ໃນຕອນບ່າຍ ວັນທີ 8 ສິງຫາ 2024 ທີ່ສຳນັກງານນາຍົກ ລັດຖະມົນຕີ, ທ່ານ ສອນໄຊ ສີພັນດອນ, ນາຍົກ ລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ Dr. Senia Nishtar, ປະທານອົງການກາວີ (GAVI) ແລະ ຄະນະ ເນື່ອງໃນໂອກາດທີ່ເດີນທາງມາເຂົ້າຮ່ວມກອງປະຊຸມປິ່ນອ້ອມວ່າດ້ວຍວຽກງານວັກຊິນກັນພະຍາດໃນໄລຍະກອງປະຊຸມລັດຖະ ມົນຕີສາທາລະນະສຸກ ອາຊຽນ ASEAN ຄັ້ງທີ 16 ທີ່ ສປປ ລາວ ເປັນເຈົ້າພາບ ແລະ ດຳເນີນໃນລະຫວ່າງວັນທີ 5-8 ສິງຫາ 2024.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ນາງ Dr. Senia Nishtar ພ້ອມດ້ວຍຄະນະ ທີ່ໄດ້ເດີນທາງມາຮວ່ມ ກອງປະຊຸມ ຢູ່ ສປປ ລາວ ໃນຄັ້ງນີ້ ຊຶ່ງເປັນຄັ້ງທໍາອິດ ແລະ ປະເທດທຳອິດ ທີ່ທ່ານ ນາງ Dr. Senia Nishtar ໄດ້ມາຢ້ຽມຢາມ ແລະ ເຮັດ ວຽກຢູ່ຂົງເຂດພາກພື້ນອາຊຽນພ້ອມທັງ ສະແດງຄວາມຂອບ ໃຈຕໍ່ອົງການກາວີ ທີ່ໄດ້ໃຫ້ການສະໜັບ ແລະ ຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະ ການຊ່ວຍເຫຼືອວັກຊີນປ້ອງກັນພະຍາດໂຄວິດ-19 ແລະ ວັກຊີນປ້ອງກັນພະຍາດອື່ນໆ ຊຶ່ງການຊ່ວຍ ເຫຼືອ ແລະ ປະກອບສ່ວນດັ່ງກ່າວ ແມ່ນມີຄວາມໝາຍຄວາມສໍາຄັນຫຼາຍ ຕໍ່ການຊ່ວຍສ້າງພູມຄຸ້ມກັນພະຍາດສຸຂະພາບ ໃຫ້ແກ່ເດັກນ້ອຍລາວໄດ້ເກີນ 95% ໃນແຕ່ລະປີ ລວມທັງ ການສ້າງຄວາມສາມາດໃຫ້ບຸກຄະລາກອນທາງການແພດ ຂອງ ສປປ ລາວ ຕະຫຼອດໄລຍະ 22 ປີ ຂອງການຮ່ວມມື ລະ ຫວ່າງ ສປປ ລາວ ແລະ ອົງການກາວີ; ໄດ້ສະເໜີ ອົງການກາວີ ສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ ໃນຂົງເຂດວຽກ ງານ ສາທາລະນະສຸກ ຂອງ ສປປ ລາວ ຕື່ມອີກ ໂດຍສະເພາະ ໃນເງື່ອນໄຂ ທີ່ ສປປ ລາວ ຍັງພົບກັບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສິ່ງທ້າທາຍຫຼາຍປະການ ຊຶ່ງຫາກ ສປປ ລາວ ຕ້ອງໄດ້ຊື້ວັກຊິນເອງ 100% ແມ່ນຈະຕ້ອງນຳໃຊ້ງົບປະມານເກືອບ 4 ລ້ານໂດລາຕໍ່ປີ ເຫັນວ່າ ເປັນມູນຄ່າທີ່ສູງພໍສົມຄວນ. ນອກນັ້ນ, ຍັງໄດ້ສະເໜີວຽກງານຈຳນວນໜຶ່ງ ທີ່ສປປ ລາວ ຈະຕ້ອງໄດ້ສືບຕໍ່ເອົາໃຈໃສ່ປັບປຸງແກ້ໄຂ ໃຫ້ດີຂຶ້ນກວ່າເກົ່າ ໂດຍສະເພາະ ການສ້າງຄວາມຮັບຮູ້ ແລະ ເຂົ້າໃຈ ໃຫ້ແກ່ປະຊາຊົນ ຕໍ່ການປ້ອງກັນພະຍາດຕາມລະດູການ, ລວມທັງ ການພັດທະນາບຸກຄະລາກອນທາງການແພດ ແລະ ອື່ນໆ; ໄດ້ອວຍພອນໃຫ້ ທ່ານ ນາງ Dr. Sania Nishtar ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຜົນສໍາເລັດໃນໜ້າທີ່ວຽກງານຂອງຕົນ ແລະ ເດີນທາງກັບຄືນປະເທດ ດ້ວຍຄວາມສະຫວັດ ດີພາບ.
