ່ເມືອງວຽງຄຳ, ເມືອງໂພນທອງ ແລະ ເມືອງປາກແຊງ ຕື່ມອີກ.
ຂ່າວ ແລະ ພາບ: ກົມປະຊາສຳພັນ ຫສນຍ
