ໃນວັນທີ 19 ກັນຍາ 2024 ທ່ານ ສອນໄຊ ສີພັນດອນ, ນາຍົກລັດຖະມົນຕີ ພ້ອມດ້ວຍພັນລະຍາ ແລະ ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ໄປມອບເຄື່ອງຊ່ວຍເຫຼືອໃຫ້ປະຊາຊົນ ແລະ ເຄື່ອນໄຫວຕິດຕາມຊຸກຍູ້ ການຟື້ນຟູຜົນກະທົບ ພາຍຫຼັງທີ່ເກີດໄພພິບັດນໍ້າຖ້ວມ ຢູ່ແຂວງຫຼວງນໍ້າທາ, ໂດຍມີທ່ານ ວຽງສະຫວັດ ສີພັນດອນ ເຈົ້າແຂວງໆຫຼວງນໍ້າທາ ແລະ ພາກສ່ວນກ່ຽວຂ້ອງຂອງແຂວງ ຮ່ວມເຄື່ອນໄຫວວຽກງານຢູ່ພື້ນທີ່ຕົວຈິງ ເຂດບ້ານຕ່າງໆ ທີ່ໄດ້ຮັບຜົນກະທົບ.
ຈຸດປະສົງ ເພື່ອຕິດຕາມຊຸກຍູ້ ການຟື້ນຟູ ແລະ ແກ້ໄຂຜົນກະທົບ ຈາກໄພພິບັດນໍ້າຖ້ວມ ຢູ່ແຂວງຫຼວງນໍ້າທາ ໂດຍສະເພາະ ການຊ່ວຍເຫຼືອປະຊາຊົນດ້ານຕ່າງໆ ເປັນຕົ້ນ: ການຊ່ວຍເຫຼືອເຄື່ອງອຸປະໂພກ-ບໍລິໂພກ, ການຕິດຕາມເບິ່ງແຍງດູແລສຸຂະພາບ ແລະ ສຸຂະອານາໄມຂອງປະຊາຊົນ ກໍ່ຄືຜູ້ປະສົບໄພ; ການປັບ ປຸງ-ສ້ອມແປງໂຄງລ່າງພື້ນຖານ ເສັ້ນທາງ, ຂົວ, ລະບົບຊົນລະປະທານ, ລະບົບນໍ້າປະປາ, ສຳນັກງານຫ້ອງການ, ໂຮງຮຽນ, ໂຮງໝໍ ແລະ ອື່ນໆ ທີ່ເປ່ເພເສຍຫາຍ ໃຫ້ສາມາດກັບມານໍາໃຊ້ໄດ້ເປັນປົກກະຕິໂດຍໄວ.
ຜົນເສຍຫາຍຈາກໄພນໍ້າຖ້ວມ, ເນື່ອງຈາກພະຍຸໄຕ້ຝຸ່ນຢາກິ ພັດຜ່ານເຂດແຂວງຫຼວງນໍ້າທາ ໄດ້ເຮັດໃຫ້ ປະຊາຊົນໄດ້ຮັບຜົນກະທົບຫຼາຍກວ່າ 40,255 ຄົນ, ເຮືອນພັດໄຫຼນໍ້າຫຼາຍກວ່າ 115 ຫຼັງ, ປະຊາຊົນຂາດທີ່ຢູ່ອາໄສ, ສູນເສຍຊັບສິນ (ບໍ່ເຫຼືອຫຍັງ) ຫຼາຍກວ່າ 2,765 ຄົນ ແລະ ມີຄົນເສຍຊິວິດ 02 ຄົນ, ໃນນີ້: ເມືອງຫຼວງນໍ້າທາ ແມ່ນເຂດເທດສະບານແຂວງ ໄດ້ຮັບຜົນກະທົບໜັກໜ່ວງກວ່າໝູ່: ມີ 46 ບ້ານ, 4,231 ຄອບຄົວ, 3,519 ຫຼັງຄາເຮືອນ, 18,859 ຄົນ; ເມືອງສິງ: ມີ 7 ບ້ານ, 261 ຄອບຄົວ; ເມືອງນາແລ: ມີ 14 ບ້ານ, 1,751 ຄອບຄົວ, 7,188 ຄົນ. ລະບົບພື້ນຖານໂຄງລ່າງ ເຊັ່ນ: ຖະໜົນຫົນທາງ, ລະບົບໄຟຟ້າ, ນໍ້າປະປາ, ໂທລະຄົມມະນາຄົມ, ຕຶກອາຄານ, ສຳນັກງານຫ້ອງ ການ, ໂຮງຮຽນ, ໂຮງໝໍ, ຊັບສິນຂອງລັດ, ໂຮງງານ, ຮ້ານຄ້າ, ເຮືອນຊານ, ພາຫະນະ, ເຄື່ອງມືທໍາການຜະລິດ, ເຂດການຜະລິດກະສິກໍາ ແລະ ຊັບສິນຂອງປະຊາຊົນ ເປ່ເພເສຍຫາຍເປັນຈຳນວນຫຼວງຫຼາຍ, ປະຈຸບັນ ຍັງບໍ່ທັນສາມາດປະເມີນມູນຄ່າໄດ້.