ໃນວັນທີ 12 ກຸມພາ ປີນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະໄດ້ລົງເຄື່ອນໄຫວກວດກາ-ຊຸກຍູ້ ແລະ ຊີ້ນໍາວຽກງານການຫ້າງຫາກະກຽມການດໍາເນີນການປ່ອນບັດເລືອກຕັ້ງ ສສຊ ແລະ ສສຂ, ການຜະລິດລະດູແລ້ງ ແລະ ການປ້ອງກັນ-ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ເມືອງ ພຽງ, ໂດຍມີ ທ່ານ ເສີດ ແສງສຸລິນ ເຈົ້າເມືອງ ພ້ອມດ້ວຍການນໍາຂອງເມືອງເຂົ້າຮ່ວມ.

ທ່ານ ເສີດ ແສງສຸລິນ ເຈົ້າເມືອງໄຊຍະບູລີ ໄດ້ລາຍງານຫຍໍ້ກ່ຽວກັບຜົນສໍາເລັດການຊີ້ນໍາໆພາລວມຕໍ່ທຸກຂົງເຂດວຽກງານໂດຍສະເພາະແມ່ນໄດ້ລົງເລິກ, ວຽກງານກເລືອກຕັ້ງ ສສຊ ແລະ ສສຂ, ວຽກງານ ການຜະລິດລະດູແລ້ງແລະ ວຽກງານ ປ້ອງກັນ-ສະກັດກັ້ນການແຜ່ລະບາດຂອງພະຍາດໂຄວິດ-19 ຊຶ່ງທ່ານໄດ້ກ່າວວ່າ: ການກະກຽມແກ່ການປ່ອນບັດເລືອກຕັ້ງ ສສຊ ແລະ ສສຂ ຮອດປະຈຸບັນແມ່ນມີຄວາມພ້ອມຮອບດ້ານເຊັ່ນ: ສໍາເລັດການແບ່ງຄວາມຮັບຜິດຊອບຢູ່ແຕ່ລະໜ່ວຍເລືອກຕັ້ງ, ກະກຽມຜ້າສາກ, ເວທີ, ຄໍາຂວັນ, ອຸປະກອນເຄື່ອງມືຮັບໃຊ້, ສໍາເລັດການເກັບກໍາຂໍ້ມູນສະຖິຕິຂອງພົນລະເມືອງຜູ້ມີສິດປ່ອນບັດ, ການຮັກສາຄວາມສະຫງົບຮອບດ້ານ, ທົ່ວເມືອງ ພຽງ ມີຜູ້ມີສິດປ່ອນບັດເລືອກຕັ້ງທັງໝົດ 39.973 ຄົນ, ຍິງ 19.871 ຄົນ, ໃນນີ້: ປ່ອນຢູ່ທ້ອງຖິ່ນຮາກຖານ 35.225 ຄົນ, ປ່ອນຢູ່ທ້ອງຖິ່ນອື່ນ 3.360 ຄົນ, ເຮັດວຽກ-ຮຽນຕໍ່ຕ່າງປະເທດ 1.388 ຄົນ, ແລະ ຜູ້ມີສິດຈາກທ້ອງຖິ່ນອື່ນ 692 ຄົນ, ໄດ້ແບ່ງເປັນ 51 ໜ່ວຍເລືອກຕັ້ງ, ວຽກງານການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ແມ່ນໄດ້ສືບຕໍ່ປະຕິບັດບັນດາມາດຕະການຂອງໜ່ວຍສະເພາະກິດແຫ່ງຊາດ ກ່ຽວກັບ ການປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດເປັນຕົ້ນແມ່ນໄດ້ເຝົ້າລະວັງແຮງງານລາວທີ່ກັບຈາກຕ່າງປະເທດຢູ່ລຽບຊາຍແດນເປັນປົກກະຕິ, ສໍາລັບການຜະລິດລະດູແລ້ງປີນີ້ມີເນື້ອທີ່ 1.970 ເຮັກຕາ, ໃນນີ້: ປູກເຂົ້ານາແຊງ 900 ເຮັກຕາ, ພືດຕ່າງໆ 1.070 ເຮັກຕາ, ປູກໝາກໂມຂອງບໍລິສັດຈາກ ສປປຈີນ 350,69 ເຮັກຕາ, ຖົ່ວເຫຼືອງ 493,44 ເຮັກຕາ, ສາລີຫວານຂອງປະຊາຊົນ 85,5 ເຮັກຕາ, ໝາກແຕງ 55,2 ເຮັກຕາ ແລະ ພືດອື່ນໆ 85,17 ເຮັກຕາ.

ໂອກາດນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ໃຫ້ກຽດໂອ້ລົມ ຊຶ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນສໍາເລັດດັ່ງກ່າວ ພ້ອມທັງໄດ້ເນັ້ນໜັກໃຫ້ການນໍາຂອງເມືອງ ຈົ່ງເອົາໃຈໃສ່ຕໍ່ວຽກງານການເລືອກຕັ້ງ ໂດຍສະເພາະແມ່ນຮັກສາຄວາມສະຫງົບປອດໄພຮອບດ້ານ, ຮັບປະກັນເຮັດໃຫ້ການເລືອກຕັ້ງຄັ້ງນີ້ມີບັນຍາກາດ ແລະ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້, ເອົາໃຈໃສ່ເຝົ້າລະວັງຢ່າງເຂັ້ມງວດຕໍ່ການລະບາດຂອງພະຍາດໂຄວິດ-19, ໂດຍການກວດກາຄົນເຂົ້າ-ອອກເມືອງໃຫ້ເປັນປົກກະຕິ, ເອົາໃຈໃສ່ຊຸກຍູ້ສົ່ງເສີມປະຊາຊົນປູກພືດລະດູແລ້ງໃຫ້ຫຼາຍ ພ້ອມທັງລົງຕິດຕາມ-ໃຫ້ທິດຊີ້ນໍາໃນການບົວລະບັດຮັກສາ, ການໃສ່ຝຸ່ນຕ່າງໆ, ເອົາໃຈໃສ່ປົກປັກຮັກສາປ່າໄມ້ ເປັນຕົ້ນແມ່ນປ່າຕົ້ນນໍ້າ ແລະ ເອົາໃຈໃສ່ເຝົ້າລະວັງ, ປ້ອງກັນ ແລະ ສະກັດກັ້ນບໍ່ໃຫ້ມີໄຟໄໝ້ລາມປ່າຢ່າງເດັດຂາດ, ຈາກນັ້ນທີມງານຂອງທ່ານເຈົ້າແຂວງກໍ່ໄດ້ລົງຢຽມຢາມເບິ່ງການປູກເຂົ້າ 3 ລະດູຕໍ່ປີ ແລະ ການປູກຖົ່ວເຫຼືອງຂອງບໍລິສັດ ຊິນຢວນ.

ຂ່າວ-ພາບ: ອຸ່ນເຮືອນ ໂພທິລັກ

Loading...