ທ່ານ ນາຍົກລັດຖະມົນຕີ ໂອ້ລົມຊີ້ນຳວຽກງານພະລັງງານ ແລະ ບໍ່ແຮ່

ໃນຕອນເຊົ້າ ວັນທີ 1 ມີນາ 2024 ທີ່ສຳນັກງານໃຫຍ່ລັດວິ ສາຫະກິດໄຟຟ້າລາວ, ທ່ານ ສອນໄຊ ສີພັນດອນ, ນາຍົກລັດ ຖະມົນຕີ ໄດ້ໃຫ້ກຽດໂອ້ລົມຊີ້ນຳວຽກງານ ກະຊວງພະລັງງານ ແລະ ບໍ່ແຮ່; ມີທ່ານ ອາລຸນໄຊ ສູນນະລາດ, ລັດຖະມົນຕີ, ຫົວ ໜ້າຫ້ອງວ່າການສຳນັກງານນາຍົກລັດຖະມົນຕີ; ທ່ານ ໂພໄຊ ໄຊຍະສອນ, ລັດຖະມົນຕີ ກະຊວງ ພະລັງງານ ແລະ ບໍ່ແຮ່; ບັນດາທ່ານ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມ ດ້ວຍພະນັກງານຫຼັກແຫຼ່ງ ກະຊວງພະລັງງານ ແລະ ບໍ່ແຮ່, ລັດວິ ສາຫະກິດໄຟຟ້າລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຮັບຟັງການໂອ້ລົມ.

ໃນໂອກາດນີ້, ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ລາຍງານໃຫ້ຊາບ ກ່ຽວກັບສະພາບການ ເຄື່ອນໄຫວວຽກ ງານທີ່ພົ້ນເດັ່ນ ຂອງກະຊວງພະລັງງານ ແລະ ບໍ່ແຮ່ ໂດຍສະເພາະ ວຽກງານຈັດຕັ້ງ, ວຽກງານບໍລິຫານ ແລະ ວຽກງານວິຊາສະ ເພາະ. ພ້ອມທັງ ລົງເລິກຂໍ້ມູນດ້ານຕ່າງໆ ເປັນຕົ້ນ ການບໍລິຫານພະລັງງານໄຟຟ້າ ໃຫ້ຮັບປະກັນໃຫ້ແກ່ການຊົມໃຊ້ພະລັງງານໄຟ ຟ້າ ຢູ່ພາຍໃນ ສປປ ລາວ; ການດູນດ່ຽງພະລັງງານ; ການສຳ ຫຼວດ ແລະ ຊອກຄົ້ນແຮ່ທາດ; ການປະເມີນບໍລິສັດ ລົງທຶນຂະແໜງແຮ່ທາດ; ການຂຸດຄົ້ນ ແລະ ປຸງແຕ່ງແຮ່ທາດ; ການຄຸ້ມ ຄອງແຮ່ຫາຍາກ ແລະ ແຮ່ເຫຼັກ; ການປະຕິບັດວຽກງານຂອງບັນດາບໍລິສັດ ທີ່ໄດ້ຮັບອະນຸຍາດລົງທຶນ ຕິດພັນກັບນະໂຍບາຍພັດທະນາທ້ອງຖິ່ນ ແລະ ອື່ນໆ. ຫຼັງຈາກນັ້ນ, ຜູ້ຕາງໜ້າຈາກບັນດາກົມ, ລັດວິສາຫະກິດໄຟຟ້າລາວ ແລະ ພາກສ່ວນກ່ຽວ ຂ້ອງ ພາຍໃນກະຊວງພະລັງງານ ແລະ ບໍ່ແຮ່ ກໍ່ໄດ້ລາຍງານເພີ່ມ ເຕີມ ເພື່ອໃຫ້ຄວາມກະຈ່າງແຈ້ງຕື່ມບາງວຽກງານ ທີ່ຢູ່ໃນຂອບ ເຂດຄວາມຮັບຜິດຊອບຂອງຕົນ.

