ໃນຕອນບ່າຍ ຂອງວັນທີ 14 ມີນາ 2024 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ນາງ ຈຸດຕາ ເອີປີເລເນິນ (Jutta Urpilainen), ກໍາມາທິການຮ່ວມມືສາກົນ ສະຫະພາບເອີຣົບ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ນາງ ຈຸດຕາ ເອີປີເລເນິນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນຂີດໝາຍສຳຄັນໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສະຫະພາບເອີຣົບ ທີ່ມີມາຍາວນານ ໃຫ້ສືບຕໍ່ຂະຫຍາຍຕົວຢ່າງຕໍ່ເນື່ອງ; ໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສະຫະພາບເອີຣົບ ໃນໄລຍະຜ່ານມາ ແມ່ນໄດ້ຮັບການເສີມຂະຫຍາຍຂຶ້ນເລື້ອຍໆ ໂດຍສຸມໃສ່ການພັດທະນາເສດຖະກິດສີຂຽວ ແລະ ລວມໝູ່, ການພັດທະນາຊັບພະຍາກອນມະນຸດ ແລະ ອື່ນໆ; ໄດ້ສະແດງຄວາມຂອບໃຈ ຕໍ່ສະຫະພາບເອຣົບ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ ເຊິ່ງການຊ່ວຍເຫຼືອດັ່ງກ່າວ ໄດ້ປະກອບສ່ວນອັນສຳຄັນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະ ການພັດທະນາຊົນນະບົດ ແລະ ການຫຼຸດຜ່ອນຄວາມທຸກຍາກຂອງປະຊາຊົນ ແນ່ໃສ່ເຮັດໃຫ້ ສປປ ລາວ ຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນຊຸມປີຕໍ່ໜ້າ ແລະ ຊ່ວຍໃຫ້ ສປປ ລາວ ສາມາດບັນລຸເປົ້າໝາຍແຜນການພັດທະນາແບບຍືນຍົງ ຂອງອົງການສະຫະປະຊາຊາດ ໃນປີ 2030; ໄດ້ແຈ້ງໃຫ້ຊາບ ກ່ຽວກັບ ສະພາບການພັດທະນາເສດຖະກິດ-ສັງຄົມ ທີ່ພົ້ນເດັ່ນ ຂອງ ສປປ ລາວ, ລວມທັງ ຄວາມພະຍາຍາມ ໃນການແກ້ໄຂຄວາມຫຍຸ້ງຍາກຕ່າງໆ ເພື່ອໃຫ້ປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ປັບປຸງຊິວິດການເປັນຢູ່ ຂອງປະຊາຊົນລາວ ໃຫ້ນັບມື້ດີຂຶ້ນ; ໄດ້ແຈ້ງໃຫ້ຊາບ ກ່ຽວກັບການກຳນົດຄຳຂວັນ ກໍ່ຄືເນື້ອໃນທີ່ເປັນບຸລິມະສິດ ຂອງກອງປະຊຸມສຸດຍອດອາຊຽນ ໃນປີ 2024 ທີ່ ສປປ ລາວ ໄດ້ຮັບກຽດເປັນເຈົ້າພາບ; ໄດ້ສະເໜີສະຫະພາບເອີຣົບ ຊ່ວຍຊຸກຍູ້ສົ່ງເສີມພາກທຸລະກິດ ຈາກບັນດາປະເທດສະມາຊິກສະຫະພາບເອີຣົບ ມາລົງທຶນ ຢູ່ ສປປ ລາວ ໃນຂົງເຂດທີ່ມີທ່າແຮງ ໃຫ້ຫຼາຍຂຶ້ນ, ພ້ອມທັງ ສືບຕໍ່ໃຫ້ການຊ່ວຍເຫຼືອ ສປປ ລາວ ໃນດ້ານຕ່າງໆທີ່ມີທ່າແຮງ ໃນຖານະທີ່ສະຫະພາບເອີຣົບ ເປັນຄູ່ຮ່ວມມືຍຸດທະສາດຂອງອາຊຽນ ເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ໃນປີ 2024 ໄດ້ຮັບຜົນສໍາເລັດຢ່າງຈົບງາມ.
ໃນໂອກາດດຽວກັນ, ທ່ານ ນາງ ຈຸດຕາ ເອີປີເລເນິນ ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ຕີລາຄາສະພາບການພົວພັນ ແລະ ຮ່ວມມື ລະຫວ່າງ ສະຫະພາບເອີຣົບ ແລະ ສປປ ລາວ, ລວມທັງ ການພົວພັນ ແລະ ຮ່ວມມື ລະຫວ່າງ ສະຫະພາບເອີຣົບ ແລະ ອາຊຽນ; ໄດ້ຕີລາຄາສູງ ຕໍ່ຄຳຂັວນ ກໍ່ຄືເນື້ອໃນກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024 ເຊິ່ງສອດຄ່ອງກັບຈຸດພິເສດ ແລະ ທ່າອ່ຽງການພັດທະນາ ຂອງ ສປປ ລາວ, ອາຊຽນ ແລະ ຄູ່ຮ່ວມພັດທະນາ ຢ່າງແທ້ຈິງ. ນອກນັ້ນ ຍັງໄດ້ແລກປ່ຽນຄຳເຫັນ ກ່ຽວກັບບັນຫາພົ້ນເດັ່ນ ໃນປະເທດອາຊຽນຈຳນວນໜຶ່ງ ທີ່ສອງຝ່າຍ ມີຄວາມສົນໃຈຮ່ວມກັນ.
ຂ່າວ ແລະ ພາບ: ກົມປະຊາສຳພັນ ຫສນຍ.
