ທ່ານ ລັດຖະມົນຕີ, ຫົວໜ້າ ຫສນຍ ເຄື່ອນໄຫວຊຸກຍູ້ວຽກງານຢູ່ແຂວງຫຼວງພະບາງ
ໃນວັນທີ 09 ສິງຫາ 2024 ທ່ານ ບົວຄົງ ນາມມະວົງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກ ລັດຖະມົນຕີ, ຫົວໜ້າກອງເລຂາຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານ ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ຢູ່ແຂວງຫຼວງພະບາງ ໂດຍມີທ່ານ ນາງ ສິລິພອນ ສຸພັນທອງ, ຮອງເຈົ້າແຂວງໆຫຼວງພະບາງ ນຳພາຄະນະນຳຂອງແຂວງ, ບັນດາພະແນກການ ແລະ ພາກສ່ວນກ່ຽວຂ້ອງ ຮ່ວມເຮັດວຽກ.
ໃນໂອກາດນີ້, ທ່ານ ນາງ ສິລິພອນ ສຸພັນທອງ, ຮອງເຈົ້າແຂວງໆຫຼວງພະບາງ ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ເຫັນວ່າ ເສດຖະກິດຂະຫຍາຍຕົວໃນລະດັບ 3.6% ຕໍ່ປີ (ແຜນການປີ 5.5), ການເກັບລາຍຮັບເຂົ້າງົບປະມານ ແລະ ແຜນລາຍຈ່າຍ ສາມາດປະຕິບັດໄດ້ຕາມແຜນທີ່ໄດ້ກໍານົດໄວ້, ຊຶ່ງບຸລິມະສິດ ໃນການປະຕິບັດແຜນລາຍຈ່າຍ ແມ່ນເບີກຈ່າຍເງິນເດືອນ, ເງິນນະໂຍບາຍ ແລະ ລາຍຈ່າຍປົກກະຕິ; ດ້ານການລົງທຶນ ໄດ້ຈັດ ຕັ້ງປະຕິບັດໂຄງການລົງທຶນຂອງລັດ 242 ໂຄງການ, ປະຕິບັດໄດ້ 100.33 ຕື້ກີບ; ດ້ານຂົງເຂດກະສິກໍາ ແລະ ປ່າໄມ້: ໄດ້ສືບຕໍ່ຊຸກຍູ້ສົ່ງເສີມການຜະລິດ ເພື່ອສະໜອງຄວາມຕ້ອງການຢູ່ພາຍໃນແຂວງ ແລະ ສົ່ງອອກຈຳນວນໜຶ່ງ, ອັນພົ້ນເດັ່ນ ໄດ້ຊຸກຍູ້ການປູກເຂົົ້ານາແຊງໄດ້ລື່ນແຜນການ 10.26% ແລະ ມີຟາມລ້ຽງສັດສ້າງໃໝ່ ຈໍານວນໜຶ່ງ.
ໃນໂອກາດດຽວກັນ, ທ່ານ ລັດຖະມົນຕີ, ຫົວໜ້າ ຫສນຍ ກໍ່ໄດ້ມີຄຳເຫັນແລກ ປ່ຽນຄວາມຄິດເຫັນ ຕໍ່ຜູ້ເຂົ້າຮ່ວມ, ພ້ອມທັງ ສະເໜີໃຫ້ແຂວງ ແລະ ພາກສ່ວນກ່ຽວຂ້ອງຂອງແຂວງ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ຮັກສາຄວາມສະຫງົບຮອບດ້ານ ແລະ ຄວາມເປັນລະບຽບຮຽນຮ້ອຍພາຍໃນແຂວງ; ສືບຕໍ່ພັດທະ ນາ ແລະ ປັບປຸງ ລະບົບການບໍລິການ ການທ່ອງທ່ຽວ ໃຫ້ສາມາດດຶງດູດ ແລະ ເປັນທີ່ປະທັບໃຈ ຂອງນັກທ່ອງທ່ຽວ, ທັງຮັບປະກັນໄດ້ ຄວາມສະຫງົບປອດໄພ; ພັດທະນາວຽກງານຄົມມະນາຄົມຂົນສົ່ງ ເພື່ອເຊື່ອມຕໍ່ກັບບັນດາແຂວງພາກເໜືອ ໃຫ້ມີຄວາມໂລ່ງລ່ຽນ ແລະ ສະດວກຫຼາຍຂຶ້ນ ໂດຍສະເພາະ ຮີບຮ້ອນປັບປຸງເສັ້ນທາງທີ່ເປ່ເພ ເພື່ອບໍ່ໃຫ້ເປ່ເພເສຍຫາຍຫຼາຍກວ່າເກົ່າ ແລະ ເດີນທາງໄປມາສະດວກສະບາຍ, ຊ່ວຍປະຢັດຕົ້ນທຶນການຂົນສົ່ງໄດ້ຫຼາຍຂຶ້ນ; ສືບຕໍ່ພັດທະນາພະລັງງານໄຟຟ້າ ແລະ ການຜະລິດກະສິກຳ ທີ່ແຂວງມີທ່າແຮງ; ສືບຕໍ່ພັດທະນາຊັບພະຍາກອນມະນຸດ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງວຽກງານ ໃນປັດຈຸບັນ ແລະ ອະນາຄົດ ໂດຍສະເພາະ ສອດຄ່ອງກັບທິດທາງການພັດທະນາແຂວງ; ສືບຕໍ່ຕິດ ຕາມກວດກາ ພ້ອມທັງ ລົງເລິກບັນດາໂຄງການຂຸດຄົ້ນແຮ່ຕ່າງໆ ເພື່ອຈຳກັດຊ່ອງຫວ່າງການສວຍ ໂອກາດ ເຮັດໃຫ້ລັດເສຍຜົນປະໂຫຍດ; ໃຫ້ກວດກາ ແລະ ແກ້ໄຂບັນຫາລົດເຖື່ອນ ກໍ່ຄືບັນຫາພາຫະນະ ທີ່ນຳໃຊ້ ແລະ ນຳເຂົ້າ ບໍ່ຖືກຕ້ອງຕາມກົດ ໝາຍ ແລະ ລະບຽບການ ຢ່າງເຂັ້ມງວດ; ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມລັດຖະບານເປີດກວ້າງ ຄັ້ງທີ I ປີ 2024 ຄຽງຄູ່ກັບການຈັດຕັ້ງປະຕິບັດ ທິດຊີ້ນໍາຂອງສະຫາຍ ເລຂາທິການໃຫຍ່, ປະທານປະເທດ ທີ່ໄດ້ຊີ້ນນໍຳ ໃນໂອກາດດຳ ເນີນກອງປະຊຸມເປີດກວ້າງດັ່ງກ່າວ ໃຫ້ປະກົດຜົນເປັນຈິງ; ສືບຕໍ່ຈັດຕັ້ງປະຕິບັດ ບັນດາໜ້າວຽກຈຸດສຸມ ແລະ ບັນດານິຕິກຳ ທີ່ຄະນະສະເພາະກິດ ຮັບຜິດຊອບແກ້ໄຂບັນ ຫາເຄັ່ງຮ້ອນທາງດ້ານເສດຖະກິດ-ການເງິນ ກໍ່ຄື ລັດຖະບານ ວາງອອກ ໃຫ້ມີການຫັນປ່ຽນດີຂຶ້ນຢ່າງຈະແຈ້ງ ແລະ ມີຄວາມຄືບໜ້າໄວ.
ຫຼັງຈາກນັ້ນ, ທ່ານ ລັດຖະມົນຕີ, ຫົວໜ້າ ຫສນຍ ພ້ອມດ້ວຍຄະນະ ກໍ່ໄດ້ເຮັດວຽກຮ່ວມກັບ ຫ້ອງວ່າການແຂວງ ໂດຍໄດ້ລົງເລິກແລກປ່ຽນບົດຮຽນວຽກງານ ການເປັນເສນາທິການຮັບໃຊ້ການນໍາ ໃນຂັ້ນຂອງຕົນ ແລະ ວຽກງານຕິດຕາມຊຸກຍູ້ ແລະ ປະເມີນຜົນການຈັດຕັ້ງປະຕິບັດ ບັນດາທິດຊີ້ນໍາຂອງລັດຖະບານ ເພື່ອເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມ ໄດ້ຮັບຜົນດີຂຶ້ນກວ່າເກົ່າ; ໄດ້ຊີ້ນໍາໃຫ້ຄົ້ນຄວ້າກົນໄກໃນການຊ່ວຍຕິດຕາມ ການປະຕິບັດນິຕິກຳ ຂອງແຂວງ ແລະ ລັດຖະບານ ຊຶ່ງທາງ ຫສນຍ ໄດ້ສ້າງແອັບໃນໂທລະສັບມືຖື (Application) ທີ່ເປັນອັນໃໝ່ ເພື່ອນໍາໃຊ້ເຕັກໂນໂລຊີທີ່ທັນສະໄໝ ຊ່ວຍຕິດຕາມການຈັດຕັ້ງປະຕິບັດບັນດາທິດຊີ້ນໍາ ແລະ ນິຕິກຳລຸ່ມກົດໝາຍຂອງລັດຖະບານ ເພື່ອໃຫ້ສາມາດກວດກາ, ສະຫຼຸບລາຍ ງານ ການຈັດຕັ້ງປະຕິບັດວຽກງານດັ່ງກ່າວ ໄດ້ຢ່າງຖືກຕ້ອງ ແລະ ທັນການ.
ພາບ ແລະ ຂ່າວ: ກົມປະຊາສຳພັນ, ຫສນຍ