ໃນໂອກາດດຽວກັນ, ທ່ານ ນາຍົກລັດຖະມົນຕີ ໄດ້ໃຫ້ກຽດມີຄຳເຫັນໂອ້ລົມຕໍ່ຜູ້ເຂົ້າຮ່ວມ ໂດຍໄດ້ເຈາະຈີ້ມ ຕໍ່ບາງວຽກງານທີ່ຕິດພັນກັບ ຂົງເຂດພະລັງງານ ແລະ ບໍ່ແຮ່ ພ້ອມທັງ ຍົກໃຫ້ເຫັນບົດບາດຄວາມສຳຄັນ ຂອງວຽກງານດັ່ງກ່າວ ຕໍ່ພາລະກິດສ້າງສາພັດທະນາປະເທດຊາດ; ສະພາບ ແລະ ທ່າອ່ຽງ ຄວາມຕ້ອງການ ໃນການນຳໃຊ້ພະລັງງານໄຟຟ້າ ຢູ່ປະເທດເຮົາ ເຂົ້າໃນວຽກງານຕ່າງໆ ລວມທັງໃນຄົວເຮືອນ, ພາກທຸລະກິດ ແລະ ໂຄງການພັດ ທະນາສຳຄັນຕ່າງໆ; ສະພາບການພັດທະນາພະລັງງານໄຟຟ້າ ຢູ່ປະເທດເຮົາ ກໍ່ຄື ສະພາບລົງທຶນທີ່ພົ້ນເດັ່ນ ໃນຂະແໜງພະລັງ ງານ ທັງໂຄງການທີ່ເຮັດໄດ້ດີ ແລະ ໂຄງການທີ່ບໍ່ມີປະສິດທິຜົນ; ສະພາບການຄຸ້ມຄອງ ແລະ ພັດທະນາໂຄງການ ໃນຂະແໜງບໍ່ແຮ່, ລວມທັງ ບັນຫາຄົງຄ້າງ ແລະ ປະກົດການຫຍໍທໍ້ທີ່ເກີດຂຶ້ນ ໃນຂະແໜງການດັ່ງກ່າວ ທີ່ຈະຕ້ອງໄດ້ສືບຕໍ່ສຸມໃສ່ປັບ ປຸງແກ້ໄຂໂດຍໄວ. ຖືໂອກາດນີ້, ທ່ານນາຍົກລັດຖະມົນຕີ ຍັງໄດ້ໃຫ້ກຽດເຜີຍແຜ່ເນື້ອໃນ ທິດຊີ້ນຳຂອງສະຫາຍ ເລຂາ ທິການໃຫຍ່, ປະ ທານປະເທດ ກ່ຽວກັບ “ເສດຖະກິດເອກະລາດ ເປັນເຈົ້າຕົນເອງ” ຫຼື ເອີ້ນວ່າ “ສອຈ” ໃນໂອກາດຊີ້ນໍາ ຕໍ່ກອງປະຊຸມສະຫຼຸບວຽກ ງານປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງກະຊວງການເງິນ ໃນທ້າຍປີທີ່ຜ່ານມາ. ພ້ອມທັງ ໄດ້ເນັ້ນ ໜັກໃຫ້ຄະນະພັກ-ຄະນະນໍາ, ພະນັກງານ-ລັດຖະກອນ ທົ່ວຂະ ແໜງພະລັງງານ ແລະ ບໍ່ແຮ່ ນຳເອົາທິດຊີ້ນຳດັ່ງກ່າວ ໄປຈັດຕັ້ງຜັນຂະຫຍາຍສູ່ວຽກງານຂົງເຂດຄວາມຮັບຜິດຊອບຂອງຕົນ ໃຫ້ປະກົດຜົນເປັນຈິງ.