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ໄປຢ້ຽມຢາມ, ພົບປະໂອ້ລົມ ແລະ ມອບເຄື່ອງຊ່ວຍເຫຼືອ ໃຫ້ແກ່ປະຊາຊົນທີ່ຖືກຜົນກະທົບ ຈາກໄພພິບັດຄັ້ງນີ້ ຢູ່ເທດສະບານແຂວງດັ່ງກ່າວ ໂດຍໄດ້ນຳເອົາຄວາມຢ້ຽມຢາມຖາມຂ່າວ, ຄວາມເປັນຫ່ວງເປັນໄຍ ແລະ ເຫັນອົກເຫັນໃຈ ຈາກສູນກາງພັກ, ລັດຖະບານ ແລະ ສະພາແຫ່ງຊາດ ມາຍັງປະຊາຊົນບັນດາເຜົ່າ ຊາວແຂວງຫຼວງນໍ້າທາ ໂດຍສະເພາະ ຜູ້ປະສົບໄພນໍ້າຖ້ວມ; ໄດ້ຖາມເຖິງສະພາບຊີວິດການເປັນຢູ່ຂອງຜູ້ປະສົບໄພ, ສະພາບຜົນເສຍຫາຍ, ການຊ່ວຍເຫຼືອ, ການແກ້ໄຂບັນຫາຕ່າງໆ, ຄວາມຕ້ອງການອັນຈຳເປັນ ແລະ ອື່ນໆ. ອັນສຳຄັນ, ທ່ານ ນາຍົກລັດຖະມົນຕີ ໄດ້ມີຄໍາເຫັນໂອ້ລົມ ເປັນຕົ້ນ ໃຫ້ປະຊາຊົນ ສືບຕໍ່ຮັກສາມູນເຊື້ອຄວາມສາມັກຄີ ຊ່ວຍເຫຼືອເຊິ່ງກັນ ແລະ ກັນ, ພ້ອມກັນອົດທົນຜ່ານຜ່າຄວາມຫຍຸ້ງຍາກຕ່າງໆ ໃນຄັ້ງນີ້; ສືບຕໍ່ໃຫ້ການຮ່ວມມືກັບອົງການປົກຄອງທ້ອງຖິ່ນ ແລະ ຄະນະຄຸ້ມຄອງໄພພິບັດທຸກຂັ້ນ ໃນການເກັບກຳຂໍ້ມູນຜົນເສຍຫາຍ, ລວມທັງ ການກຳນົດແຜນຟື້ນຟູດ້ານຕ່າງໆ; ໃຫ້ອົງການປົກຄອງແຂວງ ສົມທົບກັບພາກສ່ວນທີ່ກ່ຽວຂ້ອງ ສືບຕໍ່ເກັບກຳຂໍ້ມູນຜົນເສຍຫາຍ, ສ້າງແຜນການຟື້ນຟູຜົນກະທົບດ້ານຕ່າງໆໂດຍໄວ; ສືບຕໍ່ໃຫ້ການຊ່ວຍເຫຼືອສິ່ງຈຳເປັນຕ່າງໆ ໃຫ້ແກ່ປະຊາຊົນທີ່ຖືກຜົນກະທົບ ໂດຍສະເພາະ ຜູ້ທີ່ຖືກຜົນກະທົບໜັກໜ່ວງ ທີ່ບໍ່ເຫຼືອຫຍັງ ໃຫ້ສາມາດຮັບປະກັນໃນການດໍາລົງຊີວິດຢ່າງປອດໄພ ໂດຍພື້ນຖານ; ກະກຽມແນວພັນພືດ-ສັດ, ພາຫະນະ ແລະ ອຸປະກອນ ສຳລັບການປູກ-ການລ້ຽງທົດແທນ, ລວມທັງ ປູກພືດລະດູແລ້ງ ທີ່ຈະມາເຖິງ ໃຫ້ພຽງພໍ ແລະ ທັນສະພາບການ.
ໃນໂອກາດດຽວກັນ, ທ່ານ ນາຍົກລັດຖະມົນຕີ ຍັງໄດ້ລົງໄປເບິ່ງສະພາບຜົນເສຍຫາຍຈາກໄພນໍ້າຖ້ວມ ໃນອາທິດທີ່ຜ່ານມາ ຢູ່ບ້ານຕ່າງໆ ພາຍໃນເທດສະບານແຂວງ ເປັນຕົ້ນ ບ້ານຫຼວງ, ບ້ານຂອນ, ບ້ານປ່າສັກ, ບ້ານປຸ່ງ, ບ້ານໃໝ່, ບ້ານບວມພຽງ, ບ້ານທົ່ງໃຈ້ໃຕ້ ແລະ ບ້ານອື່ນໆ ລວມທັງ ຂົວຂ້າມນໍ້າທຸງ, ຂົວຂ້າມນໍ້າທາ, ເຂື່ອນໄຟຟ້າ ແລະ ຊົນລະປະທານ ນໍ້າທາ 3. ຕິດພັນກັບການເຄື່ອນໄຫວວຽກງານຢູ່ແຂວງຫຼວງນໍ້າທາ ໃນຄັ້ງນີ້, ມີແຂວງ ແລະ ພາກທຸລະກິດ ຈຳນວນໜຶ່ງ ກໍ່ໄດ້ມອບເງິນ ແລະ ເຄື່ອງຊ່ວຍເຫຼືອ ໃຫ້ແກ່ອົງການປົກຄອງແຂວງຫຼວງນໍ້າທາ ເພື່ອນຳໄປຊ່ວຍເຫຼືອປະຊາຊົນທີ່ຖືກຜົນກະທົບ ແລະ ຟື້ນຟູຜົນເສຍຫາຍຕ່າງໆ ລວມມູນຄ່າທັງໝົດ 2 ຕື້ກວ່າກີບ ໂດຍການເຂົ້າຮ່ວມເປັນສັກຂີພິຍານ ຂອງທ່ານ ນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ.
ຂ່າວ ແລະ ພາບ: ກົມປະຊາສຳພັນ ຫສນຍ.