ໃນໂອກາດດຽວກັນ, ທ່ານ ນາງ Dr. Senia Nishtar ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປ ລາວ; ໄດ້ກ່າວສະແດງຄວາມຊົມເຊີຍ ຕໍ່ຜົນສຳເລັດອັນພົ້ນເດັ່ນ ໃນວຽກງານສາທາລະນະສຸກ ຂອງ ສປປ ລາວ ໃນໄລຍະຜ່ານມາ ຊຶ່ງສ່ອງແສງເຖິງ ລັດຖະບານລາວ ໄດ້ໃຫ້ຄວາມສຳຄັນ ຕໍ່ວຽກ ງານດັ່ງກ່າວ ເປັນຢ່າງດີ. ພ້ອມກັນນັ້ນ, ທ່ານ ຍັງໄດ້ຕີລາຄາວ່າ ຜົນສຳເລັດອັນພົ້ນເດັ່ນໃນວຽກງານສາທາລະນະສຸກຂອງ ສປປ ລາວ ໃນບາງດ້ານ ແມ່ນເປັນຂໍ້ມູນໃໝ່ສຳລັບທ່ານ ແລະ ທ່ານ ກໍ່ຈະນຳເອົາຜົນສຳເລັດດັ່ງກ່າວ ໄປເຜີຍແຜ່ໃນເວທີລະດັບຕ່າງໆ ໃຫ້ເປັນທີ່ຮັບຮູ້ກວ້າງຂວາງຂຶ້ນກວ່າເກົ່າ. ນອກນັ້ນ, ທ່ານ ຍັງໄດ້ຍົກໃຫ້ເຫັນບົດບາດ ແລະ ຄວາມສຳຄັນ ຂອງອົງການກາວີ ກໍ່ຄືວັກຊີນປ້ອງກັນພະຍາດຕ່າງໆ ຊຶ່ງການປ້ອງກັນພະຍາດ ນອກ ຈາກຊ່ວຍສ້າງພູມຄຸ້ມຄຸ້ມກັນໃຫ້ແກ່ສຸຂະພາບແລ້ວ ຍັງຊ່ວຍປະຢັດ ແລະ ຫຼຸດຜ່ອນຄ່າໃຊ້ຈ່າຍຕ່າງໆ ໄດ້ຢ່າງຫຼວງຫຼາຍ, ທັງ ເປັນການປະກອບສ່ວນ ພັດທະນາຊັບພະຍາກອນມະນຸດ ໃຫ້ມີສຸຂະພາບແຂງແຮງ ເພື່ອສາມາດປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງຊາດ ຢ່າງມີປະສິດທິພາບ ແລະ ປະສິດທິຜົນ.
ຂ່າວ ແລະ ພາບ: ກົມປະຊາສຳພັນ ຫສນຍ.