ພ້ອມດຽວກັນນັ້ນ, ທ່ານນາຍົກລັດຖະ ມົນຕີ ຍັງໄດ້ເນັ້ນໜັກໃຫ້ເອົາໃຈໃສ່ ຕໍ່ວຽກງານດ້ານອື່ນໆຕື່ມອີກເປັນຕົ້ນ ໃຫ້ທົບທວນຄືນບັນດານະໂຍບາຍ ການສະໜອງໄຟຟ້າໃຫ້ທົ່ວສັງຄົມ ເພື່ອໃຫ້ສອດຄ່ອງ ແລະ ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ກໍ່ຄື ການແກ້ໄຂຄວາມທຸກຍາກ ໃຫ້ດີຂຶ້ນເປັນກ້າວໆ; ສືບຕໍ່ຈັດຕັ້ງຜັນຂະຫຍາຍມະຕິຕົກລົງຂອງລັດຖະບານ ກ່ຽວກັບການສົ່ງເສີມການນໍາໃຊ້ພາຫະນະ ທີ່ນໍາໃຊ້ພະລັງງານໄຟຟ້າ ກໍ່ຄື ພະລັງງານສະອາດ ທີ່ປະເທດເຮົາມີທ່າແຮງໃຫ້ຫຼາຍຂຶ້ນເປັນກ້າວໆ; ສືບຕໍ່ສຸມໃສ່ປະເມີນບັນດາໂຄງການຂຸດຄົ້ນ ແລະ ປຸງແຕ່ງແຮ່ທາດ ຢູ່ບັນດາແຂວງທີ່ຍັງບໍ່ທັນສຳເລັດ; ສືບຕໍ່ຄົ້ນຄວ້າກໍານົດມາດຖານເງື່ອນໄຂ ໃນການພິຈາລະນາອະນຸ ຍາດ ບໍລິສັດລົງທຶນພັດທະນາບໍ່ແຮ່ ເປັນຕົ້ນ ເງື່ອນໄຂດ້ານເຕັກ ນິກ, ດ້ານການເງິນ, ການຖືຄອງບັນຊີເງິນຕາ ໂດຍໃຫ້ຮ່າງເປັນນິຕິກຳສະ ເພາະ; ສືບຕໍ່ຜັນຂະຫຍາຍ ມະຕິ 25/ກມສພ ຕິດ ພັນກັບຈັດຕັ້ງປະຕິບັດ ຄຳສັ່ງເລກທີ 34/ນຍ ວ່າດ້ວຍທິດທາງ, ເປົ້າໝາຍ ແລະ ມາດຕະການ ສ້າງແຂວງ ເປັນຫົວໜ່ວຍຍຸດທະ ສາດ, ສ້າງເມືອງ ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານ ເປັນຫົວໜ່ວຍພັດທະນາ; ຄົ້ນຄວ້າຕີລາຄາ ຄວາມສາມາດຮອງຮັບ ທາງດ້ານນິຕິກຳຄຸ້ມຄອງວຽກງານ, ມີອັນໃດຄວນຜັນຂະ ຫຍາຍ ອອກເປັນນິຕິກຳລຸ່ມກົດໝາຍຕື່ມ; ສືບຕໍ່ແບ່ງຂັ້ນຄຸ້ມຄອງວຽກງານ ໃຫ້ລະອຽດຈະແຈ້ງ ຕາມທິດແບ່ງຄວາມ ຮັບຜິດຊອບ ມອບໃຫ້ທ້ອງຖິ່ນຫຼາຍຂຶ້ນ, ລວມທັງ ການສ້າງບຸກຄະລະກອນ ໃຫ້ມີຄວາມເຂັ້ມແຂງທາງດ້ານເຕັກນິກວິຊາການ ໃຫ້ທ້ອງຖິ່ນ; ສືບຕໍ່ປະຕິບັດວຽກງານຕິດຕາມ, ກວດກາບັນດາໂຄງການ ທີ່ຂະແໜງການຕົນຄຸ້ມຄອງ ໃຫ້ແຂງແຮງ ແລະ ຕັ້ງໜ້າກວ່າເກົ່າ; ສືບຕໍ່ປັບປຸງຂອດການປະສານງານກັບພາກສ່ວນຕ່າງໆ ທັງຢູ່ສູນກາງ ແລະ ທ້ອງຖິ່ນ ໃຫ້ມີຄວາມໂລ່ງລ່ຽນ ແລະ ກົມກຽວ; ສືບຕໍ່ຄຸ້ມຄອງ ແລະ ດັດສົມໂຄງການລົງທຶນດ້ານຕ່າງໆ ໃຫ້ມີປະສິດທິຜົນສູງ; ສືບຕໍ່ເປັນໃຈກາງປະສານ ການແຈ້ງໂຈະຊົ່ວຄາວ ຫຼື ຍົກເລີກສັນຍາໂຄງການ ຕໍ່ບັນດາກິດຈະການທີ່ບໍ່ມີປະສິດທິຜົນ ຫຼື ມີຜົນກະທົບ ບົນພື້ນຖານດຳເນີນຕາມຂັ້ນຕອນ, ບັນດາລະບຽບການ, ນິຕິກໍາ ແລະ ກົດໝາຍທີ່ກ່ຽວຂ້ອງຢ່າງເຄັ່ງຄັດ.

ພາບ ແລະ ຂ່າວ: ກົມປະຊາສຳພັນ ຫສນຍ.