ໃນຕອນເຊົ້າວັນທີ 17 ກຸມພາ 2023 ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງ ສູນກາງພັກ, ປະທານສະພາແຫ່ງຊາດ ໄດ້ພົບປະ ແລະ ໂອ້ລົມຕໍ່ການນໍາຫຼັກແຫຼ່ງຂອງແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ມີບັນດາທ່ານໃນຄະນະບໍລິຫານງານພັກແຂວງ, ມີເລຂາພັກເມືອງ, ເຈົ້າເມືອງ 11 ເມືອງທົ່ວແຂວງໃຫ້ການຕ້ອນຮັບຢ່າງອົບອຸ່ນ.
ກ່ອນອື່ນທ່ານ ພົງສະຫວັນ ສິດທະວົງ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງໂດຍສັງເຂບ, ເຊິ່ງມາຮອດປະຈຸບັນເສດຖະກິດຂອງແຂວງຂະຫຍາຍຕົວຢູ່ໃນລະດັບ 4,9% ທຽບໃສ່ຄາດໝາຍວາງໄວ້ເພີ່ມຂຶ້ນ 0,1% ລວມຍອດຜະລິດຕະພັນພາຍໃນ 12,339 ຕື້ກີບ, ສະເລ່ຍໃສ່ຫົວຄົນໜຶ່ງ 29,47 ລ້ານກີບຫຼືເທົ່າກັບ 1.734 ໂດລາສະຫະລັດ, ດ້ານລາຍຮັບປະຕິບັດໄດ້ທັງໝົດ 1.197,84 ຕື້ກີບ,ໃນນີ້: ລາຍຮັບພູດສູນກາງ: ປະຕິບັດໄດ້ 920,34 ຕື້ກີບ, ລາຍຮັບພູດທ້ອງຖິ່ນ: ປະຕິບັດໄດ້ 277,5 ຕື້ກີບ ແລະ ຄຸ້ມຄອງລາຍຈ່າຍທັງໜົດ 536,49 ຕື້ກີບ, ການຜະລິດພວກເຮົາໄດ້ສຸມໃສ່ຜະລິດເຂົ້າເພື່ອຄໍ້າປະກັນສະບຽງອາຫານແລະ ພືດເປັນສິນຄ້າ, ທົ່ວແຂວງໄດ້ຊົມໃຊ້ໄຟຟ້າຖາວອນໃນລະບົບກວມ 98,60%; ອັດຕາການຊົມໃຊ້ນໍ້າສະອາດ 97,61% ຂອງຄອບຄົວທັງໝົດ, ຄອບຄົວທຸກຍາກຍັງເຫຼືອ 26.648 ຄອບຄົວ ກວມ 33,15%, ໂອກາດດັ່ງກ່າວ ທ່ານ ປອ ໄຊສົມພອນ ພົມວິຫານ ກໍ່ໄດ້ໃຫ້ກຽດໂອ້ລົມ, ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍມາຍັງການນໍາຂອງແຂວງທີ່ເຮັດສໍາເລັດວຽກງານໃນຫຼາຍດ້ານ, ພ້ອມດຽວກັນກໍ່ໄດ້ເໜັ້ນໜັກໃຫ້ການນໍາທຸກພາກສ່ວນຂອງແຂວງຈົ່ງສືບຕໍ່ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃຫ້ທົ່ວເຖິງ ແລະເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ, ເພີ່ມທະວີການນໍາພາ-ຊີ້ນໍາຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ, ເອົາໃຈໃສ່ນໍາພາຊີ້ນໍາໃນການປົກປັກຮັກສາແຫຼ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫຼ່ງທ່ອງທ່ຽວໃຫ້ຄົງຢູ່ຍາວນານຕະຫລອດໄປ, ເອົາໃຈໃສ່ ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນ, ສະຖາບັນການສຶກສາຕ່າງໆ ໃຫ້ຮັບປະກັນດ້ານມາດຕະຖານຕາມກົດໝາຍກໍານົດ; ເພີ່ມທະວີການໂຄສະນາເຜີຍແຜ່ຢ່າງກວ້າງຂວາງແລະຖືເອົາວາລະແຫ່ງຊາດ ເປັນພາລະກິດທົ່ວປວງຊົນຊຶ່ງສະມາຊິກພັກ, ພະນັກງານ-ລັດຖະກອນກໍ່ຄືພໍ່ແມ່ປະຊາຊົນບັນດາເຜົ່າຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ, ເອົາໃຈໃສ່ຄຸ້ມຄອງການເກັບລາຍຮັບງົບປະມານບໍ່ໃຫ້ຮົ່ວໄຫຼ ດ້ວຍການນໍາໃຊ້ເຄື່ອງມືເອເລັກໂຕຣນິກທີ່ທັນສະໄໝ ເຂົ້າໃນການເກັບລາຍຮັບ, ເອົາໃຈໃສ່ປຸກລະດົມຂົນຂວາຍໃຫ້ ພໍ່ແມ່ປະຊາຊົນບັນດາເຜົ່າ ເຫັນໄດ້ຜົນຮ້າຍຂອງບັນຫາຢາເສບຕິດ ທີ່ມີຕໍ່ປະເທດຊາດ, ສັງຄົມ, ຄອບຄົວ ກໍຄືສຸຂະພາບຂອງລູກຫລານ, ພ້ອມດຽວກັນທ່ານ ປອ ໄຊສົມພອນ ພົມວິຫານ ຍັງໄດ້ມອບຄອມພີວເຕີຈໍານວນ 5 ຊຸດໃຫ້ສະພາປະຊາຊົນແຂວງ, ມອບເຄື່ອງອຸປະກອນການແພດໃຫ້ໂຮງໝໍແຂວງ ແລະ ມອບເງິນສົດຈໍານວນ 100 ລ້ານກີບໃຫ້ອົງການປົກຄອງແຂວງ ໄຊຍະບູລີ.
ຂ່າວ-ພາບ: ອຸ່ນເຮືອນ ໂພທິລັກ
