ຕອນບ່າຍວັນທີ 4 ພະຈິກ 2022, ທ່ານ ພັນຄໍາ ວິພາວັນ ນາຍົກລັດຖະມົນຕີ ໄດ້ຢ້ຽມຊົມຮ້ານວາງສະແດງຂອງບໍລິສັດທາງລົດໄຟລາວ-ຈີນ ຈຳກັດ ໃນງານບຸນນະມັດສະການພະທາດຫຼວງ, ໂດຍໃຫ້ການຕ້ອນຮັບຂອງ ທ່ານ ຢວນ ໝິງຫາວ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ, ພ້ອມໄດ້ ລາຍງານສະພາບກ່ຽວກັບການຂົນສົ່ງໂດຍສານ-ສີນຄ້າຜ່ານທາງລົດໄຟລາວ-ຈີນໃນໄລຍະທີ່ຜ່ານມາ, ຫຼັງຈາກຍ້ຽມຊົມການວາງສະແດງແລ້ວ ທ່ານນາຍົກລັດຖະມົນຕີກໍໄດ້ໃຫ້ການຊົມເຊີຍຕໍ່ບໍລິສັດທາງລົດໄຟລາວ- ຈີນ ທີ່ໄດ້ສ້າງຄວາມສະດວກ ໃນການເດີນທາງ ແລະຂົນສົ່ງສິນຄ້າລະຫວ່າງນະຄອນຫລວງວຽງຈັນ ແລະບັນດາແຂວງທາງພາກເຫນືອຂອງລາວ ອອກສູ່ ສປຈີນ.
ບຸນນະມັດສະການພະທາດຫຼວງປີນີ້ຈັດຍິ່ງໃຫຍ່ກວ່າທຸກໆປີ, ປະຊາຊົນລາວຈາກບັນດາແຂວງອ້ອມຂ້າງກໍພາກັນເດີນທາງມາທ່ຽວຊົມບຸນພະທາດຫຼວງເປັນຈຳ ນວນຫລວງຫຼາຍ, ເພື່ອຕອບສະໜອງການເດີນທາງຂອງຜູ້ໂດຍສານ, ບໍລິສັດທາງລົດໄຟລາວ-ຈີນ ຈິ່ງໄດ້ເພີ່ມຂະບວນລົດໄຟ EMU ຖ້ຽວ C84/3 ແລະ C92/1 ສອງຂະບວນຕໍ່ໃສ່ກັນຕັ້ງແຕ່ວັນທີ 4-8 ພະຈິກ ເພື່ອອໍານວຍຄວາມສະດວກໃຫ້ຜູ້ໂດຍສານ. ນອກນີ້, ຍັງໄດ້ເພີ່ມມາດຕະການປ້ອງກັນຄວາມປອດໄພໃນການຂົນ ສົ່ງ, ຈັດສັນພະນັກງານໃຫ້ພຽງພໍຮອງຮັບຜູ້ໂດຍສານ.
ຄຽງຄູ່ກັນນັ້ນ, ບໍລິສັດທາງລົດໄຟລາວ- ຈີນ ກໍຖືໂອກາດນີ້ ແລະ ຕັ້ງບູດໂຄສະນາທາງລົດໄຟ ລາວ-ຈີນ ເຜີຍແຜ່ຄວາມຮູ້ ແລະ ຂໍ້ມູນກ່ຽວກັບການຂົນສົ່ງຜູ້ໂດຍ ສານ-ສິນຄ້າທາງລົດໄຟລາວ-ຈີນຄວາມປອດໄພທາງລົດໄຟລາວ-ຈີນ, ຕັ້ງແລນມາກໃຫ້ແຂກທີ່ມາຍ້ຽມຊົມໄດ້ຖ່າຍຮູບ, ວາງສະແດງໂມເດວລົດໄຟ ແລະ ເຄື່ອງທີ່ລະນຶກຕ່າງໆຂອງທາງລົດໄຟ, ແຈກໃບປີວ ແລະ ຄອຍໃຫ້ບໍລິການແນະນຳຂໍ້ມູນກ່ຽວກັບທາງລົດໄຟ, ເຊິ່ງເປັນການຊ່ອຍໃຫ້ປະຊາຊົນເຂົ້າເຖິງຂໍ້ມູນ ແລະ ເຂົ້າໃຈກ່ຽວກັບການຂົນສົ່ງທາງລົດໄຟໄດ້ເປັນຢ່າງດີ.
